LOKA I LE GAOIA O LE $3

Ua molia nei se alii na gaoia se $3 mai i se tamaititi e 14 tausaga le matua i Fagaalu, i moliaga mamafa e tasi o le faomea i le tulaga lua, ma moliaga mama e lua o le gaoi ma le faatupu vevesi i nofoaga faitele.

O moliaga ua tuuaia ai le alii o Kennedy Sasala, na afua mai i le faalavelave lea na tulai mai i le aso tonu o le Kerisimasi na te’a nei i Fagaalu.  Na taua e le tina o le tamaititi na aafia e faapea, na ia tuuina i lana tama le $30 ma le faaupuga, e alu i le faleoloa e faatau mai ai se sipika o lana laau, peitai e le’i umi ona alu atu si ana tama ae toe tamo’e atu i le fale fai mai, ua ave e Sasala lana $3.

Sa fesiligia e leoleo ia le alii 14 tausaga ma ia faamatala ai e faapea, na la fetaui ma Sasala i luga o le auala ma na fesili atu ia te ia pe iai sana tupe e faatau ai sana fagupia.  Ma na faafuasei ona tago atu Sasala i totonu o le taga o lona ofu ma se’i mai le $30 ma ave le $3 ae toe faafo’i le $27.

Na maua atu e leoleo ia Sasala o lo o inupia mai i le paka i Fagaalu, ma ina ua fesiligia o ia e uiga i le mataupu lea, sa ia fai i leoleo e pepelo le alii na aafia, ae ina ua toe fesili leoleo po o i ai se tupe i lana taga, sa tago Sasala i lana taga ma aumai i fafo ta’i $3 e tolu o lo o i ai ma lana tala sa fai i leoleo e faapea, “O le $3 lena a le alii na aafia na ou avea.”

E $10,000 le tupe lea ua faatulaga e totogi ona faatoa mafai lea ona tatala le ua molia i tua mai le toese.

TETE’E FAAFETAI SIAULAIGA I MOLIAGA FAASAGA IA TE IA

Na teena e le alii o Faafetai Siaulaiga moliaga mamafa e lua o lo o tuuaia ai o ia e le malo, ina ua tulai i luma o le Faamasinoga Maualuga i le taeao ananafi.

I lona teena ai o moliaga o le sola ese mai le vaavaaiga a leoleo ma le moliaga o lona faatamala faaletulafono ua mafua ai ona oo le maliu i se isi tagata, ua faatulaga ai loa lana ulua’i iloiloga e faia i le masina fou.

O Siaulaiga na taofia mai e leoleo i le masina na tea nei, ina ua mafai ona faamaonia, o ia e toaono i ai alii na aafia i le faalavelave lea na maliu ai Sio ‘Chico’ Faumui o Iliili i le masina o Iuni 2011.

Ae sa sola ese o ia mai le vaavaaiga a leoleo o le toese, ma toe molia ai o ia e le malo i le moliaga o le sola ese mai leoleo.

E ta’i $15,000 le tupe lea ua faatulaga e le faamasinoga e tatala ai Siaulaiga i tua mo le mataupu e tasi o ana mataupu e lua, e faatalitali ai le aso lea ua faatulaga e toe valaau ai lana mataupu.

POLAGI VAIMOE

O le alii lea e toalima i ai i latou na taofia mai e leoleo i le Aso Kerisimasi na te’a nei i Vaitogi, ona o se misa na tulai mai ai, ua molia nei e le malo i le moliaga mamafa o le faaoolima i le tulaga lua faapea ai ma le moliaga mama o le faatupu vevesi i nofoaga faitele.

O tuuaiga faasaga ia Polagi Vaimoe na afua mai ina ua latou o atu ma ana uo e toalua ma taalo piliaki i se fale piliaki i Vaitogi i le vaveao o le Aso Kerisimasi.

Na matua ova le ‘onana o Vaimoe ma ana uo e toalua i le taimi na latou taunuu ai i le fale piliaki, ma avea ai ma itu na toulu ai i fafo mai le laulau piliaki polo piliaki ma tauau ina leaga atu ai ma le ie o le laulau i le taimi na latou taalo ai.

Na avea ia uiga ma itu na fautuaina ai loa le ua molia ma ana uo e le pule o le fale piliaki ina ia o ese loa, peitai na latou o ma tutu mai i le isi itu o le auala ma laulauvavale agai i le pule o le fale piliaki ma tauai le fale piliaki i maa, lea na misi ma le ulu o le pule o le fale piliaki ae lavea ai le isi alii na alu atu e fesoasoani.

O ananafi na tulai ai Vaimoe i luma o le faamasinoga maualuga, ma ia teena ai tuuaiga faasaga ia te ia. I lona teena ai la o tuuaiga a le malo, ua faatulaga ai loa le aso 25 Fepuari e toe tulai ai i luma o le faamasinoga.

E $10,000 le tupe ua faatulaga e totogi ona faatoa mafai lea ona tatala le ua molia i tua mai le toese.