TEENA E LE FAAMASINOGA MALILIEGA

O le taeao ananafi na tuuina mai ai le faaiuga a le faamasinoga maualuga, e teena ai le maliliega lea na sainia e le malo ma alii e toatolu o lo o tuuaia i lo latou faia o ni uiga mataga i se teineititi e 16 tausaga le matua.

O le lua vaiaso talu ai na faila ai lenei maliliega i luma o le faamasinoga, ma poloaina ai e le alii faamasino sili ia Michael Kruse ia se faamalamalamaga mai i le malo, i le mafuaaga ua manatu ai e faia lenei maliliega.

E toafa ni alii o lo o tuuaia i lenei mataupu, o Tavita Mariota, Lewis Lokeni, Peni Levi ma Anthony Sioka, ae peitai, sa na’o Tavita, Lewis ma Peni na sainia le maliliega.

O lo o tuuaia i latou nei e toafa i moliaga ta’itolu e aofia ai le faiaiga ma se teineititi e laititi i lalo o le tulafono, tagofia o itutinosa o se teineititi, atoa ai ma le faia o gaioiga e ono lamatia ai le saogalemu o fanau laiti.

O lo o taofia uma i le toese i Tafuna i latou nei e toafa, e faatali ai le aso 4 o Novema lea ua faatulaga e faia ai la latou faamasinoga iloilo.

TU’UAIA OGE VAISAGOTE I LE FAIAIGA MA SE TEINEITITI 15 TAUSAGA

Ua tuuaia nei e le malo le alii o Oge Vaisagote i le moliaga o le faiaiga ma se teineititi talavou, tagofia o itutinosa o se tamaitai e le’i faaipoipo i ai, atoa ai ma lona faia o ni gaioiga e ono lamatia ai le saogalemu o fanau laiti.

O tuuaiga faasaga ia Vaisagote na afua mai i le faalavelave lea na tulai mai i le va o Novema ma Tesema 2012.

A’o faatalatalanoa e leoleo le teineititi na aafia ona o se isi mataupu, na manino mai ai le i ai o se mafutaga i le va o lea tamaitai ma le alii mai i Laulii i le faaiuga o le tausaga e 2012.

Na faailoa e le tamaitai na aafia i leoleo e faapea, o le masina o Tesema 2012 na ave ai e le ua molia o ia i lona fale i Laulii, o iina na la faiaiga ai.

Sa faamaonia e le ua molia, i leoleo, le la mafutaga ma le teineititi na aafia, atoa ai ma taimi ma le aso na la faiaiga ai i lona fale i Laulii.

Na fesili leoleo ia Vaisagote pe sa ia iloa o le teineititi na la faiaiga e 15 tausaga le matua, na tali le ua molia ‘ioe,’ ae ina ua fesiligia pe na te iloa o le solitulafono le faiaiga ma se teineititi e 15 tausaga le matua, na tali le ua molia ‘leai.’

O le taeao nei e toe tulai ai Vaisagote i luma o le faamasinoga mo le faatulagaina o le aso e faia ai lana ulua’i iloiloga.

E $30,000 le tupe lea ua faatulaga e le faamasinoga e totogi ona faatoa mafai lea ona tatala le ua molia i tua mai le toese, ae afai e mafai ona tatala o ia i tua, e i ai tuutuuga e ao ona usita’i i ai.

MOLIA SE TAMAITIITI AOGA I LE TAGOFIA O LE AVA MALOSI

O le alii aoga mai le Aoga Maualuga a Tafuna lea na ‘ona ma lafo se upu mamafa i le sui puleaoga, ua molia nei e le malo i moliaga mama e lua o le faatupu vevesi i nofoaga faitele ma le tagofia o le ava malosi ae le’i atoa le 21 tausaga le matua.

O lenei faalavelave na tula’i mai i le Aso Faraile na te’a nei, ma vala’au ai e le aoga ia le Ofisa o Leoleo.  Na taunuu leoleo ma loka mai le alii aoga e 17 tausaga le matua. A’o ta’ita’i ese mai e leoleo le ua molia mai luma o faiaoga ma le sui pule aoga, na faaumu le ua molia ma lafo ni upu mataga i le sui pule aoga.

Na maua e leoleo i totonu o le ato aoga a le ua molia se fagu malosi e le’i uma ona inu.

O le Aso Gafua na te’a nei na tulai ai le ua molia i luma o le Faamasinoga Faaitumalo, ma ua toe tatalaina nei o ia i tua e faatali ai le isi aso lea ua faatulaga e toe fofogaina ai lana mataupu. Ua faasa e le faamasinoga le ua molia ona ia toe tagofia le ava malosi.

TETE’E GABRIEL TINAI TUUAIGA A LE MALO

Na teena e le alii o Gabriel Tinai tuuaiga o le talepe fale ma le gaoi, ina ua tulai i luma o le faamasinoga maualuga i le taeao ananafi ma ua faatulaga ai loa lona ulua’i iloiloga e faia i le aso 10 o Aperila.

O moliaga faasaga ia Tinai na afua mai i se faalavelave na tupu i Pavaiai i le tausaga ua tuana’i, i lona ulufale i totonu o se fale ma gaoia se telefoni, laau pese ma sipika.

O lo o taofia pea Tinai i le toese e faatali ai le aso lea ua faatulaga e toe tulai ai i luma o le faamasinoga, ina ua le mafai ona ia totogi le tupe ua faatulaga e tatala ai o ia i tua.