Ads by Google Ads by Google

Tala o Fa’amasinoga

TU’UAIA TAMALOA I LE FAI O UIGA MATAGA I SONA AFAFINE FAI

E tolu moliaga ua tuuaia ai e le malo se alii, i lona faia o ni uiga mataga i lona fafine fai. O le alii ua molia nei e le malo, o le tama fai lea o le tamaitai o lo o aafia i lenei mataupu.

O lo o tuuaia o ia i moliaga mamafa e lua o lona tagofia o itutinosa o se tamaitai i se auala faamalosi, atoa ai ma le moliaga mama e tasi o le faaoolima i le tulaga tolu.

Na fesiligia e leoleo le tamaitai na aafia ma sa ia taua ai e faapea, i le aso 23 o Tesema 2012, na fai atu ai lona tama fai ia te ia e alu atu la te momoe, e faapena foi i le aso 16 Tesema 2012, sa faia ai foi e le ua molia ni isi uiga mataga ia te ia.

Ae ina ua iloa e le ua molia o ia ua ma’itaga, sa ita ma folafola le sele (tulou) o lona fa’ai i le naifi.

O le taeao ananafi na tulai ai le ua molia i luma o le faamasinoga maualuga, ma ia teena ai tuuaiga a le malo faasaga ia te ia.

O lo o taofia pea o ia i le toese e faatali ai le aso 21 Fepuari lea ua faatulaga e toe tulai ai i luma o le faamasinoga, sei vanaga ua totogi le $10,000 ona faatoa mafai lea ona tatala o ia i tua mai le toese.

ERNIE TAO

O le alii talavou lea o lo o tuuaia i le fasiga o lana uo teine i fafo o le fale kalapu o le Bowley Alley i le lua vaiaso talu ai, ua molia nei e le malo i le moliaga mamafa o le faaoolima i le tulaga lua, ma le moliaga mama o le faatupu vevesi i nofoaga faitele.

O le taeao ananafi na tulai ai Ernie Tao i luma o le Faamasinoga Maualuga, ma ia teena ai tuuaiga faasaga ia te ia ma ua faatulaga ai loa lana uluai iloiloga e faia i le aso 21 o Fepuari, ma o lo o taofia pea o ia i le toese i le taimi nei, sei vagana ua totogi le $7,500 ona faatoa mafai lea ona tatala o ia i tua.

I faamaumauga a le faamasinoga o lo o taua ai e faapea, ao fasi e le ua molia lana uo teine, sa lagona atu e ni alii se toalua sa tafafao ai foi i le fale kalapu lava lea le ee mai o le tamaitai na aafia i le fia ola, ma la tulioso atu ai loa ma fasi le ua molia ma manu’a ai ona foliga.

Ina ua uma ona fasi e le au alii ia le ua molia, sa la tulioso i le la taavale ma o ese ae e le’i taunuu atu leoleo.

Na faamatala e le tamaitai na aafia i leoleo e faapea, o le fua o lana uo te ia na mafua ai ona fasi o ia.

JOVIAN TOLOA

Ua poloaina e le Faamasinoga Maualuga le itu a le malo, ina ia oo atu i le Aso Faraile nei, Ianuari 11, 2013, ua taunuu atu i luma o le faamasinoga ripoti a le falema’i e uiga i manu’a na aafia ai le alii lea o lo o tuuaia Jovian Toloa sa faaoolima i ai.

O ananafi na faatulaga ai le ulua’i iloiloga o le mataupu a Toloa, peitai ina ua valaauina lea mataupu, na talosaga le loia a le malo e toe tolopo le mataupu i le masina fou, ona e lei taunuu atu lava le ripoti a le falema’i.

Na vaaia le le fiafia o le alii faamasino sili ia Michael Kruse i le tuai o gaioiga a le malo, aemaise ai foi, o Toloa na ulua’i tula’i i luma o le faamasinoga maualuga ia Novema 2012 ao lenei lava e le’i mautu mai se tulaga o lana mataupu.

O Toloa o lo o tuuaia i le moliaga mamafa e tasi o le faaoolima i le tulaga lua, atoa ai ma moliaga mama e lua o le faatupu vevesi i nofoaga faitele, faapea ai ma lona faia o ni gaioiga e ono lamatia ai le saogalemu o se fanau.

O ia tuuaiga na afua mai i le faalavelave lea na faaaoga ai e Toloa se paipa e osofa’i ai Justin Hall ma ta tu’i ona foliga, a’o taumafai Hall e pupuni le ono aafia atu ai ma si ona afafine e 5 tausaga sa i totonu o le taavale.