Tala o Fa’amasinoga
TOFU MATAUPU UPUESE LOGOVII LUMA FAAMASINOGA MAUALUGA
O le taeao nei lea ua faamoemoe e tulai ai Upuese Logovii i luma o le Faamasinoga Maualuga, ina ua le faataunuuina lana ulua’i iloiloga lea na faamoemoe e faia i luma o le alii faamasino o John Ward II i le aso Faraile na te’a nei.
Ina ua fesiligia le ua molia pe manao e faataunuu lana ulua’i iloiloga, sa ia taua ai lona le manao e faataunuu lana uluai iloiloga, ae tuu sao atu loa lana mataupu i luma o le faamasinoga maualuga e faaauau ai.
O lo o tuuaia Logovii i le moliaga mamafa o le faaoolima i le tulaga lua, atoa ai ma le moliaga mama o le faatupu vevesi i nofoaga faitele.
O ia moliaga na afua mai i le faalavelave lea na faaaoga ai e le ua molia se naifi, e tui le lima ma le vae o se alii sa ia masalomia na gaioia ni mea totino mai totonu o lona fale.
O lo o taofia pea Logovii i le toese i Tafuna i le taimi nei, ina ua le mafai ona ia totogi le $10,000 ua faatulaga e tatala ai o ia i tua.
TOLOPO LAUINA FAASALAGA IULIANO TAVALE
O le aso 25 Ianuari 2013 lea ua toe tolopo i ai le lauina o le faasalaga a le alii o Iuliano Tavale, sei faatali e le faamasingoa maualuga ni isi o faamaumauga o lo o taumafai le Ofisa Faanofovaavaaia e tau saili mai mo lenei mataupu.
O le aso Faraile na te’a nei na faatulaga e fofogaina ai le faasalaga a le Faamasinoga mo Tavale, lea o lo o galue o se alii Fuimu i le Vaega Fuimu o le Matagaluega o le Puipuiga o le Saogalemu Lautele.
O Tavale ua ta’usala e le faamasinoga maualuga i le moliaga o lona faatamala faaletulafono ua oo ai le maliu i se isi tagata, ina ua talia e le faamasinoga sa latou maliliega na sainia ma le malo, lea na toe teuteu ai e le malo le moliaga mamafa na ulua’i molia ai o ia, o le fasioti tagata pa’ivalea ma le maliu o se tagata i le taavale sa ia aveina.
Na tautino Tavale i luma o le faamasinoga e faapea, o lona faatamala i le faatinoina o ona tiute mo le saogalemu o lona atalii e tausaga le matua, na mafua ai ona lavea loa ulu i totonu o le taavale, ma o lea manu’a na i’u ina maliu ai o ia.
Sa ia ioeina foi lona faatamala faaletulafono, e ala i le le tuuina atu lea o si ona atalii i le falema’i ina ua manu’a o ia.
O lo o tumau pea poloaiga a le faamasinoga o lo o tatala ai Tavale i tua mai le toese, ao faatali ai le aso lea ua faatulaga e lau ai lona faasalaga.
MAPU LAFOGA
O le vaiaso nei lea ua faamoemoe le malo latou te failaina ai moliaga mamafa faasaga ia Mapu Lafoga, ona o le faalavelave lea na toe maua ai o ia e leoleo o lo o ia faafoe se taavale ae o lo o se’i lona laisene.
O le vaiaso na te’a nei na taofia ai e leoleo se taavale sa le’i usitai i faailoilo o le auala, ma vaaia ai o Lafoga o lo o faafoeina le taavale.
Na fesili leoleo ia Lafoga i lona laisene peitai sa ia faailoa i ai, o lona laisene o lo o taofi e le Faamasinoga, mulimuli ane ina ua faia suesuega na manino ai, o lo o se’i le laisene a Lafoga mo le 6 masina, ina ua ta’usala o ia i le moliaga o le ave taavale ‘ona i le masina o Iulai na te’a nei.
O le moliaga o le ave taavale a’o se’i le laisene, e mafai ona faasalaga ai se tasi i le toese mo le umi e le silia ma le 5 tausaga, ae aofia ai ma le 90 aso lea e faamalosia i lalo o le tulafono ona tuli i le falepuipui, e mafai foi ona faasala i le salatupe e $5,000, poo faasalaga uma ia e lua.