Ads by Google Ads by Google

Tala o Fa’amasinoga

TETE’E UPUTAUA TUIULI I TU’UAIGA MALO

Ua teena e Uputaua Tuiuli ona moliaga r tolu  i luma o le Faamasinoga Maualuga i le taeao ananafi. ma ua faatulaga ai nei lona ulua’i iloiloga mo le masina fou.

O tuuaiga ua faia faasaga ia Tuiuli, na afua mai i le taimi na galue i le Samoa Sports o se teu fale i le 2010.  Na masalomia o ia i lona gaoia o ni siaki se lua mai le kamupani, saini faamalosi ai le igoa o le pule, ona tala lea o le siaki e $280.90 i se faleoloa e latalata ane i le nofoaga e nofo ai, ae tala le isi siaki e $379.89 i le faletupe o Hawaii.

Na amata masalomia e le kamupani le ua molia i lona faia o lenei solitulafono, ina ua maitauina ni oloa ua aveese mai tulaga sa i ai, peitai ina ua fesiligia e le afafine o le pule o le kamupani le ua molia, sa ia teena na te le’i avea ni oloa i lona aiga.

O lo o taofia pea Tuiuli i le toese i Tafuna sei vagana ua totogi le $7,500 lea ua faatulaga e le faamasinoga ona faatoa mafai lea ona tatala o ia i tua.

TU’UFA’ATASI MALO MATAUPU LUA FAASAGA IA IOANE MELEISEA

Ua tuufaatasi nei e le malo mataupu tau solitulafono e lua ua tuuaia ai le alii talavou o Ioane Meleisea, e pei ona faailoa e le itu a le malo i luma o le faamasinoga i le aso ananafi ma ua taliaina foi e le faamasinoga.

O le mataupu muamua o lo o tuuaia ai  Meleisea na tulai mai i le aso 16 o Me i Pava’ia’i, ina ua latou osofaia ma ni tamaiti o le nuu le faleoloa o le Pelene ae gaoi ni meaaoga sa i totonu, ae o le mataupu lona lua na tulai mai i le aso 4 o Iuni, lea o lo o tuuaia ai foi o ia ma sana uo i lo la osofaia o le faleoloa o Bell Mart i Faleniu.

E ui e eseese taimi ma nofoaga na tutupu ai solitulafono ae talitonu le malo e le gata e fesootai lelei, ae totasi foi le tagata o lo o tuuaia ai i nei osofaiga.

O le faasaoina o le taimi o le malo e faaalu e iloiloina ai mataupu ia e lua i taimi eseese, faapea ai ma le faasaoina o pepa e faila ai talosaga ma i luma o le faamasinoga, o isi ia mafuaaga na faailoa e le malo ua mafua ai ona talia e le faamasinoga le talosaga.

Ua i luma nei o le faamasinoga mataupu uma ia e lua faasaga ia Meleisea, ma ua faatulaga lana uluai iloiloga e faia lea i le masina fou, ina ua ia teena moliaga o lo o tuuaia ai o ia e le malo.

O lo o taofia pea Meleisea i le falepuipui i Tafuna ina ua le mafai ona ia totogiina le $30,000 na faatulaga e tatala ai o ia i tua.

O lo o tuuaia o ia e le malo i moliaga mamafa e lua o le gaoi, atoa ai ma moliaga mamafa e lua o le talepe fale i le tulaga muamua.

MALIE MAUI JR

O le alii lea na ia ta’u pepelo lona igoa i le tamaitai e ana le potu lea na oso ai i totonu, ua faatulaga e le faamasinoga le aso 30 Novema e tatau ona oo atu i ai, ua mautu le maliliega lea o lo o latou taumafai ma le malo e saini ma faamuta ai loa lana mataupu.

Na talia e le faamasinoga maualuga le talosaga a le malo ina ua valaau le mataupu a Malie Maui Jr i le taeao ananafi, mo se isi avanoa e toe tolopo ai lenei mataupu, ae sei faaauau talanoaga ma feutanaiga o lo o faia mo se maliliega aufaatasi.

O lo o tuuaia Maui Jr i le moliaga o le talepe fale i le tulaga muamua, ona o le faalavelave lea na tulai mai i le aso 30 Me 2011 i Fogagogo, ina ua vaaia e le tamaitai e ana le fale le ua molia i totonu o lona fale, peitai ina ua ee atu i ai ma fai atu i ai, poo a ana mea o lo o fai i totonu o lona fale, sa leai se tali a le ua molia sei vagana ai lona tatala o le faitotoa o le fale ma alu ese.

Na maua atu e le tamaitai e ana le fale le ua molia o lo o tutu mai i luma o le faitotoa pito i luma o lona fale, ona ia fesili lea i ai poo a ana mea o lo o fai i lona fale, ae na faatoese le ua molia ma fai atu i ai o lona igoa o John Aitui.

O lo o tumau pea tuutuuga o lo o tatala ai le ua molia i tua ina ua ia totogiina le $10,000 sa faatulaga e le faamasinoga, e faatalitali ai le aso lea ua toe tolopo i ai lana mataupu.