Ads by Google Ads by Google

Tala o Fa’amasinoga

FALEPUIPUI SE ALII FAI FAATOAGA MAI ASIA MO LE 20 MASINA

O le alii mai Asia lea sa galue i se faatoaga i Futiga, ua faasala e le faamasinoga mo le  20 masina, ona o lona faaaoga o se agaese e faaoo ai manu’a i se isi foi alii Asia sa la galulue faatasi.

O le faasalaga faafalepuipui ua tuuina atu i le alii o Qin Sun, o se tasi lea o tuutuuga o lana nofovaavaaia e 5 tausaga.

Na finau le loia a le ua molia o Ruth Risch-Fuatagavi ina ia aua nei toe faaopoopoina le faasalaga o Sun, ae ua lava masina e 14 lea ua oo mai i le taimi nei ua uma ona ia tuliina, ae poloaina loa o ia ina ia toe foi atu i lona atunuu o Saina.

Fai mai Fuatagavi, o lo o galulue malosi tagata Saina i le teritori e faaputu se tupe e totogi ai le pasese e toe faafoi ai le ua molia i lona aiga.

Na taua foi e Fuatagavi i le faamasinoga e faapea, o masina e 14 ia na taofia ai Sun i le falepuipui, sa avea o ni aso pogisa i lona olaga, ona e le malamalama o ia i le gagana faaperetania poo le faa Samoa foi, lona uiga e leai se avanoa e mafai ai ona fesootai atu o ia i leoleo o le falepuipui i soo se mea e manao i ai.

Na finau le loia a le malo o Julie Pasquale i le faamasinoga, ina ia poloai Sun na te totogi le tupe e $4,300 mo le pili o le falema’i a le alii na aafia, peitai na toe finau Fuatagavi e faapea, talu ai e leai ni pepa nofomau a  Sun, e leai se avanoa e mafai ai ona faigaluega ina ia maua ai se tupe e totogi ai le pili o le falema’i.

E 5 tausaga na manatu le faamasinoga e faasala ai Sun i le falepuipui, ina ua tausala o ia i le moliaga o le faaoolima i le tulaga lua, peitai o le a faamalumalu lona tuliina o lea faasalaga, ae ua lava masina e 20 e loka mo’i ai o ia i le toese, lea e aofia ai ma masina e 14 ua uma ona ia tuliina.

A maea ona tuli e Sun masina e 6 o lo o totoe o lona faasalaga, ua poloaina o ia e le faamasinoga ina ia ona tuua le teritori ma toe foi atu i lona atunuu e aumau ai mo le umi o lana nofovaavaaia.

IOE ATIMALALA SA IA TOTO LAAU MARIUANA I LONA FALE

O le alii e 48 tausaga mai Nuuuli lea na maua ai e leoleo ni laau mariuana se 13, o lo o ia toto i tafatafa o lona fale i le tausaga na te’a nei, ua sauni e tuu atu lana faasalaga i le aso 8 Fepuari, ina ua ia ioeina moliaga mamafa e lua sa tuuaia ai o ia e le malo, o lona umia faasolitulafono lea o laau faasaina o mariuana, atoa ai ma lona umia ma le faamoemoe e tulei ma faatau atu i isi tagata.

O le tele lava o mataupu tau solitulafono mamafa e faila e le malo, e faaiu lava i se ofa e tuu atu e le malo i le tagata o lo o molia, peitai i le mataupu a Atimalala, e leai se ofa na tuu atu i ai e le malo, ona e le o se taimi muamua lenei ua molia ai o ia i solitulafono tau i fualaau faasaina.

I le tali ioe ai la o Atimalala i ona moliaga, sa ia tautino ai i luma o le faamasinoga e faapea, o laau mariuana e 13 ia na maua e leoleo o ola i tafatafa o lona fale, o mariuana a ia.

Na mafai ona maua e leoleo ia laau mariuana ina ua agai atu leoleo e faataunuu se poloaiga a le faamasinoga e sailia ai le fale a le ua molia, ina ua masalomia o lo o ia umia laau faasaina, ae maua ai e leoleo ni laau mariuana laiti se 4 o lo o ola faatasi i totonu o se bowl, atoa ai ma isi laau mariuana e 10 sa ola i tafatafa o le fale.

