Ads by Google Ads by Google

Tala o Fa’amasinoga

TETE’E TA’AGA TAVALE I TU’UAIGA MALO

O le aso 12 o Tesema lea ua faatulaga e fofogaina ai le ulua’i iloiloga o le mataupu faasaga ia Ta’aga Tavale, ina ua ia teena tuuaiga a le malo faasaga ia te ia i luma o le Faamasinoga Maualuga i le taeao ananafi.

O lo o tuuaia Tavale i le moliaga mamafa e tasi o le talepe fale i le tulaga muamua, atoa ai ma moliaga mama e fa o le tu fua i le fanua o se isi tagata, taofia faapagota o se tagata i se auala faasolitulafono, faaoolima i le tulaga tolu, faapea ai ma le faatupu vevesi i nofoaga faitele.

O ia moliaga na afua mai i se faalavelave na tulai mai i le amataga o le masina nei i Fitiuta i Manu’a, lea o lo o masalomia ai le ulufale o Tavale i le faleoloa ma taumafai e titina le fafine faatauoloa, a’o taoto i luga o lona moega.

Na taua e le tina i leoleo e faapea, e faalua ona gaoia e le ua molia lona faleoloa, peitai sa musu e faailoa i leoleo, ona o lona manatu i lo latou va i totonu o le nuu.

O lo o taofia pea Tavale i le toese i Tafuna ina ua le mafai ona ia totogia le $35,000 sa faatulaga e le faamasinoga e tatala ai o ia, e faatalitali ai le aso lea ua faamoemoe e toe tulai ai i luma o le faamasinoga.

FAATALI SE FAAIUGA I LE TALOSAGA A PATI LEPOU

Ua taoto atu nei i se faaiuga a le Faamasinoga Maualuga le talosaga lea na faaulu e le alii o Pati Lepou, po o Vatoi Ching Sam, tauala atu i lana loia o Mark Ude, mo se avanoa e faaauau ai le talosaga apili e faasaga i le faaiuga a le faamasinoga.

O Lepou o lo o tuli sona faasalaga faafalepuipui e 20 tausaga le toese i Tafuna i le taimi nei, ina ua tausala o ia i moliaga mamafa e tolu e aofia ai le faomea i le tulaga muamua, faaoolima i le tulaga muamua, ma le sola mai le falepuipui.

Na taua e Ude i luma o le faamasinoga i le taeao ananafi, talu ai o lo o taofia Lepou i le toese i Tafuna, o lo o faafaigata ai se la fesootaiga.

E lei faatuiese le loia a le malo o Cecilia Reyna i le talosaga a le ua molia.

KATERINA SILIGA

O ananafi na faamoemoe e faalauiloa ai le maliliega lea ua maea ona saini e Katerina Siliga ma le malo mai le ulua’i mataupu lea o lo o tuuaia ai o ia, peitai na talosaga lana loia e toe tolopo lea tulaga seia aulia le aso 17 Tesema, o le aso lea o lo o fuafua e tulai ai foi mo lana mataupu lona tolu.

Na taua e Kimberly Hyde e faapea, e tolu mataupu eseese o lo o tuuaia ai Siliga, ma ua manatu le malo e tuu faatasi nei mataupu i totonu o se maliliega se tasi.

O le ulua’i mataupu o lo o tuuaia ai Siliga, na afua mai i se mataupu na ia faaaoga ai tupe sa totogi atu e ona uso mo le inisiua a latou matua o lo o aumau i Savaii, a’o galue Siliga i le kamupani a le South Seas Insurance.

O le masina o Novema 2011 na amata totogi ai e uso o le ua molia le tupe mo le Inisiua a latou matua, peitai ina ua latou fesiligia le Kamupani Inisiua i le masina o Aokuso o le tausaga nei e uiga i le Inisiua a latou matua, sa faailoa atu i ai e le Kamupani e le o i ai ni faamaumauga a le Ofisa e faatatau i se Inisiua a o latou matua.

O lea mataupu o lo o tuuaia ai o ia i le moliaga mamafa o lona faaaoga faasolitulafono lea o ni tupe sa tuuina atu i lalo o lana vaavaaiga.

O le mataupu lona lua o lo o tuuaia ai foi le ua molia i lona faaaoga faasolitulafono lea o tupe sa tuuina atu i lalo o lana vaavaaiga, ina ua tuu atu e ana uo ia te ia le $900 e totogi ai a laua pasese (k-fares) i le kamupani vaalele a le Hawaiian Air, peitai na fiu ana uo e faatali a la tickets e leai se mea na maua.

Ua maea ona toe totogi e le ua molia le $700, toe $200 o lo o totoe.

O le mataupu lona tolu lea na faila e le malo i le vaiaso na te’a nei, o lo o tuuaia ai foi o ia i le moliaga o lona faaaoga faasolitulafono o ni tupe sa tuuina atu i lalo o lana vaavaaia.

O lea moliaga na afua mai i le Life Insurance sa totogi e se alii mo lona tama aga’i ia Siliga, ao galue o ia i le kamupani a le South Seas Insurance, amata mai le masina o Me 2011 e oo mai ia Aokuso 2012, peitai ina ua alu le alii o lo o tagi e talosaga le Inisiua a lona tama na maliu ia Me o le tausaga nei, na faailoa i ai e se sui o le Kamupani, e le o i ai ni faamaumauga o se Inisiua a lona tama i faila a le latou Ofisa.

O lo o taofia pea Siliga i le toese i Tafuna e faatali ai le aso lea ua faamoemoe e toe tulai ai i luma o le faamasinoga