Ads by Google Ads by Google

Tala o Fa’amasinoga

TOFIA FAINUULELEI AVEA MA LOIA A FAAFETAI SIAULAIGA

Ua tofia e le alii faamasino ia John Ward II le alii loia o Fainuulelei Alailima Utu, e avea ma loia fautua a le alii pagota o Faafetai Siaulaiga, ina ua talia e le Faamasinoga Faaitumalo le talosaga a le Ofisa o Loia Fautuaga mo Tagata Lautele, i le i ai o se fete’enaiga o le latou tauaveina o le mataupu a Siaulaiga, ma mataupu a isi alii e to’atolu o lo o tuuaia  i le mataupu na maliu ai Sio ‘Chico’ Faumui i le tausaga na te’a nei.

Na faailoa e le alii loia o Michael White, e mafua ona i ai se fete’enaiga, ona o lo o atagia i faamaumauga a le malo, o se tasi o le toatolu lea o lo o latou tauaveina lana mataupu i le taimi nei, o lo o fai ma molimau a le malo faasaga ia Siaulaiga.

Na taua e White e faapea, afai ae tuu atu le mataupu a Siaulaiga e faatulaga sona faamasinoga autu, o iina o le a faigata ai i le Ofisa Loia mo Tagata Lautele ona tulai e puipui le le nofosala o i latou uma nei e to’afa, pe afai o le a toe molimau le isi mo le tasi.

O Siaulaiga lea na sola ese mai i leoleo ina ua maea lana faamasinoga i le aso Gafua na te’a nei, ma ua faamoemoe le malo e molia i le moliaga mamafa o le sola ese mai i lalo o le vaavaaiga a leoleo.

FAALUA ONA SOLITULAFONO SE ALII TURISI

O le alii mai Samoa lea na malaga mai i se pemita e 30 aso e asiasi ma faimalologa i aiga i Tutuila nei, na loka e leoleo i le po o le aso Lulu na te’a nei i Aua, ina ua ‘ona ma faatupu vevesi solo i totonu o le nuu ma lona aiga.

O le faalua ai lea ona loka e leoleo le alii o Robert Dobson talu ona taunuu mai i le teritori i le aso 12 Tesema e pei ona taua i faamaumauga a le faamasinoga.

E tolu aso talu ona taunuu Dobson i Amerika Samoa, ae loka e leoleo ma molia e le malo i le moliaga o le faatupu vevesi i nofoaga faitele, ona toe tatala lea i tua e le faamasinoga e aunoa ma se tupe e tatala ai, i lalo o poloaiga e faasa ona ia toe tagofia le ava malosi pe na te toe soli foi se tulafono a le malo.

E 11 aso talu ona maea le tatalaina mai o Dobson i tua ae toe loka mai foi e leoleo i le aso Lulu na te’a nei, ma toe tuuaia i le moliaga o le faatupu vevesi i nofoaga faitele, atoa ai ma le tete’e atu i leoleo ao taumafai e pue faapagota o ia.

I faamaumauga a le faamasinoga o lo o taua ai e faapea, pe tusa o le te’a o le 9:00 i le po o le aso Lulu na te’a nei, na logoina ai e le tina a le ua molia le ofisa mo se fesoasoani, ona o le ua molia o lo o ‘ona ma lu’ilu’i tagata solo i luma o le faleoloa.

Na taunuu leoleo i Aua ma latou vaaia ai ni tagata se toatele o lo o tumu i luma o le faleoloa, atoa ai ma le ua molia ma ni isi o alii o lo o latou tau vevesi. Na taumafai leoleo e loka lima o Dobson peitai sa tafiti ma taumafai e tete’e atu.

Ina ua tulai i le taeao ananafi, e lei toe maua sona avanoa e tatala ai i tua e aunoa ma se tupe, a ua faatulaga e le faamasinoga le $1,000 e totogi, ona faatoa mafai lea ona tatala o ia i tua.

O le taeao nei lea ua faamoemoe e toe valaau ai le mataupu a le ua molia i luma o le faamasinoga.

TETE’E MATAGI LELILIO TUUAIGA MALO

Na teena e le tamaitai o Matagi Lelilio tuuaiga a le malo faasaga ia te ia, ina ua tulai i luma o le faamasinoga maualuga i le taeao ananafi.

I lona teena ai o tuuaiga a le malo, ua faatulaga ai loa lana uluai iloiloga e faia lea i le aso 11 Fepuari, 2013, o le aso lea e iloilo ai e le faamasinoga faafinauga a itu e lua, i le tuuina atu lea o le mataupu e faataunuu sona faamasinoga autu, poo le saini foi lea e le malo ma le ua molia o se maliliega e faamuta ai lenei mataupu.

O Lelilio o lo o tuuaia i lona taumafai lea e totogi tupe se tagata faigaluega a le malo, ina ia mafai ai ona faia ni gaioiga faaalatua.

O lo o tuuaia le tuuina atu e le ua molia o le $600 ia Polone Savea, o se alii ua tele ni tausaga o galue i le Ofisa o Femalagaaiga, mo le faia o ID pepelo a ni tamaitai Saina se toalua, ma o lo o tuuaia faatasi e le malo Lelilio ma Savea i le mataupu lenei.

O lo o taofia pea Lelilio i le toese ina ua le mafai ona ia totogi le $5,000 na faatulaga e tatala ai o ia i tua