Ads by Google Ads by Google

Tala o Fa’amasinoga

FAI KIRISIMASI PETITA TOEITIITI I LONA AIGA

Ua manino o le a fai kirisimasi le alii o Petita Toeititi i tua i lona aiga, ina ua lau lona faasalaga i le vaiaso na te’a nei, e na o le 20 masina e loka ai o ia i le falepuipui i Tafuna, ma o lea taimi o le a toese mai ai le 19 masina ma vaiaso e lua lea ua maea ona ia tuliina e oo mai i le taimi nei.

E 5 tausaga na manatu le faamasinoga e faasala ai Toeitiiti i le falepuipui, ina ua tausala o ia i le moliaga o le faaoolima i le tulaga lua, e mafua mai i le faalavelave lea na ia tuiina ai le lima o se isi alii i le lotoa a le Kolisi Tuufaatasi i Malaeimi i le masina o Iuni 2011, peitai na manatu alii faamasino ua lava masina e 20 e loka ai le ua molia ina ua talitonuina ripoti e faatatau ia te ia, o ia o se alii talavou o lo o tele se lumana’i lelei mo ia pe a toe foi e faaauau lana aoga.

Ao lei tuuina mai le faasalaga a le faamasinoga, na faatoese le au molia e tusa ai o le solitulafono sa ia faia, sa ia faatoese foi i le alii na aafia ma lona aiga ina ia faamagalo o ia, ma faaiu ai loa lana faatoesega i lona aiga ina ia alolofa faamagalo o ia.

E le’i manatu le loia a le malo e finau i le faamasinoga mo se faasalaga o Toeitiiti, ae sa manatu e taoto atu lava i se finagalo o le faamasinoga, ae o le loia a le ua molia o Ruth Risch-Fuatagavi, sa ia finau i le faamasinoga ina ia tatala loa le ua molia i tua mai le toese, ua lava le umi lea na loka ai o ia e fai ma ona faasalaga i lenei mataupu.

Na taua e Fuatagavi e faapea, e le masani le olaga o Toeitiiti i le faamisa e pei o le faalavelave lea ua mafua ai ona loka o ia i le falepuipui, e le gata o ia o se alii amio lelei, ao se alii talavou foi o lo o naunau e toe fia foi e faauma lana aoga.

Na molimau foi le uncle a le alii ua molia o Junior Tuiasosopo e faapea, o Petita e faamoemoe i ai lo latou aiga i soo se itu. Sa ia taua e faapea, o uso matutua e toalua a Petita, e pipili le isi ae faamama le toso o le isi, lona uiga, e faamoemoe uma lava ona uso mama’i ia te ia i soo se galuega i totonu o le aiga, o ia foi e tele ina fealua’i i le taavale e momoli ai ona uso mo a la talavai.

Na taua e alii faamasino lo latou talitonuina o faamatalaga uma e faatatau i le olaga o le ua molia, ma ua latou manatu ai loa, ua lava masina e 20 e loka mo’i ai o ia i le toese, ae o le a faanofovaavaaia o ia mo le 5 tausaga i lalo o tuutuuga e ao ona ia usitai i ai.

O ni isi o ia tuutuuga e aofia ai lona totogiina o le $137.40 i le alii sa manu’a, aua ne’i ona toe solia se tulafono, aua ne’i ona toe tagofia le ava malosi poo fualaau faasaina, a ia auai i ni aoaoga faafaufautua e foia ai le ita ma ia avea o ia o se tagatanuu lelei e usitai i tulafono i taimi uma.

TETE’E MIKE ATONIO TUUAIGA MALO

Na teena e Mike Atonia tuuaiga a le malo faasaga ia te ia, ina ua tulai i luma o le faamasinoga maualuga i le vaiaso ua te’a. O lo o tuuaia Atonio i le moliaga mamafa o le faaoolima i le tulaga lua, faapea ai ma le moliaga mama o le faatupu vevesi i nofoaga faitele.

O ia moliaga na afua mai i se faalavelave na tulai mai i luma o le faleoloa o le Family Mart i Nuuuli i le vaiaso na te’a nei, lea o lo o tuuaia ai o ia i lona faaaoga lea o se fagupia e ta ai le ulu o le alii na manu’a.

I faamaumauga a le faamasinoga o lo o taua ai e faapea, e 5 filo na su’i ai le manu’a sa i le ulu o le alii na aafia.

