Tala o Fa’amasinoga
ULUFALE FAAMALOSI SE ALII 16 TAUSAGA I LE FALE O SE AIGA
O le alii 16 tausaga le matua lea na ulufale faamalosi i totonu o le fale o se aiga e aunoa ma se faatanaga i le faaiuga o le vaiaso na tea nei, o lo o taofia i le Falepuipui o Tamaiti i Tafuna i le taimi nei, ona o lo o nofovaavaaia o ia i le isi foi mataupu e pei ona tuuaia ai o ia e le malo.
I faamaumauga a le faamasinoga o lo o taua ai e faapea, na lagona e le tamaitai e ana le fale se tagata o pa’o mai i le latou umukuka ma ia iloa atu ai le ua molia o lo o tu mai ma se naifi, ma valaau mai i se $20.
Na lagona e le tamaitai le fefe peitai sa taumafai e faato’ato’a lona mafaufau, ma ia taumafai e aveese le naifi mai le lima o le ua molia, peitai na taumafai le ua molia e kisi atu ia te ia. O le taimi lava na alu ese ai le ua molia mai le fale, na faafesootai ai loa e le tamaitai lea le Ofisa o Leoleo. Na maua e leoleo ia le ua molia i se fale sa i le taimi o faiga lotu.
Ua tuuaia nei lenei alii i le faatupu vevesi i nofoaga faitele, peitai ua faamoemoe le loia a le malo o Terri Bullinger na te failaina moliaga faaopoopo faasaga i le ua molia i se taimi o le vaiaso nei.
FOLAFOLA LE FASIOTIINA O LANA UO TEINE
O le alii lea na ia fasia lana uo teine ma folafola lona fasiotia o ia, na taofia faapagota e leoleo i le faaiuga o le vaiaso na te’a nei, ma molia i le moliaga o le faatupu vevesi i nofoaga faitele.
E le o mafai ona faalauiloa le suafa o lea alii ona o puipuiga i le ono aafia o le tamaitai o lo o aafia i lenei mataupu.
Ae tusa ai ma faamaumauga a le faamasinoga o lo o taua ai e faapea, i le Aso Sa na te’a nei, Tesema 23 i Alega, na vili ai e le tamaitai na aafia le ofisa o leoleo mo se fesoasoani, ina ua faaauau pea ona fasi e le ua molia o ia.
Na faailoa e le tamaitai na aafia i leoleo, toeitiiti uma le taeao atoa o le aso lea o fasi o ia e le ua molia ma folafola le fasiotia o ia pe afai ae loka o ia e leoleo.
Na faifai tetele le ita o le alii na molia ina ua laulau vavale i luma o le latou fale ma luma o le alatele a le malo.
Ina ua taunuu leoleo, sa talosaga le tamaitai na aafia mo se avanoa e ave ai o ia i le falemai, ona o lo o tiga ona foliga e mafua mai i le fasiga o ia e lana uo tama.
A’o taumafai leoleo e fesiligia le ua molia i le mafuaaga o le faalavelave, sa ia ta tu’i lona ulu i le puipui o le fale ma ia taumafai e faia ni uiga e tau pule ai i lona ola atoa ai ma lana tala, o ia ua fia pule i lona ola.
Ua i luma nei o le Faamasinoga Faaitumalo le mataupu a le ua molia, ma ua toe faatulaga e le faamasinoga le isi aso e toe fofogaina ai lana mataupu.
MAUA NI ALII AOGA SE TOALUA O ‘ONANA I LE AOGA
E toalua ni alii aoga mai le Aoga Maualuga a Fagaitua na maua o ‘onana i le lotoå a le aoga i le Aso Tofi na te’a nei, ma loka loa i le falepuipui o Tamaiti i Tafuna, e faatali ai le valaauina o le la mataupu i luma o le Faamasinoga Faaitumalo.
O i laua ua molia e 17 tausaga le matua o le isi ae 16 tausaga le isi.
Na taua e le loia a le malo ia Terri Bullinger e faapea, e leai ni gaioiga matuia na faia e i laua nei, sei vagana ai lava le ‘onana ma faaumuumu solo i totonu o le aoga.
Ua toe tatalaina nei i laua i tua i lalo o le vaavaaiga a la matua, e faatalitali ai le aso ma le taimi lea o le a toe valaauina ai a laua mataupu.
O lo o tuuaia i laua i le faatupu vevesi i nofoaga faitele ma le tuutuuga, o se taimi o i luma e faila ai e le malo moliaga faaopoopo o le tagofia lea o le ava malosi ae le’i atoa le 21 tausaga.