Ads by Google Ads by Google

Tala o Fa’amasinoga

TETE’E SINAVE TUPUOLA I TU’UAIGA A LE MALO

 

Na te’ena e le alii o Sinave Tupuola, lea o lo o tuuaia i lona taina o le ulu o se tagata i se fagupia ina ua le maua le tupe sa mana’o i ai, ua ia teena tuuaiga a le malo faasaga ia te ia ina ua tulai i luma o le Faamasinoga Maualuga i le taeao ananafi.

 

I lona teena o le moliaga o le faaoolima i le tulaga lua ma le faatupu vevesi i nofoaga faitele, ua faatulaga ai loa lona ulua’i iloiloga e faia i le masina fou.

 

O tuuaiga faasaga ia Tupuola na afua mai i se faalavelave lea na tulai mai i le aso 8 Fepuari.

 

I faamaumauga a le faamasinoga o lo o taua ai e faapea, e $300 le tupe na mana’o le ua molia e aitalafu mai i le alii na aafia, ae ina ua faailoa atu i ai e le na aafia e na o le $200 le tupe e gafatia ona maua atu mo ia, sa ita ai loa le ua molia ma ia faatinoina ai le solitulafono e pei ona tuuaia ai o ia e le malo.

 

TOE TU’UAIA HODGES I LE UMIA O FUALAAU FA’ASAINA

 

Ua toe molia e le malo le alii o Tolupo Hodges i tuuaiga o lona umia faasolitulafono lea o ni vaega o le pauta faasaina o le aisa, faapea ai ma isi moliaga mama e tolu o lona umia faasolitulafono lea o ni a’upega faasaina.

 

O le taeao ananafi na tulai ai i luma o le faamasinoga faaitumalo le alii o Hodges, ma ua faatulaga o le taeao nei e toe tulai ai mo le faatulagaina o le taimi ma le aso e faia ai lana ulua’i i lloiloga i luma o le faamasinoga faaitumalo.

 

O moliaga faasaga ia Hodges na afua mai ina ua agai atu leoleo e faataunuu se poloaiga a le faamasinoga, e sailia ai lana taavale, o lona tino ma lona fale po o i ai ni vaega o fualaau faasaina.

 

O luma o se faleoloa i Alofau na maua atu ai e leoleo le taavale a Hodges o paka mai ai i le aso Tofi na te’a nei, ma latou sailia ai loa lona tino ma lana taavale.

 

I se tama’i ato na maua e leoleo i le tino o Hodges, na maua i ai se taga pepa iila o lo o i ai se vaega o le pauta faasaina o le aisa, sa faapea foi ona maua i ai ma se straw e faaaoga e ula ai le aisa.

 

Ina ua sailia lona fale, sa maua i ai se fana ma pulufana, atoa ai ma isi mea e faaaoga e i latou e tagofia le pauta o le aisa e pei o seleulu, fua, afi ma se container.

 

Ua taofia uma i lalo o le vaavaaiga a leoleo mea uma sa maua mai i le tino ma le fale o Hodges, e fai ma mea molimau i le taimi o lona faamasinoga.

 

E $15,000 le tupe lea ua faatulaga e le faamasinoga e totogi ona faatoa mafai lea ona tatala le ua molia mai tua o le toese.

 

O le tausaga na te’a nei na magalo mai ai i tua o le toese le ua molia ma nofovaavaaia ai i lalo o poloaiga a le faamasinoga, ina ua tausala o ia le moliaga o lona umia faasolitulafono lea o vaega o le pauta faasaina o le aisa.

 

TETE’E LE ALI’I FUIMU I MOLIAGA FA’ASAGA IA TE IA

 

O le masina fou lea ua faatulaga e faia ai le ulua’i iloiloga o le mataupu faasaga i se alii Fuimu a le malo, ina ua ia teena moliaga o lo o tuuaia ai o ia e le malo ina ua tulai i luma o le faamasinoga maualuga i le taeao ananafi.

 

O le susuga a Falealo Savea Mauga o lo o tuuaia i moliaga mamafa e lua o le faaoolima i le tulaga lua ma le faaleaga meatotino i le tulaga muamua, atoa ai ma le moliaga mama o le faatupu vevesi i nofoaga faitele.

 

O tuuaiga faasaga ia Falealo na afua mai i le faalavelave lea na tulai mai i Fatu ma Futi i le aso 15 Fepuari 2013, lea na ia tauaia ai se taavale ma faaleagaina ai se vaega o lea taavale, a’o i ai i totonu o le taavale se fafine ma se tamaitiiti laititi.

 

Na lavea le alii e ana le taavale i le ma’a na togi e le ua molia ma manu’a ai se vaega o lona tino, ae o vaega o lana taavale na faaleagaina e tusa lea ma le $2,125 le tau aofa’i.

 

O se tasi o molimau a le malo i lenei mataupu, o se alii leoleo sa i ai tonu lava i le taimi na tulai mai ai lenei faalavelave.

 

O lo o taofia pea Falealo i le toese i Tafuna sei vagana ua ia totogiina le $5,000 ona faatoa mafai lea ona tatala o ia i tua mai le toese.