FASI E NI ALII TOATOLU SE TAMALOA I TOTONU O LANA TAAVALE, A’O I AI SONA AFAFINE

Na fiu se alii e alaga alofa ona o si ona afafine sa i totonu o le taavale, ae sa le’i tu’ua ai le fasia faamo’amo’a o ia e Jovian Toloa, Nisani Euini ma se alii talavou.

Ua molia nei Toloa, Euini ma le alii talavou i le faatupu faalavelave i nofoaga faitele faapea le faaoolima i le tulaga e tolu, ae ua manatu le malo o le a toe faaopoopo i ai ma ni isi moliaga mamafa i nei alii.

E tusa ai ma faamaumauga a le malo, o le ua a’afia e sau mai Alofau ma sa fai se la faatauga ma lona afafine e lima tausaga i Fagaalu, ina ua talosagaina o ia e se tasi o ana uo tamaitai, e fia momoli o ia i lona aiga i Malaeloa.

O lo o masalomia le taunuu o le faigamalaga i Lepuapua, ae faatu e le tamaitai le taavale i luma o se faleoloa ma ina ua oso i fafo le tamaitai, na faateia le tamaloa ina ua valaau atu le tamaitai e alu loa lana taavale, ina ua vaaia e le tamaitai le agai mai o lona tuagane, tausoga ma le tama o lana pepe.

O lo o masalomia le taina o foliga o le tamaloa e Toloa i se paipa (PVC) ma aafia ai fofoga o lenei alii.

Na ta’ua le augani atu o le ua a’afia ia Toloa o lona afafine o lo o i totonu o le taavale, ae sa le’i amanaia e Toloa.

O lo o ta’ua i faamaumauga le mafai ona se’i ese e le tamaloa o le paipa mai ia Toloa ma ia togi i totonu i tua o lana taavale ma taumafai e taofi i lalo lona afafine ina ia saogalemu.  O lo o ta’ua foi i faamaumauga a le faamasinoga e faapea, e ui i le aueaue leotele o le teineititi sa i tua o le taavale, ae sa le’i faavaivai ai le osofaiga a nei alii e toatolu.

O lo o masalomia le tu’iina e le alii talavou o le faamalama i le pito i tua o le taavale ma ta’e ai, ma na maua ni fasi fa’ata i le lauulu ma ofu o le teineititi sa i tua o le taavale.

I nei tauiviga i le taimi atoa, lea foi na taumafai le tamaitai e ana le tuagane, tausoga ma le uo tama, e fesoasoani i si tamaloa ma lona afafine, na i’u ina mafai ona toe solomuli le taavale ma o ese atu ai loa le tamaloa ma si ona afafine, ma faasasa’o atu lava i le ofisa a leoleo i Tafuna.

O lo o taofia nei Toloa i le to’ese i Tafuna seia ona totogia le $2,000 e tatala ai i tua, ae o Euini ma le alii talavou, o lo o teena e le faamasinoga le faatulagaina o se vaegatupe e mafai ona atala mai ai i la’ua i tua.

TOLOPO MATAUPU ALII GAOI MA LE TALEPE FALE

O le aso 5 Tesema lea ua toe tolopo i ai e le Faamasinoga Faaitumalo le mataupu a alii talavou e toafa ia o lo o tuuaia i le gaoi ma le talepe fale, ina ua talia e le faamasinoga talosaga a loia mose isi taimi faaopoopo e faaauau ai a latou suesuega.

O lo o taofia nei alii i le falepuipui a fanau talavou ma o lo o tuuaia faatasi ma ni alii matutua se toatolu, i le osofaia o le faleaiga a le Jade i Nuuuli, ma le Sepp’s Warehouse i Tafuna.

O le aso 5 o Tesema ua faamoemoe le malo e o’o atu i ai ua maua se maliliega mo le faamuta o lenei mataupu.

Ua faamoemoe le malo e tatau ona oo atu i le aso 5 Tesema ua maua se maliliega i lo latou va ma loia a i latou o lo o molia, ma faamuta ai loa lenei mataupu.

O le isi toalua o le toafa lea ua molia nei o lo o nofovaavaaia i laua i luma o le faamasinoga faaitumalo, ona o isi foi mataupu tau solitulafono sa molia muamua ai i laua e le malo.

STERLIN FUGA

O le taeao nei e toe tula’i ai i luma o le faamasinoga ia Sterlin Fuga, lea o lo o tuuaia i le faaoolima i le tulaga tolu.  Ua talosagaina e lana loia se avanoa, e faia ai se iloiloga faapitoa i lona mafaufau, ona o lo o masalomia e aafia o ia i le gasegase o le mafaufau.

Na faailoa e le itu a le malo i luma o le faamasinoga i le vaiaso nei, o le a leai ni moliaga faaopoopo e toe faila faasaga ia Fuga.

O lo o tuuaia Fuga i lona tago i se tamaitai, ao la nonofo faatasi  i luga o le pasi na la malaga mai ai i Leone e agai atu i le taulaga, atoa ai ma lona faia o ni faamatalaga na mafua ai ona fefe lea tamaitai.

Ua tapaina e le faamasinoga ia faamaumauga a lenei alii mai i le falemai mo se faaiuga pe manaomia ni isi iloiloga faaopoopo.

O lo o taofia pea le ua molia i le toese i Tafuna, sei vagana ua totogi le $300 ona faatoa mafai lea ona tatala o ia i tua.

REUPENA REUPENA

O le masina fou lea ua faatulaga e faataunuu ai le ulua’i iloiloga o le mataupu i le va o Reupena Reupena ma le malo, ina ua teena e le ua molia o tuuaiga faasaga ia te ia i le aso Lulu na te’a nei.

O lo o tuuaia Reupena i moliaga o le gaoi ma lona faaaoga faagaoi o se ATM card, e tala mai ai se tupe.

O le ATM card na leiloa mai i totonu o le ato a le tamaitai o lo o tagi, ao i ai o ia i le Ofisa o le Aoga Maualuga a Leone i le masina o Aokuso o le tausaga nei.

E $7,500 le tupe lea ua faatulaga e totogi ona faatoa mafai lea ona tatala le ua molia i tua, e faatalitali ai taualumaga o lana mataupu i luma o le faamasinoga maualuga.