MOLIA FAAFETAI SIAULAIGA I LE SOLA ESE MA LEOLEO

O le Aso Gafua na te’a nei na faila ai e le malo le moliaga o le sola ese ma leoleo faasaga ia Faafetai Siaulaiga, e faaopoopo i le isi moliaga mamafa na uluai tuuaia ai o ia i le vaiaso na te’a nei.

I faamaumauga a le faamasinoga o lo o taua ai e faapea, ina ua maea ona tulai Siaulaiga i luma o le Faamasinoga Faaitumalo i le aso 24 o Tesema, 2012, sa poloaina ai e le faamasinoga le toe taofia o ia i le falepuipui, sei vagana ua totogi le $15,000 e tatala ai i tua.

Ae na sola ese Siaulaiga mai leoleo o le toese pe tusa o le 3:00 i le aoauli, ma oso i se pasi mai Fagatogo e agai atu i le itu i Sisifo, ae na faatu e leoleo le pasi i Faganeanea, ma fai ai loa a latou tuliga i luga o le mauga.

Ae i le te’a o le 9:00 i le po lava lea, na maua ai e leoleo le ua molia ao tietie atu i se Suzuki lanu mumua a se tagata sa lifi atu ai i Nuuuli.

Sa ta’ua e Siaulaiga, na mafua ona sola ona o le fia fai kerisimasi ma lona aiga.

O le Aso Gafua na tea nei na faamoemoe e faia ai le uluai iloiloga a Siaulaiga i luma o le Faamasinoga Faaitumalo, peitai ina ua valaauina lana mataupu, sa faailoa ai e lana loia fautua o Fainuulelei Alailima-Utu, e mana’o Siaulaiga e faaagafua ana ulua’i iloiloga, ae tuu sa’o atu loa lana mataupu i luma o le faamasinoga maualuga.

O le taeao nei lea ua faamoemoe e toe fa’aauauina ai le mataupu a Siaulaiga i luma o le Faamasinoga Maualuga.

SAUNI MALAELOA FOLASA E TALI IOE I ONA MOLIAGA

O le alii lea o lo o tuuaia i lona taumafai e susunu le pamu kesi a Morris Scanlan Gas Station i Utulei, ua sauni e tali ioe i tuuaiga faasaga ia te ia, ina ua maea ona ia sainia se ofa sa tuuina atu e le malo ia te ia.

O lea ofa o lo o faamauina i se maliliega ua faia e le malo ma le alii o Malaeola Folasa, maea nei ona faila i luma o le faamasinoga. O le aso 14 Ianuari 2013 ua faatulaga e fofogaina ai lea maliliega i luma o le faamasinoga.

O lo o tuuaia e le malo le alii o Folasa i le moliaga o lona taumafai lea e susunu se fale i le tulaga muamua. O lea tuuaiga na afua mai i le faalavelave lea na tulai mai i le aso 27 Setema 2012, ina o atu le ua molia ma ni isi alii i le pamu kesi, ma latou taumafai e save’u le filemu i le va o i latou ma tagata faigaluega, ma i’u ina taumafai ai Folasa e susunu le pamu kesi.

O gaioiga uma a Folasa sa faia i lea aso na mafai ona maua uma i totonu o se masini pu’eata a le pamu kesi, ma ua tuuina atu uma i leoleo mo a latou faamaumauga.

O lo o taofia pea Folasa i le toese i Tafuna i le taimi nei ina ua le mafai ona ia totogiina le $20,000 na faatulaga e le faamasinoga e tatala ai o ia i tua.

MANA’O TALA MALUSEU E FAATAUNUU SONA FAAMASINOGA AUTU

O le alii lea o lo o tuuaia i lona titinaina o lona afafine e tasi le tausaga le matua, atoa ai ma le tia’i so’o o ia i le fale, ua ia talosaga i le faamasinoga e faatulaga se aso e faia ai sana faamasinoga autu.

O le aso 14 o Iulai 2013 lea ua faatulaga e faataunuuina ai le faamasinoga autu a Maluseu, ma e $50,000 le tupe ua faatulaga e le faamasinoga e totogi ona faatoa mafai lea ona tatala o ia i tua.

O lo o tuuaia e le malo Maluseu i moliaga e tolu, e aofia ai le moliaga mamafa e tasi o le faaoolima i le tulaga muamua, ma moliaga mama e lua o le faia o gaioiga e ono lamatia ai le saogalemu o fanau.

O ia tuuaiga na afua mai i se faalavelave na tulai mai i le ogatotonu o le tausaga nei, ina ua logo e se aiga tuaoi le Ofisa o Tautua Lautele ma le Ofisa o Leoleo, i se alualutoto e 23 masina le matua o lo o tia’i na o ia i le fale.

Ina ua taunuu leoleo ma sui o le Ofisa o Tautua Lautele, na latou vaaia ai lenei alualutoto o lo o nofo mai na o ia i luga o le fola o le fale, ae o lona ua ma lona lima o lo o nonoa ai ni taga pepa iila.

Na faailoa e le molimau i leoleo e faapea, e le o se taimi muamua lea ua tia’i ai e le ulugalii lea le la tama teine na o ia i le fale, ma o isi foi taimi la te fasia ai o ia e ala i le po o ona alafau.

TOATOLU I LATOU O LE A MOLIA I LE AVE TAAVALE A’O SE’I A LATOU LAISENE

E toatolu ni alii ua fuafua le malo e molia i le moliaga mamafa o le ave taavale a’o se’i  a latou laisene ave taavale.

O le Aso Tofi o le vaiaso nei lea ua faamoemoe le loia a le malo e faila ai moliaga faaopoopo faasaga ia i latou nei, ina ua maua i latou i poloka a leoleo i le vaiaso talu ai o lo o latou faafoeina taavale a’o se’i a latou laisene.

O i latou ia e aofia ai Mapu Finau ma Kolose Williams, lea e ta’i 6 masina o lo o se’i ai a laua laisene e le faamasinoga, ina ua faamaonia moliaga o le ave taavale ‘ona sa tuuaia ai i latou, peitai na toe taofia e leoleo i laua i le po o le Kerisimasi na te’a nei, o lo o la faafoeina ni taavale a’o la tagofia le ava malosi.

O le isi e toatolu ai i latou nei o Filiga Maiava, lea e 2 tausaga o lo o se’i ai lana laisene ave taavale ina ua faalua ona ta’usala o ia i le moliaga o le ave taavale ‘ona, peitai ina ua toe maua o ia e leoleo i le vaiaso na te’a nei, e le gata o lo o ia faafoeina se taavale ae o lo o ‘ona foi.

Ua maea ona totogi e i latou nei le ta’i $500 sa faatulaga e tatala ai i latou i tua ao faagasolo ai taualumaga o a latou mataupu i luma o le faamasinoga.

O le moliaga o le ave taavale a’o se’i le laisene, o se solitulafono e mafai ona faasala ai se tasi i le toese mo le umi e le silia i le 5 tausaga, ae faamalosia le tuliina o le 90 aso, pe faasala foi i le salatupe e $5,000, poo le faasala foi i faasalaga uma ia e lua.