GAOI MITIAFU E TOLU MA NANA I TOTONU O LONA OFUVAE

Ua teena e le alii o Uatau Falana’i, lea o lo o molia i lona gaoia o ni mitiafu se tolu mai i le Cost-U-Less i le Aso Gafua o le vaiaso nei, moliaga mama o le gaoi, ina ua tula’i i luma o le Faamasinoga Faaitumalo i le taeao ananafi, ma ua faatulagaina ai le isi ona iloiloga mo le masina fou.

Ua maea ona tatalaina i tua ia Falana’i, i lalo o poloaiga a le faamasinoga, e faasa ai ona ia toe alu i le Cost-U-Less i Tafuna.

I faamaumauga a le faamasinoga, o lo o ta’ua ai le va’aia e se tagata faigaluega a le Cost-U-Less, le nanaina e Falana’i o ni mitiafu se tolu i totonu o lona ofuvae.  Na savali atu i ai le tagata faigaluega a le Cost-U-Less ma ta’ita’i le ua molia i le ofisa o le faleoloa, ma faailoa i le pule, mitiafu sa nanaina e lenei alii.

Ina ua fesiligia e leoleo le ua molia, sa ia taua ai e faapea, na te lei nanaina mitiafu i totonu o lona ofuvae, ae sa tago tuu i lalo o lona aoao.

ITA I LONA TOALUA AE FAALEAGA AI TIOATA O LE FALEOLOA

Na fa’aalia e le alii o Fereti Vaima’a, e 25 tausaga le matua, e faapea, na mafua ona ia tata’e ina le tioata o le faleoloa o le JS i Nu’uuli, ona o lona ita tele i lona toalua, ina ua otegia o ia e lona toalua i lona ‘ona so’o pe a manava atu i le fale.

Ua tuuaia nei Vaima’a i moliaga mama e lua o le faatupu vevesi i nofoaga faitele ma le faaleaga o meatotino, i le tulaga e tolu.

Pe tusa o le te’a o le 7:00 i le afiafi o le Aso To’ona’i na te’a nei, na vili ai e le pule o le JS i Nu’uuli, ia le ofisa a leoleo i Tafuna, ina ua ta’e le tioata pito i luma o le faleoloa, ina ua togi e Vaima’a.  Na taunu’u leoleo i le nofoaga na tupu ai le faalavelave, ma maua atu ai Vaima’a, ma loka mai ai lava.

Na teena e Vaimaa tuuaiga faasaga ia te ia, ma ua toe faatulaga lana mataupu e fofogaina i le masina fou.

O lo o taua foi i faamaumauga a le faamasinoga le ova o le ‘ona o le ua molia i le taimi na taofia ai o ia e leoleo.

TUUAIA SE ALII I LONA FAAOOLIMA I NI LEOLEO

O le alii lea na ia kiki ina le fatafata ma foliga o ni alii leoleo e toalua, ao taumafai leoleo e taofia faapagota i le vaiaso na te’a nei, ua molia nei e le malo i moliaga e lua o le faaoolima i le tulaga e tolu, faatupu vevesi i nofoaga faitele faapea ai ma le tete’e atu i leoleo ao taumafai e loka o ia.

O lenei faalavelave na tulai mai i le Aso To’ona’i, Tesema 22, 2012 ina aga’i atu ni leoleo se to’afitu, i ni taavale leoleo se tolu, i Nu’uuli, e tau fa’ato’afilemu se vevesiga na tula’i mai ai.

O alii leoleo e toatolu ia na muamua i le nofoaga na tulai mai ai le faalavelave, o i latou ia na taumafai e pue faapagota le alii o Vitale Vaima’a faapea ai ma le isi alii o lo o tuuaia faatasi i laua, o Keneti Sinoti, ae o le taimi foi lea na taunuu atu ai loa ma le isi taavale a leoleo o loo o atu ai isi leoleo e toafa ma latou taumafai e fesoasoani.

Ao taumafai leoleo e loka Vaima’a ae sa tafiti solo ma taumafai e aveese ona lima ina ia aua ai nei mafai ona loka, ao faaauau ai ona ia laulauvavale i alii leoleo, ma i’u ai loa i lona kikiina o le fatafata ma foliga o le alii leoleo o PSO. L. Sagapolutele, sosoo atu ai ma lona kikiina o foliga o le alii leoleo o Sgt. Tuufuli.

Na taua i faamaumauga a le faamasinoga le ova o le ‘onana o Sinoti ma Vaima’a i le taimi na taofia faapagota ai i laua.

O le vevesi na tulai mai ina ua tulai mai se fusuaga i le va o Sinoti, Vaima’a ma le isi alii o Tumama Jr Auva’a.

Na teena e Sinoti ma Vaima’a tuuaiga faasaga ia te i laua, ma ua toe tolopo le la mataupu e toe fofogaina i le masina fou.

TETE’E UPUESE LOGOVII I ONA MOLIAGA

Na teena e le alii o Upuese Logovii tuuaiga a le malo faasaga ia te ia ina ua tulai i luma o le faamasinoga maualuga i le taeao ananafi.

O lona teena ai o le moliaga mamafa o le faaoolima i le tulaga lua, atoa ai ma le moliaga mama o le faatupu vevesi i nofoaga faitele, ua faatulaga ai loa le isi ana iloiloga e faia i le masina fou, ma faamautu ai loa le tulaga o le a oo ai lana mataupu, i le tuuina atu lea e faataunuu sona faamasinoga autu, poo le faia foi lea o se maliliega ma le malo ma faamuta ai loa lana mataupu.

O moliaga o lo o tuuaia ai Logovii, na afua mai i le faalavelave lea na ia faaaoga ai se naifi e tui ai le lima ma le vae o se alii i Fagatogo i le lua vaiaso talu ai, ina ua ia masalomia o le alii lea na gaoia mea aoga mai lona fale.

O lo o taofia pea Logovii i le toese ina ua le mafai ona ia totogi le $10,000 na faatulaga e tatala ai o ia i tua.