FA’ATONU SE ALII PAGOTA TOE FO’I LONA ATUNUU PE A MAGALO

O le alii mai Samoa lea o lo o tuli sona faasalaga faafalepuipui e 5 tausaga, ina ua ta’uasala i le umia faasolitulafono o ni vaega o le laau faasaina o le mariuana, ua faatonu e le faamasinoga i le vaiaso nei, e tuua le teritori pe a magalo mai i le falepuipui.

Ao taofia Iumalo Seiuli i le falepuipui, sa maua le avanoa e tatala ai o ia i tua e alu e faigaluega i se konekarate fau fale ma toe foi e tuli faauma lona faasalaga, ae na alu asi lona toalua ma lona aiga i lo latou aiga i Seetaga, ma toe molia ai loa o ia e le malo i lona sola ese ao tatala i tua e faigaluega, ma o le vaiaso na tea nei na lauina ai lona faasalaga i le solitulafono fou lea.

Na finau le loia a Seiuli e faapea, e leai se matuia o le gaioiga sa faia e le ua molia, o le alu e asi lona aiga, ona sa faataga o ia e le pule o le konekarate sa galue ai.

Fai mai foi lana loia, ana faapea na sola ese Seiuli ao taofia ai i le falepuipui, atonu ua sili atu le matuia o lea gaioiga.

E 5 tausaga tausaga na manatu le faamasinoga e faasala ai Seiuli i le moliaga fou, peitai ua manatu le faamasinoga e faamalumalu lea faasalaga, ae ua lava masina e 20 e taofia sao ai o ia i le toese i Tafuna.

Ua poloaina e le faamasinoga le malo ina ia saili le sponsor a Seiuli e totogi lona pasese e toe foi atu ai, ae afai e le maua le sponsor, ona faaaoga lea o se tupe a le malo e totogi ai lona pasese.

FAIGALUEGA PO’O LE FALEPUIPUI

Ua tuuina atu nei e le faamasinoga maualuga i le alii talavou o Ulima Kerupi le avanoa e saili ai sana galuega tumau i totonu o le 30 aso, a leai, o le taofia pea o ia i le toese i Tafuna e tuli ai sona faasalaga.

O le vaiaso na te’a nei na lau ai le faasalaga a le alii o Urima i luma o le faamasinoga, ina ua tausala o ia i le solitulafono o lona talia o ni oloa sa ave faagaoi e ni isi tagata, ae solofua ai isi moliaga mamafa e lua o le talepe fale i le tulaga muamua ma le gaoi.

O moliaga faasaga ia Urima na afua mai i se faalavelave na tulai mai i le masina o Me o le tausaga na tea nei, ina ua latou osofaia ma ni isi alii se faleoloa, ae na laki Urima, ona e le’i ulufale i totonu o le faleoloa, ae na’o le taliaina o oloa sa gaoia e ni isi.

Na finau le loia a le malo o Julie Pasquale ina ia poloai Urima e toe totogi le tupe mo oloa sa ia taliaina.

Ua silia ma le 5 masina talu ona taofia Urima i le toese i Tafuna.

FINAU E JAMES BARLOW LANA MATAUPU FAAMASINOGA ILOILOGA

Ua manatu le alii sa avea muamua ma faiaoga i le Kolisi Tuufaatasi a le malo, o le a ia finauina lana mataupu e ala i le faatulagaina lea o se aso e faia ai lana faamasinoga autu i luma o tagatanuu o Amerika Samoa, ina ia faatumauina ai pea lona le nofosala i tuuaiga a le malo faasaga ia te ia.

O le aso 18 Novema o le tausaga nei lea ua faatulaga e faia ai le faamasinoga autu e uiga i lenei mataupu.

O le vaiaso na te’a nei na toe tulai ai Barlow i luma o le faamasinoga, ona o se talosaga na faila e lana loia o Mark Ude, e talosagaina ai le faamasinoga ina ia faasala le malo, i lo latou le tuuina atu lea o faamaumauga sa ia talosagaina e faatatau i lenei mataupu, peitai na faailoa e le loia a le malo o Mitzie Folau i le faamasinoga e faapea, ua uma ona ia tuuina atu ia Ude faamaumauga o lo o ia manaomia e ala i se imeli sa ia tuuina atu i le tausaga na te’a nei.

E lei i ai se faaiuga a le faamasinoga e tusa ai o le talosaga a Ude, peitai na saunoa le alii faamasino sili ia Michael Kruse, o le a faia se isi iloiloga e faatatau i le talosaga a Ude ao lumana’i ai le aso o le faamasinoga autu o lenei mataupu.

O le alii o James Barlow lea o lo o taofia pea i le toese i Tafuna ina ua le mafai ona ia totogiina le $100,000 sa faatulaga e le faamasinoga, o lo o tuuaia i moliaga e 3 o lona faia o uiga faasotoma i fanau laiti; 3 moliaga o le faaoolima mataga; 2 moliaga o le tagofia o itutinosa o ni tama aoga talavou; 3 moliaga o le faamatamata o tama aoga talavou i ata leaga; 3 moliaga o lona tuuina atu o ava malosi i fanau talavou; 3 moliaga o le faia o gaioiga e lamatia ai le saogalemu o fanau laiti; ave taavale ‘ona; ave taavale faatamala; atoa ai ma le leai o se laisene ave taavale sa ia te ia ina ua taofia o ia e leoleo.

O tuuaiga faasaga ia Barlow na afua mai i le faalavelave lea na tulai mai i le aso 25 Oketopa 2011 i Fogagogo, ina ua taofi e leoleo le taavale a le ua molia ina ua masalomia le fealua’i ‘ona, ae maua ai i totonu o le taavale alii aoga laiti e toatolu o lo o ‘onana uma.

Na faamatala e tamaiti aoga i leoleo e faapea, sa faia sa latou fiafia (party) i le fale o le alii ua molia i Fogagogo, ma matamata ai a latou ata leaga toe inu ai foi ma latou pia, ina ua mae’a, sa faia loa e le ua molia uiga mataga ia te i latou.