Tala o Fa’amasinoga

MOLIA TIMOTE AFUMUI I LE FAAOOLIMA

Na te’ena e Timote Afumui, i luma o le Faamasinoga Faaitumalo, i le aso ananafi, moliaga o le faaoolima i le tulaga tolu, faatupu vevesi i nofoaga faitele ma le faia o se gaioiga e ono lamatia ai le saogalemu o se fanau.

O Afumui na loka mai e leoleo i le faaiuga o le vaiaso, ina ua molia i lona fasia o se tamaititi 11 tausaga ina ua masalomia le faia o se faigauo a lea alii ma lona afafine.

O le mataupu na tofu atu i le ofisa o leoleo i Tafuna i le Aso Faraile na tea nei, ina ua fo’i atu matua o le alii e 11 tausaga ma maua atu o tagi mai i totonu o le potu.  Na su’esu’e e le ulugalii le la tama ma faamatala ai e le tamaititi le vala’au mai o le afafine a Afumui o ia e la te o atu ma lona tausoga e latou te eva, ae peita’i, na tuli ese i la’ua e le afafine matua o le ua molia.

Na faamatala e le tamaititi, na ia vaaia le ua molia, ua savali atu i lo latou fale ma faalogoina se pa’o e foliga mai ua sasa e Afumui, lona afafine, e le’i umi ae toe savali atu Afumui i le fale o le tamaititi ma fesili i lona igoa ma faatonu le tamaititi e alu atu.

Na fesili le ua molia i le tamaititi po o a ana mea sa fai i le latou fale, na tali le tamaititi, sa tafafao ai ma isi o lana fanau teine lea na valaau atu ia te ia e alu atu latou te eva ma tafafao, o le taimi lea na lave ai ma le po a Faumui i le gutu o le tamaititi  ma fai i ai lana folafolaga, “Aua e te toe faia e sau a’u tape oe nei.”

Ua poloaina e le faamasinoga Afumui ina ia aua nei ona toe taumafai e faafesootai le tamaitiiti na aafia po o ni isi o lona aiga, aua foi ne’i ona toe solia se isi tulaono a le malo, a ia fesootai ma lana loia fautua i soo se taimi e valaau ai lana mataupu.

TETE’E TOMA LISI TUUAIGA MALO

O le masina fou ua fuafua e faia ai le ulua’i iloiloga o le alii lea o lo o molia i lona oso i totonu o le potu o se tama’ita’i ma taoto telenoa i luga o lea tamaitai, ina ua ia teena moliaga faasaga ia te ia i luma o le Faamasinoga Maualuga i le taeao ananafi.

O lo o tuuaia Toma Lisi i le moliaga mamafa e tasi o le talepe fale i le tulaga muamua, faapea ai ma moliaga mama e lua o le faaleaga meatotino ma le faaoolima i le tulaga tolu.

O lo o taua i faamaumauga le ‘ona o Lisi i le taimi na tulai mai ai lenei faalavelave i le aso 24 o Novema, 2012.

O lo o taofia pea o ia i le toese e faatali ai le aso e toe tulai ai i luma o le faamasinoga, ina ua le mafai ona totogi le $30,000 sa faatulaga e tatala ai o ia i tua.

TOGI LE FAFINE I LE UILA VILIVAE

O le alii lea na ia fasia si ona toalua i le faaiuga o le vaiaso, ma faai’u ai i lona togi o le fafine i le uila vilivae a lana fanau, ua poloaina e le alii faamasino o John Ward II ina ia aua ne’i ona toe fasia lona toalua pe faia foi ni gaioga tau faamata’u i le fafine ma tamaiti.

O lenei mataupu na tofu atu i le Ofisa o leoleo i le faaiuga o le vaiaso na tea nei, ina ua vili e le fafine leoleo mo se fesoasoani, ina ua faatoa maea ona fasi o ia e lona toalua.

Na faamatala e le fafine i leoleo e faapea, o le vevesi na amata mai ina ua manava atu i le fale ae te’i i le faamisamisa atu o lona toalua, ma iu ai lava ina fasi o ia, u’una’i o ia i fafo ma le fale, ae faai’u i le togi o ia i le uili vili vae.

Na taua foi le lafo e le ua molia o tala mamafa e faatatau i le tama o si fafine ao faalogologo ai lana fanau. Na tu i luga le fafine ma taumafai e savali ese mai le vaega o lo o tupu ai le vevesi, ae na te

Ua poloaina e le faamasinoga le ua molia e aua nei toe alu i lo latou fale i le taimi nei, sei tau faatoafilemu muamua lo la va ma lona toalua ona toe tuuina atu lea o se isi poloaiga a le faamasinoga ia te ia.

FAILA MOLIAGA FAAOPOOPO I LE TINA NA SAUAINA LANA TAMA

O le tina talavou lea o lo o tuuaia i lona sasaina lea o lana tama e 4 tausaga ma manu’a leaga ai lona tino, ua molia e le malo i le moliaga mamafa o le sauaina lea o se fanau e laititi i lalo o le tulafono.

O le taeao ananafi na faila ai e le malo le moliaga faaopoopo faasaga i lenei tina, lea o lo o tumau pea poloaiga a le faamasinoga o lo o tatala ai le tina o lo o tuuaia, e faatali ai le aso lea ua toe tolopo i ai lana faamasinoga.

O lo o tuuaia e le malo le faaaoga e le ua molia o ona lima ma se seevae e sasa ai lana tama, ina ua masaa ai se fagu faamanogi ma leaga ai ni pepa aoga i lo latou aiga.

Comment Here