Ads by Google Ads by Google

Tala o Fa’amasinoga

TOE MOLIA IOANE MELEISEA I SE ISI MATAUPU FOU

Ua fa’aalia le le fiu o le alii o Ioane Meleisea, lea na molia i le osofaia o le faleoloa o Pelene i Pavaiai, ina ua toe molia foi i lona osofaia o leisi faleoloa, le Bell Mart, i Faleniu.

I faamaumauga a le faamasinoga o lo o taua ai, o le aso 16 o Me 2012 na osofaia ai e Meleisea le faleoloa i Pava’ia’i, ae o le aso 4 o Iuni 2012, na ia osofaia ai le faleoloa i Faleniu.

O ni isi o mea na gaoia e Meleisea mai totonu o le faleoloa lea e aofia ai se fagu sa i ai ni tupe siliva i totonu.

Na faamatala e Meleisea i leoleo, o le maea o se latou inuga pia ma ana uo, na faia ai se tonu e osofai le Bell Mart.  O Meleisea na oso i totonu o le faleoloa, e ala i lona una’i i totonu o le masini ea malulu, a’o tutu lana uo i fafo e vaai ni tagata e o atu.

Na faailoa e Meleisea i leoleo e faapea, o oloa na ia gaoia, e tusa ma le $240, faatasi ai ma se tino i tupe e tusa ma le $900 le aofa’i.

O lo o taofia pea Meleisea i le toese i Tafuna ina ua le mafai ona ia totogia le $30,000 ua faatulaga e le faamasinoga e tatala ai o ia i tua.

TETE’E LE AU FIA FBI TUUAIGA A LE MALO

O alii e toalua ia o lo o tuuaia i moliaga o le gaoi, ona o le faalavelave lea na la faailoa ai i ni tagata o laua o sui o le Ofisa o le FBI i le teritori, ua la teena tuuaiga ua faia faasaga ia i laua, ina ua la tutula’i i luma o le Faamasinoga Maualuga i le taeao ananafi.

O le alii o Aperaamo Levi ma Alatise Fonoti o lo o tuuaia i moliaga ta’i lua o le gaoi, ma ua faatulaga le la ulua’i iloiloga no le masina fou.

Ua molia Levi ma Fonoti ina ua la fa’afaigaluegaina ni tagata se to’a 25 i le tausaga e 2010 mo le tolu masina, e aunoa ma le totogia o i latou.

Fai mai faamaumauga a le faamasinoga, e le gata na folafola e i laua nei penefiti tau tupe ma meaalofa e maua e tagata faigaluega, ae sa la faafefeina foi i latou, e ta loka pe afai e latou te fesiligia tulaga o le galuega o lo o latou faia.

Na faailoa e Levi ma Fonoti i tagata faigaluega, o laua o sui o le FBI i Amerika Samoa nei, ma o lo o i ai se vaega tupe o lo o aumai i le FBI e totogi ai i latou mo le faatinoga o ia galuega.

O lo o taofia pea Levi ma Fonoti i le toese i Tafuna, ina ua le mafai ona la totogia le ta’i $7,500 na faatulaga e le faamasinoga e tatala ai i laua i tua.

APELU FINAU

O le aso ananafi na faila ai e le malo le moliaga mamafa o le ave taavale a’o se’i le laisene faasaga i le alii o Apelu Finau, ona o le faalavelave lea na taofia ai e leoleo lana taavale ina ua alu saoasaoa i luga o le alatele i Aua, peitai ina ua fesiligia lana laisene, na faailoa ai e le ua molia o lana laisene o lo o se’i e le Faamasinoga.

O le vaiaso fou lea ua faatulaga e toe fofogaina ai le mataupu a Finau i luma o le faamasinoga faaitumalo, ma afai ae faamaonia le moliaga o le ave taavale a’o se’i le laisene, e poloaina o ia na te tuliina aso e 90 i le toese, e pei ona faatulaga mai e le tulafono.

O le masina o Aperila na tausala ai e le faamasinoga Finau i le moliaga o le ave taavale ‘ona, ma se’i ai lana laisene mo le 6 masina.