Ads by Google Ads by Google

Tala o Fa’amasinoga

MAUA I TOTONU O LE POTU O LO O TELENOA

O se alii na ia sasae le uaea faamalama o le potu a se tamaitai ae oso ai i totonu, tatala ese ona lavalava (tulou) ae taoto telenoa i luga o se tama’ita’i e 14 tausaga le matua, i le po o le Aso Toona’i na te’a nei, ua molia nei i le solitulafono o le faaoolima i le tulaga tolu, faatupu vevesi i nofoaga faitele atoa ai ma le faaleaga meatotino i le tulaga tolu.

Na teena e le alii o lo o molia moliaga faasaga ia te ia, ma o lo o taofia pea o ia i le falepuipui i Tafuna, ina ua manino i faamaumauga a le faamasinoga, ua maea le aoga o le pemita e 30 aso lea na malaga mai ai i le tausaga na te’a nei.

I faamaumauga a le faamasinoga o lo o taua ai e faapea, o le tama’ita’i o lo o aafia e tuaoi ma le ula lea ua molia nei.

Sa eva le ua molia i le fale o le tamaitai na aafia i le po na tulai mai ai le faalavelave, ina ua mae’a, sa toe foi i lo latou fale, peitai i se taimi o le vaveao na faateia ai le teineititi na aafia ina ua ia faalogoina se tagata ua taoto atu i ona luga, ina ua ala i luga sa ia vaaia ai le ua molia o lo o taoto telenoa atu i ona luga.

SAUNI LEALOFI LAULU E TALI IOE I ONA MOLIAGA

O le aso 11 o Ianuari 2013 lea ua faamoemoe le loia a Lealofi Laulu e faila ai i luma o le Faamasinoga Maualuga sa latou maliliega ma le malo.

O ananafi na faatulaga e fofogaina ai le ulua’i iloiloga o lenei mataupu, peitai na talosaga le loia a Laulu mo se avanoa e e faamaea ai talanoaga o se maliliega ma le malo, lea foi na talia e le faamasinoga.

O lo o tuuaia Laulu i le moliaga o le faaoolima i le tulaga lua ma le faatupu vevesi i nofoaga faitele, ona o le faalavelave lea na tulai mai i Leone i ni nai masina e lei mamao atu, lea na ia faaoo ai manu’a i se isi alii e ala i lona sasaina lea o ona foliga i se fagupia.

Na faatonu e le alii na manu’a le ua molia ma ana uo e taofi le latou pisa ao faia sa latou inugapia, lea ua oo i le taimi o le Sa a le nuu, peitai sa le fiafia ai le ua molia ma tulai mai ai loa le faalavelave.

O lo o taofia pea Laulu i le toese i Tafuna ina ua le mafai ona ia totogiina le $5,000 sa faatulaga e tatala ai o ia i tua.

TOE TOLOPO ULUA’I ILOILOGA O I’UMALO SEIULI

O le alii pagota lea ua toe molia i le sola lea ao tatala i tua e faigaluega, ua faamoemoe o le masina o Ianuari e fofogaina ai sa latou maliliega ma le malo e pei ona faailoa e lana loia i luma o le faamasinoga i le taeao ananafi.

O I’umalo Seiuli o lo o tuli sona faasalaga faafalepuipui i Tafuna, ina ua faamaonia moliaga o le umia o vaega o laau faasaina.

O le masina o Setema na toe molia ai o ia e le malo i le moliaga fou o le sola lea ao tatala i tua e faigaluega, ina ua maua ni ripoti sa vaaia o ia i lo latou fale i Nua ma Seetaga.

TOE LOKA FOI FIAFIA MATA’U

O le aso Faraile na te’a nei na toe loka ai le alii o Fiafia Mata’u i le falepuipui i Tafuna, ina ua maua atu e se sui o le Ofisa Faanofovaavaaia o lo o inu sana fagupia i le Faleva’a a le afioaga i Fagatogo.

O Mata’u o lo o nofovaavaaia i luma o le faamasinoga faaitumalo ona o le faalavelave lea na ia tagofia ai itutinosa o se teineititi i le maketi i Fagatogo i le masina na te’a nei.

Sa ‘ona Mata’u i le taimi sa ia faatinoina ai le solitulafono i le maketi i Fagatogo, ma poloaina ai loa o ia e le faamasinoga e aua nei ona toe tagofia le ava malosi.

Ina ua fesiligia e le alii faamasino ia John Ward II le ua molia pe fia ana fagupia sa inu i le aso Faraile, na tali Mata’u, e na o le lua lava ana miti i lana fagupia ae oo atu loa ma le sui o le Ofisa Faanofovaavaaia ma toe loka ai loa o ia i lalo o se tusi saisai mai le Ofisa Faanofovaavaaia.

Na toe tatala i tua Matau i le taeao ananafi i lalo o le fautuaga malosi a le faamasinoga, ia usitai i tuutuuga o lana nofovaavaaia ma aua nei ona toe tagofia le ava malosi.