Ads by Google Ads by Google

Tala o Fa’amasinoga

TATALA I TUA ALII TALAVOU O LO O TUUAIA I LE GAOI MA LE TALEPE FALE

Ua tatala i tua mai le falepuipui a fanau talavou (Juveniles Detention Center) i Tafuna alii laiti e toafa ia o lo o tuuaia i le osofaia o ni faleoloa se lua i Tafuna ma Nuuuli, ae ua tuu atu i lalo o le vaavaaiga a latou matua e faatali ai le aso e toe tutulai ai i i luma o le Faamasinoga Faaitumalo i le Aso Lulu o le vaiaso fou.

Ua tu’uaia i latou i moliaga o le talepe fale ma le gaoi.

O ia moliaga na afua mai ina ua talepe ma gaoia le Sepp’s Warehouse i Tafuna i le masina o Ianuari 2012, sosoo ai ma le faleaiga a le Jade i Nuuuli i le masina o Iulai.

Ua faasaina i latou ona tuua o latou aiga i le va o le 6:00 i le afiafi ma le 6:00 i le taeao, sei vagana ua malaga faatasi ma ni isi o latou matua.

Ua faasa foi ona o latou toe taumafai e faafesootai alii matutua o lo o tuuaia faatasi i latou i lenei mataupu, pe toe tuvae i nofoaga o lo o i ai faleoloa ia na aafia i a latou gaioiga.

O lo o tuuaia faatasi lenei toafa ma ni alii matutua se toatolu, lea o lo o taofia i le toese i Tafuna i le taimi nei, e faatalitali ai taualumaga o a latou mataupu.

SAUNI FAAMASINOGA APILI E FAAFOFOGA MATAUPU O LE PALOTA

O le Aso Faraile o le vaiaso fou, Tesema 7, 2012, ua faatulaga e le Vaega o Faamasinoga Apili o le Faamasinoga Maualuga, e ffofogaina ai faafinauga i le tagi na faaulu e Lucia Bartley ma Esther Wall e faasaga ia Soliai Tuipine Fuimaono ma Vui Florence Saulo.

O lenei tagi o lo o talosagaina ai le faamasinoga ina ia faaleaoga le avea o Vui ma sui tauva o le Itumalo #15 o Tualauta, ona ua talitonu le itu tagi, ua le agavaa ona avea Vui ma sui tauva.

O le itu o le tagi ua faia faasaga ia Soliai, o lo o tuuaia ai o ia, i le le usitaia o tulafono tau i le palota, i lona le fesiligia o ni faamaumauga mai ia Saulo e faamaonia ai lona agavaa e avea ai ma sui tauva.

I le vaiaso na te’a nei na faila ai e Soliai ma Saulo sa la talosaga ina ia solofua tagi a Bartley ma Wall ua tuuina atu i le faamasinoga, e le gata e leai ni mau faamaonia e lagolago ai, ae leai foi se malosi o le Faamasinoga na te iloiloina ai lenei mataupu.

I le faaiuga le tumau o le palota mo le Itumalo #15, na maua ai e le afioga i le alii faipule ia Larry Sanitoa palota pito sili ona maualuga, sosoo ai ma Saulo, mo nofoa e lua i le maota o sui o le Fono Faitulafono.

TEENA FAAMASINOGA MALILIEGA A MISA MA POAMO

Ua teena e le Faamasinoga Maualuga maliliega na sainia e Migo Misa ma Nemaia Poamo ma le malo, faasaga i le mataupu lea na maliu ai Sio ‘Chico’ Faumui i Malaeimi i le masina o Iuni o le tausaga na te’a nei.

Na pau le faaiuga na manatu i ai le faamasinoga, o le faatulaga loa o se aso e faataunuu ai le faamasinoga autu a i laua nei e toalua, peitai na faailoa e le loia a le malo o Mitzie Jessop e faapea, ua maea ona ia tuuina atu i loia a Misa ma Poamo le isi maliliega fou lea e i ai lona talitonuga e talia nei e le faamasinoga.

O Misa, Poamo ma Sefo Siaulaiga, o i latou ia e toatolu o lo o tuuaia i le moliaga o le fasioti tagata i le tulaga lua, peitai i se maliliega sa latou sainia, na manatu ai le malo e tali ioe Misa ma Poamo i le moliaga feololo o le faaoolima i le tulaga lua.

O le aso 8 o Ianuari 2013 o le a faataunuu ai le faamasinoga autu a Siaulaiga, peitai na taua e Jessop i luma o le faamasinoga e faapea, ua maea ona ia talanoa i le loia a Siaulaiga o David Vargas e faatatau i le maliliega fou lea ua ia tuuina atu i loia a isi alii e toalua, ma ua faailoa mai e Vargas o le a talia e Siaulaiga lea foi maliliega.

Na faailoa e loia a Misa ma Poamo o Leslie Cardin ma Michael White e faapea, ua la lagolagoina foi le maliliega fou lea ua maea ona tuuina mai e le malo.

O le taeao nei e toe fa’aauau ai lenei mataupu.

TU’UAIA AUKUSITINO FANENE I LE FA’AOOLIMA

O le faalavelave lea na tulai mai i Pago Pago i le aso 17 o Novema, lea o lo o tuuaia ai le alii o Aukusitino Fanene i lona sasaina o se isi alii i se nofoa, ua mafua ai ona tuuaia o ia i le moliaga mamafa o le faaoolima i le tulaga lua, faatasi ai ma le moliaga mama o le faatupu vevesi i nofoaga faitele.

I faamaumauga a le faamasinoga o lo o taua ai e faapea, e faavalu ona sasa e Fanene le alii na aafia i le nofoa, ma manu’a ai lona tino.

Na teena e Fanene tuuaiga faasaga ia te ia ina ua tulai i luma o le Faamasinoga Maualuga i le taeao ananafi, ma ua faatulaga ai lona ulua’i iloiloga e faia i le aso 11 o Ianuari 2013.

O lo o taofia pea le ua molia i le toese i Tafuna, sei vagana ua totogi le $10,000 ua faatulaga e le faamasinoga ona faatoa mafai lea ona tatala o ia i tua.

O le afioga i le alii faamasino sili lagolago ia Lyle L. Richmond o lo o taulimaina lenei mataupu, i le lagolagosua a afioga i alii faamasino lagolago ia Mamea Sala Jr ma Muasau Tasina Tofili.