Ads by Google Ads by Google

Tala o Fa’amasinoga

TETE’E ALI’I PAGOTA TUUAIGA MALO

Na teena e alii pagota o Derek Ropati ma Pouniu Liu moliaga o lo la sosola mai i le to’ese, ma ua faatulaga ai e le Faamasinoga Maualuga o la ulua’i iloiloga e faia i le aso 7 o Ianuari 2013.

O le masina o Aperila 2011 o lo o masalomia na sosola ai Ropati ma Liu ao faia faigalotu a pagota.

O le afiafi lava na sosola ai nei alii, na toe maua atu ai e leoleo i la’ua i le fale o le tuafafine o Ropati.

O Ropati o lo o faafalepuipui i le faalavelave lea na ia fasiotia ai lona uncle, ae o Liu o lo o nofosala i le faalavelave lea na ia taumafai ai e faia ni uiga mataga i se fafine ao i ai ma lana fanau toalua i totonu o le latou potu.

MOLIA FANAU AOGA I LE INUPIA TOTONU LOTOA

E toaono ni alii aoga mai le Aoga Maualuga a Fagaitua na tutulai i luma o le Faamasinoga Faaitumalo i le vaiaso na te’a nei, ina ua maua o lo o faia sa latou inugapia i totonu o le lotoa a le aoga e pei ona taua i faamaumauga a le faamasinoga.

Ua molia uma i latou i le moliaga o le tagofia o le ava malosi a’o le’i atoa le ta’i 21 tausaga le matutua.

Na taua e le loia a le malo o Terri Bullinger e faapea, ua toe tatalaina uma i tua i latou nei i lalo o le vaavaaiga a latou matua, e faatalitali ai taualumaga o a latou mataupu.

FAILA MOLIAGA FAAOPOOPO FAASAGA IA JOVIAN TOLOA

O le Aso Faraile na tea nei na faila ai e le malo moliaga faaopoopo faasaga ia Jovian Toloa, ona o le faalavelave lea na o latou fasia ai ma isi alii se toalua se alii ao i ai lona afafine e 5 tausaga i totonu o le taavale.

E ese mai i le moliaga mama o le faatupu vevesi i nofoaga faitele na uluai tuuaia ai Toloa, o le vaiaso na tea nei na molia ai o ia i le moliaga mama o le faaoolima i le tulaga lua, faapea ai ma lona faia o ni gaioiga e ono lamatia ai le saogalemu o se fanau.

E $5,000 le tupe lea ua faatulaga e le faamasinoga e totogi ona faatoa mafai lea ona tatala Toloa i tua mai le toese, afai ae mafai ona tatala o ia i tua, ua poloaina e le faamasinoga o ia ina ia aua nei toe taumafai e faafesootai le alii o lo o aafia i lenei mataupu i soo se auala.

O taeao lea ua faamoemoe e toe tulai ai Toloa i luma o le faamasinoga, mo le faatulagaina o le aso e faia ai le uluai iloiloga o lana mataupu.