O le faalavelave na tulai mai ina ua savavali atu le alii na manu’a ma lona nephew i luma o le faleoloa, ae ia vaaia ai Atonio o lo o inu mai ma ni isi o alii i tafatafa o le faleoloa, ma ia valaau ai loa ia Atonio e alu atu la te talanoa, ona sa i ai se mataupu sa ia fia talanoa ai ia te ia.

Na te’i le alii na aafia ina ua savali atu Atonio ma ta lona ulu i le fagupia ma mafua ai loa ona manu’a lona ulu.

Ina ua fesiligia e leoleo le ua molia e uiga i le mea sa tupu sa ia taua ai e faapea, ao faia sa latou inuga ma ni isi o ana uo, sa ia vaaia ai le alii na manu’a o lo o ia tatu’iina mai ni isi alii se toalua, ma faaiu ai loa i le alu atu ma fia fusu atu ia te ia ma le isi ana uo.

Na taua e Atonio i leoleo e faapea, sa i ai lona manatu o lo o i ai se fana i le alii na manu’a, ona o le taimi atoa lea na la talanoa ai, e fai lava ana tala ma tago i lona ufovae o lo o i ai, o le mafuaaga lea na oso ai lona fefe ma ia sasaina ai loa lona ulu i le fagupia, ina ua maea, sa alu loa i le atoa i lo latou fale.

Ae ina ua fesiligia e leoleo le alii na manu’a sa ia taua ai e faapea, talu ai e leai se fusipa’u na fusi ai lona ofuvae, o le mafuaaga lea sa fai ma tago ai e tosotoso i luga, ona o le ofuvae e o o. Sa ia faailoa foi i leoleo e faapea, e leai se fana sa ia te ia, e le’i taumafai fo’i e fai ni gaioiga e faafefe ai Atonio.

O lo o taofia pea i le toese Atonio e faatali ai lana uluai iloiloga lea ua faatulaga e faia i le aso 25 Ianuari 2013.

IOE AMA POSIMA SA I AI LANA TA’IFAU FEAI

Na ioe le alii o Ama Posima i luma o le faamasinoga maualuga i le vaiaso na te’a nei, sa i ai sana ta’ifau feai, ma o lana ta’ifau feai lea na osofaia se alii e 12 tausaga le matua ma manu’a ai lona lima.

O Posima na molia e le malo i le moliaga mamafa o le i ai lea ia te ia o se ta’ifau feai, lea e mafai ona faasala ai se tasi i le toese mo le 5 tausaga pe faasala i le salatupe e $5,000, peitai i le maliliega lea sa ia sainia ma le malo ma talia e le faamasinoga maualuga, ua tausala ai o ia i le moliaga mama o le i ai lea ia te ia o se ta’ifau feai, lea e mafai ona faasala ai o ia i le toese mo le tausaga atoa, pe faasala i le salatupe e $1,000.

O lenei faalavelave na tofu atu i le ofisa o leoleo i le aso 22 Iuni2012, ina ua faila e le tina o le tamaititi na ai e le ta’ifau sana tagi i le Ofisa o Leoleo, e faatatau ia Posima ma lana ta’ifau lea na osofaia si ana tama.

I faamaumauga a le faamasinoga o lo o taua ai e faapea, na osofa’i e le ta’ifau le tamaititi ao o atu ma le isi ana uo i le fale o lona uncle i Afono lava, e aumai le taaloga o le X-box. Na faailoa e le tamaititi na aafia i leoleo e faapea, na te lei iloaina le taimi na alu atu ai le ta’ifau ia te ia, peitai na te’i ina ua oso atu le ta’ifau ma u lona lima.

O sui o le Matagaluega o Faatoaga na faatamaiaina le ta’ifau a Posima ina ua faailoa i ai, e le tatau ona i ai pea le ta’ifau ona e ono lamatia ai le saogalemu o tagata.

O nei lea ua faatulaga e toe fofogaina ai lenei mataupu i luma o le faamasinoga, mo le faailoaina atu e le malo i luma o le faamasinoga o le mafuaaga ua ala ai ona latou suia le moliaga mamafa sa tuuaia ai Posima i le moliaga mama.

O lo o fia manino alii faamasino pe sa i ai se gaioiga na faia e le tamaititi na mafua ai ona osofa’i o ia e le ta’ifau, pe o le mea na faafuase’i lava ona oso atu le ta’ifau ma u lona lima.