TOE FAILA MOLIAGA FAASAGA I NI ALII SE TOAFA

O le vaiaso nei na toe faila ai e le malo i luma o le faamasinoga moliaga faasaga i ni alii se to’afa, ona o tuuaiga i lo latou faia o uiga mataga faasaga i se tamaitai e 14 tausaga le matua.

O i latou e toafa o lo o tuuaia i lenei mataupu e aofia ai Peni ‘Ben’ Levi, Tavita Mariota, Lewis Lokeni ma Anthony Sioka, ma o lo o tuuaia i latou i le moliaga mamafa e tasi o le faia o gaioiga mataga, o se solitulafono e mafai ona faasala ai se tasi i le toese mo le umi e le silia i le 7 tausaga, pe faasala foi i le salatupe e le silia i le $5,000, ma le moliaga mama o le faia o gaioiga e ono lamatia ai le saogalemu o fanau laiti, o se solitulafono e mafai ona faasala ai se tasi i le toese mo le tausaga atoa, pe faasala i le salatupe e $1,000.

Ua teena e nei alii o latou moliaga ma ua faatulaga ai loa o latou uluai iloiloga mo le aso 23 o Me, 2013.

O le amataga o le tausaga nei na ulua’i faila ai e le malo lenei mataupu, ae i le lua vaiaso talu ai, na faila ai e le malo se talosaga i luma o le faamasinoga ina ia solofua ulua’i moliaga na tuuaia ai i latou nei, ae tuu atu le avanoa latou te toe failaina ai ni moliaga e ese mai i ulua’i moliaga.

Na talia e le faamasinoga le talosaga a le malo, ma tatala ai loa i latou nei e toafa i tua mai le toese.  Na mafua ona a’afia nei alii i le tulafono, ina ua faafesootai e le aoga tulaga muamua a Lupelele le ofisa o leoleo, ona o se latou teineititi aoga na alu atu ma lona ua e leaga uma i ‘love bites’.

Na faia suesuega a leoleo ma maua ai, o le masina o Aokuso 2011 seia oo mai i le masina o Ianuari 2013 na tula’i mai ai le faalavelave i le va o alii nei e toafa ma le tamaitai o lo o aafia.

E na o Sioka lea ua tatala i tua mai le toese ina ua maea ona ia totogia le $10,000, ae o le isi toatolu o lo o taofia pea i le toese.

O ni isi o tuutuuga a le faamasinoga o lo o tatala ai Sioka i tua, o le faasa ona ia toe taumafai e faafesootai le tamaitai o lo o aafia i lenei mataupu.

O le tamaitai loia ia Camille Pilippe o lo o tulai mo le malo ae o alii loia ia Mike White ma Douglas Fiau o lo o tula’i mo i latou o lo o molia i lenei mataupu.

TALIA FAAMASINOGA LE TALOSAGA A SE ALII FILIPAINA

Ua talia e le Faamasinoga Maualuga le talosaga na faaulu e le loia o lo o tulai mo se alii Filipaina lea o lo o tuuaia i lona faia o uiga mataga i se teineititi e 4 tausaga, ina ia toe tolopo lana iloiloga sa fuafua e faia i le aso ananafi, ona e le’i tuuina atu e le malo faamaumauga e faatatau i lenei mataupu.

E le o faalauiloa e le Samoa News le suafa o lenei alii ona o puipuiga i lalo o le tulafono mo le teineititi o lo o aafia.

Na faailoa e le loia a le ua molia o Leslie Cardin e faapea, e na te le’i maua faatalatalanoaga sa pu’eina i se ‘video’ ma o le taua o nei faamaumauga e mafai ai ona iloa tonu le tulaga e finauina ai le le nofosala o le ua molia.

Na talia e le alii faamasino le talosaga ma faatulaga ai loa le isi iloiloga o lenei mataupu i le aso 17 o Iuni, 2013 e toe fofogaina ai le ulua’i iloiloga o lenei mataupu.

O le aso 20 Ianuari, 2013 na ripotia ai e le Ofisa o le Social Service a le LBJ lenei mataupu i le Ofisa o Leoleo.  O lo o tumau pea poloaiga a le faamasinoga o lo o tatala ai le ua molia i tua e faatali ai le aso lea ua faatulaga e toe tulai ai i luma o le faamasinoga.

WAYNE PELEIUPU

O le aso 7 o Iuni, 2013 lea ua faatulaga e lau ai le faasalaga a le alii o Wayne Peleiupu i luma o le Faamasinoga Maualuga, ina ua talia e le faamasinoga lana tali ioe i le moliaga na toe teuteu e le malo, o lona fesoasoani i taumafaiga a le isi tagata e gaoi ni meatotino.

Ua ta’utino lenei alii e 18 tausaga e faapea, na la o atu ma lana uo o lo o molia faatasi i laua i lenei mataupu i se faleoloa, ona ia tu lea i fafo e vaavaai ni tagata e o atu, ae alu lana uo i totonu o le faleoloa ma faatino ai le solitulafono o le gaoi.

I faamaumauga a le faamasinoga o lo o taua ai e faapea, na o Peleiupu ma lana uo o Ieremia Cameron i se faleoloa e faatau se la apainu, peitai e le i atoa le tau o le apainu, ma fai ai loa le faatauoloa i le au alii e o i fafo.  Na toe fo’i Cameron i totonu o le faleoloa ma oomi le masini tupe ma ave le ta’i $20 sa i totonu o le masini, a’o savalivali solo le faatauoloa i totonu o le faleoloa.

Na faailoa e le faatauoloa i leoleo, e silia i le $1,000 le tupe na ave e Cameron mai totonu o le masini.

Ua manatu loia e faatali le tuuina atu o ni a laua faafinauga mo se faasalaga o Peleiupu, sei faitau muamua i le ripoti a le Ofisa Nofovaavaaia.

O lo o taofia pea Peleiupu i le toese i Tafuna e faatali ai le aso lea ua faatulaga e lau ai lana faasalaga, ae o le mataupu a Cameron o lo o faagasolo pea i luma o le faamasinoga maualuga i le taimi nei.