TOLOPO MATAUPU SENIO MAFUA

Ua avea le fesuia’i o loia a le malo i le mataupu o lo o tuuaia ai Sopi Senio ma auala ua toe tolopo ai lana faamasinoga autu na fuafua e faia i le vaiaso fou, e faataunuuina i le masina o Mati 2013.

Ina ua toe fofogaina le mataupu a Senio i le vaiaso fou, na faailoa ai e le loia a le malo ia Kimberly Hyde e faapea, talu ai ua malaga i fafo le loia sa tula’i mo le malo i le mataupu lenei, e manaomia le toe tolopo o le faamasinoga autu lea ua faamoemoe e faia i le vaiaso fou, ina ia lava se taimi na te iloiloina ai faamaumauga uma e uiga i lenei mataupu.

Na talia e le alii faamasino sili lagolago ia Lyle L. Richmond le talosaga a le malo, ona o le taimi foi lea na fuafua ai e malaga i fafo.

O Senio o lo o tuuaia i le moliaga o le faaoolima i le tulaga lua ma le faatupu vevesi i nofoaga faitele, e mafua mai i se faalavelave na tula’i mai i le masina o Tesema 2011 i Leone, ina ua ia so’aina le isi tamaloa i lana taavale ona o se feeseeseaiga i fanua.

O lo o tumau pea poloaiga o lo o tatala ai Senio i tua ina ua ia totogi le $25,000 sa faatulaga e le faamasinoga e faatalitali ai le aso o lona faamasinoga autu.

TATALA I TUA LE AU ALII O LO O TUUAIA I LE GAOI MA LE TALEPE FALE

 O alii laiti e to’atolu ia na taofia e leoleo i le amataga o le vaiaso ma tu’uaia i moliaga o le gaoi ma le talepe fale, ua tatalaina nei i tua e le faamasinoga i lalo o le vaavaaiga a latou matua, e faatalitali ai le aso e toe tutula’i ai i  i luma o le Faamasinoga Faaitumalo.

E le o mafai ona faalauiloa suafa o alii nei e toatolu ona e laiti o latou tausaga i lalo o le tulafono.

Na taua e le loia a le malo o Terri Bullinger e faapea, o ni isi o itu lelei na mafua ai ona talia e le faamasinoga le talosaga e tatala i latou nei i lalo o le vaavaaiga a latou matua, ona faatoa tuuaia lea o i latou i ni solitulafono, ae o lo o lelei foi o latou togi i le aoga faapea ai ma faamaumauga i talaaga o latou olaga.

Fai mai le tamaitai loia, e foliga mai na aafia i latou nei i lenei solitulafono ona o le sese o le nofoaga sa i ai, aemaise ai o le fetosoaina i manatu ma tonu a latou uo.

O ni isi o tuutuuga ua tatala ai i latou nei i tua i le maea ai ona taofia o i latou i le toese i po e 3, e aofia ai le faasa lea ona o latou toe tuua le fale amata atu i le 6:00 i le afiafi seia oo i le 6:00 i le taeao, sei vagana ua latou malaga faatasi ma se tasi o latou matua.

Ua faasa ona latou toe o i le nofoaga o lo o i ai le faleoloa na aafia, aua nei toe misi ni aso i le aoga pe toe taumafai foi e faafesootai le pule o le faleoloa, poo isi a latou uo o lo o tuuaia faatasi i latou i lenei mataupu.

O le vaiaso fou lea ua faamoemoe e toe valaauina ai le mataupu a i latou nei i luma o le alii faamasino o John L. Ward II.

E toa 2 alii matutua o lo o molia faatasi ma le au alii laiti ia e toatolu i le talepeina ma le ave faagaoiina o oloa mai se faleoloa i Tafuna i le masina na tea nei.

O lea mataupu na faailoa e se molimau i leoleo, ina ua ia faalogoina se pao e sau mai le nofoaga o lo o i ai le faleoloa na aafia, e lei umi ae vaaia loa e le molimau ni alii se toalua o lo o latou la’uina mai ni atigipusa mai le fale teuoloa o le faleoloa ma faatupu i lalo o se laau e latalata ane i le nofoaga sa tupu ai le faalavelave.

O ni isi o oloa na gaoia mai i le faleoloa na aafia e aofia ai pusa saimini, pepa meaai, o pauta ma vailaau e tata ai lavalava.

MERLIN ULI

Ua i ai le faamoemoe o le faamasinoga maualuga, e tatau ona oo atu i le masina fou lea ua toe tolopo le mataupu a Merlin Uli, ua i ai sa latou maliliega ma le malo e faamuta ai tuuaiga fou faasaga ia te ia.

Ina ua valaauina le mataupu a Uli i le vaiasoa na te’a nei, sa talosagaina e lana loia fautua le toe tolopo lenei mataupu seia aulia le masina fou, ina ia lava ai se taimi e faaauau ai talanoaga ma feutanaiga e faamuta ai lenei mataupu.

O Merlin o lo o tuuaia i le moliaga o le sola ese ao tatala i tua e faigaluega, a’o tuli sona faasalaga faafalepuipui i le toese i Tafuna.

O tuutuuga o le tatalaina ai o Merlin i tua e faigaluega, e faasa ona alu i se isi lava nofoaga, sei vagana ai le tatala sa’o mai lava o ia mai le toese i Tafuna, ma alu sa’o loa i le nofoaga sa faigaluega ai i le 3M Burger.

O Merlin o lo o tuli faatasi ma lona uso masaga o Marlon a la faasalaga faafalepuipui e tai 10 tausaga, ina ua faamaonia moliaga o le umia o fualaau faasaina sa tuuaia ai i laua e le malo.

O lo o taofia pea Uli i le toese i Tafuna mo le tuliina o lana faasalaga faafalepuipui, e faatalitali ai le aso lea ua toe tolopo i ai lana mataupu.