Tala o Fa’amasinoga

O le ave ta’avale o le pikiapu lea na a’afia i se fa’alavelave  i Satala i le po o le Aso Gafua na te’a nei, ua tu’uaia nei e le malo i moliaga o le ave ta’avale ‘ona...

ave ta’avale fa’atamala, atoa ai ma le ave ta’avale fa’atautala.

Na te’ena e le ali’i o Fu Yung Lin tu’uaiga a le malo fa’asaga ia te ia ina ua tula’i i luma o le Fa’amasinoga Fa’aitumalo i le taeao ananafi, ma ua toe fa’atulaga ai loa le isi ana iloiloga e faia i le Aso Lua o le vaiaso fou, lea ua fa’amoemoe le malo e tatau ona o’o atu i ai ua mae’a a latou su’esu’ega o lo’o faia, ma tu’uina atu ai loa moliaga fa’aopoopo fa’asaga i le ua molia.

Sa fa’atonu e le fa’amasinoga i le taeao ananafi, le tatau ona o’o atu i leisi iloiloga, ua maua se loia a le ua molia,ona o lo o manino i pepa sa ia fa’atumu i le fa’amasinoga, o lo o ia gafatia ona totogi se loia tua.

Na tatala i tua Lin i le mae’a ai ona ia totogia o se vaega tupe i le fa’amasinoga, peita’i ua poloaina o ia e le fa’amasinoga e aua ne’i ona tu’ua le teritori a’o fa’agasolo ai lana mataupu, ma ia aua fo’i ne’i ona toe solia se isi tulafono.

O le te’a o le 8:00 i le po o le Aso Gafua na te’a nei na tula’i mai ai lea fa’alavelave i Satala, lea na a’afia ai se taxi la’upasese ma le ta’avale a le ua molia.

TOE TOLOPO ILOILOGA MATAUPU NA TULA’I MAI AOGA SAMOANA

O le aso 22 o Tesema lea ua fa’atulaga i ai le ulua’i iloiloga a se alo tama’ita’i o le afioga i le Komesina o Leoleo, ae o le aso 8 o Tesema lea ua toe tolopo i ai le iloiloga a le isi to’atolu, o iina lea o le a mafai ai ona fa’amaonia i le fa’amasinoga le i ai o se maliliega ua sainia e le malo ma i latou nei, po o le amataina o la latou fa’amasinoga iloilo i le aso 22 o Tesema.

O le taeao ananafi na toe vala’auina ai lenei mataupu i luma o le ali’i fa’amasino o John Ward II, mo le  fa’atulagaina o le aso e fa’ataunu’u ai le fa’amasinoga autu fa’asaga ia i latou ua molia, peita’i na fa’ailoa e le tama’ita’i loia o Sharron Rancourt lea o lo o tula’i mo Sandra Herrera, ia lona mana’o e fa’atulaga se aso e fa’ataunu’u ai le fa’amasinoga autu a le ua molia.

O le isi to’atolu o lo o tu’uaia fo’i i lenei mataupu e aofia ai Blanche Tua, Deevon Tua ma Sandra Herrera Sopoaga, ua fa’atulaga le isi a latou iloiloga i le aso 8 o Tesema, peita’i afai e o’o atu i le aso lea e le’i i ai lava se maliliega ua latou faia ma le malo, ona fa’atulaga fa’atasi loa lea o le latou fa’amasinoga autu ma Herrera.

O i latou nei e to’afa o lo o tu’uaia uma i le solitulafono mama o le fa’atupu vevesi i nofoaga faitele, ona o se fa’alavelave na tula’i mai i le  Aoga Maualuga a Samoana i le masina o Fepuari o le tausaga nei, lea o lo o tu’uaia ai i latou i lo latou fufusu ma ni tama’ita’i se to’alua i totonu o le Ofisa o le Pule Aoga.

QUIN SUN

O le masina fou lea ua fa’atulaga i ai le ulua’i iloiloga o le mataupu a se ali’i mai Saina, lea o lo’o tu’uaia i lona fa’aaogaina lea o se agaese e fa’ao’o ai manu’a i se isi fo’i ali’i Saina, i le mae’a ai lea o lana ulua’i iloiloga lea na faia i le taeao ananafi.

E lua vaiaso o tolopo le ulua’i iloiloga o le mataupu a Sun, ona sa tau saili se fa’aliliu upu na te fa’aliliuina taualumaga o lana mataupu mai le gagana Fa’aperetania i le gagana Saina. O le taeao ananafi na mafai ai ona avanoa le tama’ita’i fa’aliliuupu, ma fa’ataunu’u ai loa lea iloiloga.

Na teena e Sun le moliaga mamafa  o le fa’ao’olima i le tulaga lua e pei ona tu’uaia ai o ia e le malo.

O lea moliaga na afua mai i se fa’alavelave na tula’i mai i le amataga o le masina nei i Futiga, ina ua tula’i mai se vevesi i le va o Sun ma le ali’i na a’afia, ma ia fa’aaogaina ai loa se agaese e tipi ai le tauau o lea ali’i, e pei ona tu’uaia ai o ia e le malo.

O Sun ma le ali’i na a’afia, e galulue i se fa’atoaga kapisi i Futiga. O lo’o taofia pea o ia i le toese e aunoa ma se tupe na fa’atulaga e le fa’amasinoga, ona o tulaga fa’aletonu i ona pepa nofomau.

Comment Here