Ads by Google Ads by Google

Tala o Fa’amasinoga

TU’I FOLIGA I LE IPU TI

Ua teena e se alii talavou ona moliaga o le faaoolima i le tulaga tolu, ina ua tula’i i luma o le Fa’amasinoga Faaitumalo i le vaiaso nei, ona o se faalavelave na tula’i mai lea na ia tu’ia ai foliga o seisi alii i se ipu ti.

Ae ua i ai se fuafuaga a le malo, o le a faila ni moliaga faaopoopo e faasaga ia Edwin Atonio.

Ua poloaina nei Atonio ina ia aua nei ona toe taumafai e faafesootai le alii na aafia i lenei mataupu, pe na te toe solia foi se tulafono a le malo, a ia fesootai ma lana loia ma ia auai i taimi e valaau ai lana mataupu.

O le faalavelave na tulai mai i le taimi sa faia ai se inugapia a Atonio ma le alii na aafia, na fesiligia ai e le alii na aafia Atonio e uiga i lana iPod sa ia gaoia.

Fai mai le malo, na muamua tu’i e le alii na aafia ia Atonio, ma faasaga atu ai loa ma Atonio ua tu’i lona mata i le ipu ti.

Na auina atu i le falema’i i Fagaalu le alii na aafia mo togafitiga, ma taofia ai o ia i le potu tigaina ona o le matuia o le o se manu’a sa aafia ai le pito i luga o lona mata taumatau, atoa ai ma isi manu’a e tolu i le pito i lalo.

FAAFEAI ATIMALALA

O le tama e 48 tausaga le matua lea o lo o tuuaia i moliaga e lua o le umia o fualaau faasaina o le mariana, faapea ai le moliaga o le umia ma le faamoemoe e faatau atu i isi tagata, ua toe tolopo lana mataupu i le vaiaso fou ma le tuutuuga a lana loia, e tatau ona oo atu i le aso lea ua maea ona saini se maliliega i le va o lea alii ma le malo.

O ananafi na faatulaga e faia ai le uluai iloiloga o le mataupu a Faafeai Atimalala peitai ua toe tolopo ina ua talia e le alii faamasino is Lyle L. Richmond le talosaga a Atimalala lea na tauala atu i lana loia fautua o Michael White.

Na taua e White i le faamasinoga e faapea, o lo o faagasolo pea talanoaga ma le malo mo se maliliega e faamuta ai lenei mataupu, ma e tatau ona oo atu i le vaiaso fou ua maea ona sainia lea maliliega ma fofogaina loa i le faamasinoga.

O moliaga o lo o tuuaia ai Atimalala na afua mai ina ua osofaia e leoleo lona fale i Nuuuli i lalo o se poloaiga mai le faamasinoga, ma maua ai ni laau mariuana se 14 o lo o ola lauusiusi i tafatafa o lona fale, ma ua ta’i 3 futu le maualuluga o isi laau.

O isi mea na maua i le osofaiga a leoleo e aofia ai paipa e lua e ula ai le aisa, o sikaleti mariuana e 6 atoa ai ma lau mariuana mamago sa taatitia solo ai i le fale.

O lo o taofia pea Atimalala i le toese i Tafuna ina ua le mafai ona ia totogiina le $50,000 sa faatulaga e tatala ai o ia i tua.