Ads by Google Ads by Google

Tala o Fa’amasinoga

TATALA I TUA IOANE LOGOVII MAI LE TOESE

 

O le aso ananafi na toe tatalaina ai i tua mai i le toese i Tafuna ia Ioane “Upuese” Logovii e faatali le lauina o lona faasalaga i le Aso Faraile, ina ua talia e le faamasinoga lana maliliega ua faia ma le malo.

 

Ua tautino Logovii e faapea, sa ia faaaoga se tama’i naifi faamoe e faaoo ai manu’a i lima o le alii na aafia, ma ua ia talitonu foi e sese lana gaioiga sa faia ua mafua ai ona nofosala o ia i luma o le faamasinoga.

 

Ina ua maea se talanoaga puupuu a alii faamasino ma loia e faatatau i lenei mataupu, na faataga mai ai loa e le alii faamasino sili ia Michael Kruse le tatalaina i tua o Logovi’i, i lalo o ni isi foi tuutuuga faapitoa, lea e faasa ai ona ia toe tagofia le ava malosi.

 

E le o se taimi muamua lenei ua tausala ai Logovi’i i luma o le faamasinoga i ni solitulafono.

 

O le tamaitai loia ia Leslie Cardin o lo o tulai mo le ua molia, ae o le tamaitai loia ia Julie Pasquale o lo o tulai mo le malo i lenei mataupu.

 

IOE FILITOGA LAMETA I LE MOLIAGA O LE FAAOOLIMA

 

O le aso 7 o Iuni, 2013 lea ua faatulaga e lau ai le faasalaga o Filitoga Vaimalu Lameta i luma o le Faamasinoga Maualuga, ina ua tausala o ia i le moliaga o le faaoolima i le tulaga tolu lea ua toe teuteu e le malo, atoa ai ma le moliaga o le faatupu vevesi i nofoaga faitele, i lalo o se maliliega ua maea ona sainia ma ua talia foi e le faamasinoga.

 

Ua ioeina e Lameta lona faaoolima ia Michael Saofaga i le aso 30 o Iulai 2012, i se vaega o Pago Pago.

 

Na ulua’i tuuaia Lameta i le moliaga mamafa o le faaoolima i le tulaga lua ma le moliaga mama o le faatupu vevesi i nofoaga faitele, ae i lalo o le maliliega na tuuina atu e le malo i le faamasinoga, sa latou toe suia ai le mamafa o le moliaga muamua ina ia faailoa ai le solitulafono o le faaoolima i le tulaga tolu.

 

E ui o lea ua tausala Lameta i le solitulafono mama, peitai ua poloaina e le alii faamasino sili le Ofisa Nofovaavaaia, ina ia tuu faatasia se ripoti e faailoa atu ai manu’a sa aafia ai le alii o Michael, ina ia silafia e le faamasinoga tulaga uma ia ao lei tuuina atu sana faaiuga.

 

O lo o tumau pea poloaiga o lo o tatala ai Lameta i tua mai le toese e faatali ai le aso lea ua faatulaga e lau ai lona faasalaga. O Lameta, o se alii e 21 tausaga le matua ma o lo o aoga i le Kolisi Tuufaatasi.

 

ILOILO E LE FAAMASINOGA LE TALOSAGA A DRACO WILLIAMS

 

Ua taoto atu nei i se faaiuga a le Faamasinoga Maualuga le talosaga na faaulu e Draco Williams i le vaiaso nei, mo se avanoa e faataga ai e tatala o ia e faigaluega, lea na faaulu e lana loia o Mike White.

 

Na taua e White i le faamasinoga e faapea, o le poloaiga a le faamasinoga sa tuuina atu mo Williams, afai e maea ona tuli le ulua’i ono masina o lona faasalaga faafalepuipui, ona agavaa lea e talosaga mo se poloaiga e tatala ai o ia i tua e alu e faigaluega pe afai e faamaonia o lo o i ai se galuega e mafai ona galue ai o ia.

 

Na faailoa foi e White i luma o le faamasinoga e faapea, ua tusa nei ma le 30 masina talu ona loka Williams i le toese.

 

O lo o taofia pea Williams i le toese i le taimi nei e tuli ai lona faasalaga ina ua ta’usala o ia i moliaga o le umia o pauta faasaina o le aisa i le 2010.

 

FAILA MOLIAGA FAAOPOOPO FAASAGA IA ANDREW FILIPO

 

O le alii lea o lo o tuuaia i lona tu’ia o se ave taxi i le vaiaso na te’a nei, ua molia nei e le malo i le moliaga mama o le faaoolima i le tulaga tolu, atoa ai ma le faatupu vevesi i nofoaga faitele.

 

O le aso ananafi na tulai ai Andrew Filipo i luma o le Faamasinoga Faaitumalo, ma ua toe poloaina o ia ina ia oo atu i luma o le faamasinoga i le aso 13 o Me, 2013, ina ua ia teena tuuaiga a le malo faasaga ia te ia.

 

O tuuaiga faasaga ia Filipo na afua mai i se faalavelave na tulai mai i Tafuna i le lua vaiaso talu ai,  ina ua musu le ave taxi e momoli le latou faatau ma lona toalua ma le la tama i le latou fale.

 

Na faailoa e le ave taxi ia Filipo, e le gafatia e lana taavale le auala e aga’i i le latou fale, ona o le leaga o le auala ae maualalo lana taavale, peitai na avea ma itu na ita ai le ua molia ma ia faaoolima loa i le ave taxi.

 

E tupu lea faalavelave o lo o ‘ona Filipo e pei ona taua i faamaumauga a le faamasinoga.

 

O lo o tumau pea poloaiga a le faamasinoga o lo o tatala ai le ua molia, i lalo o poloaiga e ao ona usita’i i ai, ma o se tasi o ia poloaiga o le faasa lea ona toe taumafai e faafesootai le alii ave taxi na aafia i lenei mataupu.