Ads by Google Ads by Google

Tala o Fa’amasinoga

TETE’E FETA’I AULEAFE TUUAIGA A LE MALO

Na teena e le alii o Feta’i Auleafe tuuaiga o ona umia faasolitulafono o vaega o fualaau faasaina, ina ua tulai i luma o le Faamasinoga Maualuga i le taeao ananafi, ma ua faatulaga ai le isi ana iloiloga e faia i le aso 11 o Aperila, 2013.

O le masina o Oketopa na fa’aalia ai e Auleafe i luma o le Faamasinoga Faaitumalo lona mana’o ina ia tu’u sa’o lana mataupu i le Faamasinoga Maualuga.  Talu mai lava lea masina, o taofia le ua molia i le toese i Tafuna, ina ua le mafai ona totogia le $50,000 e tatala ai i tua.

O tuuaiga faasaga ia Auleafe na afua mai ina ua maua atu e leoleo ni alii se toafa ma ni tamaitai laiti se toalua, o lo o eva i se fale tuufua i Tafuna.

Na faailoa e se tasi o tamaitai talavou sa i ai, i leoleo e faapea, na alu atu Auleafe ma piki mai o ia ma latou eva ai i totonu o le taavale, e lei umi ae amata loa ona ula le aisa a Auleafe i luma o latou, ina ua maea, sa tuu atu e Auleafe le paipa e ula ai le aisa, ia te ia ma fai atu ia te ia e fai sana miti.

Na taua e tamaitai laiti ia i leoleo e faapea, o le nofoaga foi lea na ula ai a latou aisa i le vaiaso na te’a.

O tamaitai laiti e toalua sa maua faatasi ma Auleafe e 16 ma 17 tausaga le matutua, o lo o nofovaavaaia foi laua i luma o le Faamasinoga Faaitumalo.

TAUTINO PAGOTA E TOALUA NA SOSOLA I TUA MA LE TOESE

Ua faamaonia e alii pagota ia Derek Ropati ma Pouniu Liu, i luma o le Faamasinoga Maualuga, tuuaiga faasaga ia i la’ua, i lo la sosola ma le toese, a’o fai le tatalo a pagota, i le aso 13 o Aperila 2011, a’o tuli a la faasalaga.

I se maliliega na latou sainia ma le malo, ua faatulaga ai loa le aso 11 o Fepuari e lau ai a laua faasalaga i luma o le alii faamasino sili o Michael Kruse, ma alii faamasino lagolago o Logoai Siaki ma Faamausili Pomele.

O le taimi o faigalotu a pagota na tulai mai ai le faalavelave lenei, ina ua faitau atu pagota ua le atoa, ae ina ua pisi leoleo e su’e alii pagota ia e toalua, na faailoa e le isi pagota i leoleo sa ia vaaia Ropati ma Liu o la tosoina i luga le pa uaea o lo o sio ai le falepuipui, ma la tulioso ai i fafo.

O se faamatalaga mai se molimau na tuuina atu i leoleo e faapea, o alii pagota o lo o i ai i le fale o le tuafafine o Ropati, na mafua ai ona agai atu leoleo i lea fale, ma maua atu i ai i laua ua molia ma toe faafoi atu ai i le toese.

Na taua e Ropati i leoleo, na mafua ona sola ona e le lelei meaai o lo o fafaga ai latou e leoleo, ae o Liu na ia faailoa i leoleo e faapea, na mafua ona sola i tua ua le lava tuli lona faasalagai.

MANAOMIA SE RIPOTI MAI LE FALEMAI I LE MATAUPU A EDWIN ATONIO

Ua toe tolopo le fofogaina o le mataupu a le alii o Edwin Atonio i le aso 28 Ianuari, sei faatali le ripoti mai le falemai i tulaga sa i ai manu’a o le alii lea na ia faaoolima i ai, e pei ona tuuaia ai o ia e le malo i le moliaga o le faaoolima i le tulaga lua.

O ananafi na faatulaga e fofoga ai le ulua’i iloiloga a Atonio i luma o le faamasinoga, peitai ina ua valaauina lana mataupu, na talosaga loia i le faamasinoga e toe tolopo le mataupu, ona e lei taunuu atu lava le ripoti a le falemai e faatatau i manu’a na aafia ai le alii na manu’a.

O tuuaiga faasaga ia Atonio na afua mai i le faalavelave lea na ia tu’iina ai foliga o se alii i se ipu ti.

O se inugapia a le ua molia ma le alii na aafia sa faia, ma i’u ina fesili ai loa le ua molia i le alii na aafia i le mafuaaga na ia gaoiina ai lana iPod, peitai na avea lea ma itu na tu’i ai loa e le alii na aafia le ua molia, ma faasaga atu loa le ua molia ma tu’i foliga o le alii na aafia i se ipu ti sa ia uuina.

O lo o taofia pea Atonio i le toese i Tafuna e faatali ai le aso lea ua toe tolopo i ai lana mataupu.