TAOFIA PEA POLONE SAVEA MA MATAGI LELILIO I LE TOESE

Ua poloaina e le Faamasino Sili, ia Michael Kruse le Failautusi o le Faamasinoga, ina ia tuuina atu i loia a Polone Savea ma Matagi Lelilio, ia kopi o faaiuga a le faamasinoga sa faia i mataupu i le va o Leota ma le Malo, Leasiolagi ma le Malo faapea Samatua ma le Malo, ma ua ia fautuaina nei loia ina ia toe tuuina atu ni isi talosaga nai lo talosaga ua i luma o le faamasinoga, i le taimi nei.

O le vaiaso na te’a nei na faila ai e loia a Savea ma Lelilio talosaga i le Faamasinoga Maualuga mo le tatalaina o i laua i tua, i le maea ai lea ona tuuina atu e loia o pepa o taavale e oo lo latou tau i le aofai o le tupe lea o lo o faatulaga e totogi ona faatoa mafai lea ona tatala i laua nei i tua.

Peitai, sa le’i sainia pe taliaina e Kruse se pepa o ia talosaga ma e pei ona sa faamanino i loia a Savea ma Lelilio i le Aso Lulu na se’i mavae atu nei, le le mautinoa o le tulaga tonu o i ai taavale ia ua tuuina atu e faamau ai le tatalaina o Savea ma Lelilio i tua ma le toese.

Na saunoa Kruse, afai e $3,000 le tupe ua faatulaga e le faamasinoga e tatala ai se tagata i tua mai i le falepuipui, ae avatu le tau o le ta’avale, e $3,000, ua le talafeagai lea tulaga i le silasila a le faamasinoga.

O le isi faafitauli e pei ona saunoa le alii faamasino sili, o taavale ia o lo o tuuina atu e faamau ai le tatalaina o i laua nei i tua, o taavale tuai uma, ma e le o iloa le mea e tupu i nei taavale i le tausaga fou ao lei oo atu i le aso e faataunuu ai le iloiloga o lenei mataupu, e le iloa foi pe fia le tau e oo atu i le tausaga fou ua faatau ai taavale nei.

I le faaiuga o lenei mataupu, sa fautuaina ai e le faamasinoga loia ina ia toe tuuina atu ni isi talosaga e sili atu ona mautu ma lelei, ma faigofie ai i le faamasinoga ona tuuina atu sana faaiuga talafeagai.

E lua mataupu tau solitulafono mamafa o lo o tuuaia ai e le malo le susuga Savea, ma o le isi mataupu o lo o aafia ai Savea ma Lelilio. I le mataupu e tasi a Savea, e $15,000 le tupe ua faatulaga e totogi ona faatoa mafai lea ona tatala o ia i tua, ae mo Lelilio, e $5,000 ua faatulaga e totogi ona faatoa mafai lea ona tatala o ia i tua.

TETE’E MICHAEL FALANIKO I TUUAIGA

Ua teena e le alii sa tuia se tamaitai ma taumafai e fao faamalosi ana meatotino, ia tuuaiga a le malo faasaga ia te ia, ma ua faatulagaina ai lona ulua’i iloiloga mo le aso 25 o Fepuari.

O Michael Falaniko o lo o tuuaia i le moliaga mamafa o le taumafai e fao faamalosi ni meatotino a se isi tagata i le tulaga lua ma moliaga mama e lua o le gaoi ma le faatupu vevesi i nofoaga faitele.

O ia moliaga na afua mai i le faalavelave lea na tulai mai i le masina na te’a nei i luma o le Tutuila Store i Nuuuli, ina ua ia tu’ia se tamaitai na oso mai i fafo ma lana taavale. Na pau i lalo le tamaitai, ua matapogia, ae o le taimi lea na pisi solo ai lima o le ua molia e autago taga ma le ato a le tamaitai, e pei ona taua e ni molimau sa i ai i leoleo.

Ina ua fesiligia e leoleo le ua molia i le mafuaaga o lona faia o lea gaioiga, sa ia taua ai e faapea, talu ai ua toe fia foi i Utah ae ua leai sana galuega, ua ia le maua foi se tupe, ua manatu o le tamaitai na oso atu i fafo ma le taavale o lo o i ai se tupe ia te ia.

O lo o taofia pea Falaniko i le toese sei vagana ua totogi le $10,000 ona faatoa mafai lea ona tatala i tua.

FAGASA TIPOTI

O le alii faiaoga lea na loka e leoleo ma tuuaia i le ave taavale ‘ona i aso malolo na mavae atu nei, ua molia nei  i le solitulafono mamafa o le ave taavale a’o se’i lona laisene, lea e mafai ona faasala ai se tasi i le toese mo le umi e le silia i le 5 tausaga, ae faamalosia le tuli o le 90 aso i le toese.

E le o le taimi muamua lea ua molia ai Tipoti i le moliaga o le ave taavale ‘ona. E taofia o ia e leoleo i le masina na te’a nei, o lo o se’i e le faamasinoga lana laisene, ona o le solitulafono o le ave taavale ‘ona na ta’usala muamua ai o ia.