E tai 3 futu le maualuluga o laau mariuana na maua i tafatafa o le fale a le ua molia. O isi mea na maua e leoleo i lea osofaiga e aofia ai ni paipa se lua e faaaoga e ula ai le aisa, o sikaleti mariuana e 6 ua uma ona taai, atoa ai ma lau mariuana lusi sa i totonu o se pepa.

I faamaumauga a le faamasinoga o lo o taua ai e faapea, o le tausaga e 1989 na tausala ai Atimalala i le solitulafono lava foi lea o le umia o laau faasaina, ma o lo o taofia pea o ia i le toese e faatali ai le aso e lau ai lona faasalaga.

TUUAIA TOOTOO SEUMALO I LE SOLA A’O TATALA I TUA E FAIGALUEGA

O le taeao nei lea ua faamoemoe e tulai ai le alii pagota lea o lo o tuuaia na sola i le taimi na tatala ai e faigaluega, ina ua ia faaagafua lona aia e faataunuu ai lana uluai iloiloga i luma o le faamasinoga faaitumalo i le taeao ananafi.

O le vaiaso nei na faila ai e le malo le moliaga e tasi faasaga i le alii o Tootoo Seumalo, i lona sola ese ao tatala ai o ia e faigaluega i le 2011.

O le aso 31 Iuni 2009 na faasala ai e le faamasinoga maualuga le alii o Seumalo e loka i le falepuipui mo le 5 tausaga, ina ua tausala o ia i le solitulafono o lona umia o fualaau faasaina, e mafua mai i se laau mariuana na maua o lo o ola i tua o le umukuka o le aiga sa nofo ai le ua molia i Leone, lea na faamaonia e Seumalo i le faafmasinoga, o le laau mariuana sa maua, o le laau sa ia totoina.

O le aso 1 Iulai 2011 na talia ai Seumalo e alu i tua e faigaluega i le kamupani fau fale o le Three Dimension Construction Company, ao tuli ai pea lona faasalaga i le toese i Tafuna, ma amata galue ai loa o ia i le kamupani faufale lea i le aso 18 Iulai 2011, ae faamuta i le aso 2 o Setema 2011 lea avanoa, ina ua faamaonia lona tagofia fualaau faasaina o le mariuana, i se suega sa faia e le alii leoleo suesue ia Det. Amani Fatuesi.

Ina ua fesiligia e le alii leoleo ia Capt. Paulo Leuma le ua molia e uiga i le mataupu na sola ese ai ao tatala i tua e faigaluega, sa ia faamaonia ai e faapea, ao latou fausia se fale i Pago Pago, sa faataga ai e le pule o le kamupani ia Larry Te’o o ia ma isi alii pagota e toalua, latou te o e asi o latou aiga ona toe fo’i atu ai lea, ae faitalia o ia ma talanoa i le pule o le Falepuipui.

Sa fesiligia e Capt. Leuma alii pagota e toalua ia I’umalo Seiuli ma Maletino Savelio e uiga i le molimau a Seumalo, ma la faamaonia ai e sa’o le faamatalaga a le ua molia.

O se tasi o molimau na fesiligia e Capt. Leuma i le mataupu lenei, o le tuagane o le to’alua a le ua molia, faatasi ai foi ma le to’alua a le ua molia.

Na taua e le tuagane o le toalua a le ua molia i leoleo lona te’i atoa ai ma lona le fiafia, ina ua tu’itu’i atu le ua molia i le faitoto’a o le latou fale i le isi aso, ae o le taimi lea e tatau ai ona i ai o ia i totonu o le falepuipui.

O lona te’i tele na ia fesili ai ia Seumalo poo a ana mea e fai i luma o le fale, ae na tali le ua molia, na tatala atu o ia e lona pule e asi lona aiga.

Na faamaonia e le toalua a le ua molia le molimau a lona tuagane, i le faateia o ia ina ua alu atu le ua molia i le latou fale ae o lo o tuli lona faasalaga.

O le to’afa ai lea o pagota ua molia i le solitulafono lenei o le sosola ese ao tatala ai i latou i tua e faigaluega.