Ads by Google Ads by Google

Tala o Fa’amasinoga

IOE UTU FEO NA IA SASA LONA ‘NIECE’ I SE PAIPA

O le tina lea na tuuaia i lona faaaoga o se fasi paipa uga e sasa ai lona ‘niece’ ona o le alu ese ma le latou aiga, ua ia tautino i le faamasinoga, e faamaonia tuuaiga faasaga ia te ia.

O Utu Feo na uluai tuuaia e le malo i le moliaga mama o le faaoolima i le tulaga lua ma le faatupu vevesi i nofoaga faitele, peitai o le maliliega lea na ia sainia ma le malo ma talia e le faamasinoga, ua tausala ai o ia i le moliaga o le faaoolima i le tulaga tolu ina ua ia tali ioe i ai, ae solofua le moliaga le moliaga o le faatupu vevesi i nofoaga faitele.

O le masina fou lea ua faamoemoe e lau ai le faasalaga a le ua molia, lea o lo o tumau pea tuutuuga o lo o tatala ai o ia i tua e faatali ai le aso e lau ai lona faasalaga.

MANA’O TAMA FAI E FAATAUNUU SONA FAAMASINOGA AUTU

Ua fa’ailoa e se alii o lo o tuuaia i lona faia o ni uiga mataga i lona afafine fai e 27 tausaga, ia le faataunuuina o lona faamasinoga autu, ina ua valaau lana mataupu i luma o le Faamasinoga Maualuga i le vaiaso ua tuana’i.

O lo o tuuaia e le malo lenei alii i le moliaga mamafa o le tagofia o itutinosa o se tamaitai, ma le moliaga mama o le faaoolima i le tulaga tolu.

O le masina o Aokuso lea ua faatulaga e faia ai le faamasinoga autu a le ua molia, ma o lo o taofia pea o ia i le toese i Tafuna ina ua le mafai ona ia totogi le $10,000 na faatulaga e tatala ai o ia i tua.

IOE IOANE FAIMATA MOLIAGA O LE TALEPE FALE

O le aso 15 o Fepuari lea ua faatulaga e lau ai le faasalaga a le alii o Ioane Faimata, ina ua talia e le faamasinoga lana tali ioe i le moliaga o le talepe fale i le tulaga lua lea ua toe teuteu e le malo ma le gaoi.

O Faimata na tuuaia e le malo i mataupu tau solitulafono e lua, ona o le faalavelave lea na ia osofaia ai se faleoloa i Pava’ia’i ma Faleniu, ma molia ai o ia i le talepe fale i le tulaga lua, atoa ai ma moliaga e lua o le gaoi, ae i lalo o le maliliega na latou sainia ma le malo, na ia tali ioe ai i le moliaga na toe sui e le malo ae solofua isi moliaga na totoe ai.

I le tali ioe a Faimata sa ia tautino ai e faapea, i le taeao sesegi o le aso 16 Me 2012, sa ia talepeina ai le faleoloa o le Pelene’s Store, i le maea ai lea ona o latou fuafuaina ma ni isi o tamaiti o le nuu o lea osofaiga.

Na tautino Faimata e faapea, i lea osofaiga na o latou gaoiina ai ni oloa e pei o meaai, seevae, fagupia ma tupe siliva e tusa ma le $600 le aofai.

Sa ia tautino foi e faapea, o ia na talepeina le isi itu o le faleoloa, ma maua ai le avanoa e ulufale ai i totonu. O mea na alu ma ia e aofia ai le $240.

I se vaega o le maliliega, ua tautino ai Faimata o le a ia toe totogiina atu i le pule o le faleoloa le tau mo mea uma sa latou gaoiina.