Ads by Google Ads by Google

Tala o Fa’amasinoga

MOLIA LE TEU FALE I LONA TALA FA’AGAOI O NI SIAKI SE LUA

O le tina lea na galue o se teu fale i le kamupani a le Samoa Sports, ua tuuaia nei e le malo i moliaga mamafa e tolu, i lona sainia o ni siaki se lua.  O leisi siaki na tala i le faletupe o Hawaii, ae o leisi sa tala i le faleoloa o le “Add-One”

O moliaga e tolu ua tuuaia ai Uputaua Tuiuli e aofia ai moliaga e lua o lona faia o ni faamaumauga taufaasese, ma le moliaga o le gaoi. O le siaki muamua na tala e le ua molia e $280.90, ae o le siaki lona lua e $379.89.

O le masina o Tesema 2010 na faaulu ai e le afafine o le pule o le kamupani a le Samoa Sports sana tagi i le Ofisa a Leoleo e faasaga ia Tuiuli, ina ua masalomia lona saini faamalosi o ni siaki se lua, ma tala i se auala faagaoi e aunoa ma se faatanaga faaletulafono.

Na faailoa e le kamupani le gaoia o lavalava ma isi oloa mai totonu o le faleoloa, talu lava ona galue le ua molia o se teufale i le kamupani.

O lo o taua foi e faapea, o le taimi lava na aveesea mai ai siaki mai le ofisa o le alii pule, sa vili ma’i mai ai le ua molia.

Ina ua fesiligia e le afafine o le alii pule o le kamupani le ua molia e uiga i siaki sa ia talaina, na teena malosi e le ua molia lona faia o lea solitulafono. Fai mai Tuiuli, na te le’i faatinoina le solitulafono, ae ua ia sauni e toe totogi le tupe e pei ona tuuaia ai o ia, ina ia mafai ai ona faamama lona igoa.

Sa ia teena tuuaiga e faapea sa ia gaoia lavalava mai totonu o le faleoloa, peitai na taua e le kamupani e faapea, o le taimi na tala ai le siaki lona lua i le faletupe, e le’i faigaluega ai Tuiuli mo le vaiaso atoa ma le faleoloa lea na tala ai le siaki muamua, e latalata i le nofoaga e nofo ai Tuiuli.

E $7,500 le tupe lea ua faatulaga e le faamasinoga e totogi, ona faatoa mafai lea ona tatala i tua Tuiuli. O lana ulua’i iloiloga i luma o le Faamasinoga Maualuga, lea ua faamoemoe e faia i le taeao nei.

TU’UAIA SE ALII TALAVOU I LE GAOI MA LE TALEPE FALE

Ua molia Ioane Meleisea, lea o lo o tuuaia i le osofaia o le faleoloa a Pelene i Pavaiai, i moliaga mamafa e lua e aofia ai le talepe fale i le tulaga muamua ma le gaoi.

O ananafi na faamoemoe e faia ai le ulua’i iloiloga a Meleisea i luma o le faamasinoga faaitumalo, peitai na fa’aagafua i lalo o se talosaga a Meleisea, ae ua tuu sao atu loa lana mataupu i luma o le Faamasinoga Maualuga.

O le mataupu ua tuuaia ai Meleisea, na afua mai i se faalavelave na tulai mai i le vaveao o le aso 16 o Me, 2012, ina ua talepe e ni tagata le faleoloa a le susuga Don Kruse i Pava’ia’i ae gaoia oloa ma se tino i tupe.

E tusa ai ma faamaumauga a le faamasinoga o lo o taua ai e faapea, e tusa ma le $1,050 le tau aofa’i o mea sa gaoia mai totonu o le faleoloa a le Pelene, lea e aofia ai ma se tino i tupe e tusa ma le $600 le aofa’i.

Na taua e Kruse i leoleo e faapea, ina ua usu atu i le taeao na tupu ai le faalavelave, sa ia maitauina ni suiga i totonu o le faleoloa e pei o oloa ua sui tulaga na teu ai, o le palaka o lana masini pu’eata ua se’i ese, faapea ma se pu i le pito i tua o le faleoloa e foliga mai na talepe e ni tagata.

Na mafai e se tasi o tagata faigaluega a Kruse ona ia faailoa le tagata sa maua lona ata i se tasi o masini pu’eata, e alii o Ioane Fiamata, lea na faamaonia mulimuli ane lona igoa sa’o, o Ioane Meleisea.

Na loka mai e leoleo ia Meleisea i se fale faatali pasi ma ina ua fesiligia o ia pe iloa le mafuaaga ua loka ai o ia, na tali le alii “ioe, o a’u lea na gaoia le faleoloa a Pelene”.

Na faamatala e Meleiseae i leoleo e faapea, o ia ma isi tamaiti o le nuu na faia le tonu e osofai le faleoloa a Pelene, peitai ina ua oo i le taimi na faataunuu ai le fuafuaga, na o ia lava na mafai ona ofi i totonu o le pu i tua o le faleoloa.

O lo o taofia pea Meleisea i le toese i Tafuna ina ua le mafai ona ia totogi le $30,000 sa faatulaga e tatala ai o ia i tua.

ASOFA TITIO JR

Ua tofu atu nei i luma o le Faamasinoga Maualuga le mataupu a le alii o Asofa Titio Jr., lea o lo o tu’ua’ia i le gaoia o ni faleoloa se lua, i le amataga ma le ogatotonu o le tausaga nei, ma o taeao lea ua faamoemoe e tula’i ai mo le tuuina atu o sana tali e tusa ai ma ona moliaga.

O le masina o Ianuari 2012 o lo o tuuaia ai Asofa ma isi tamaiti laiti na o latou talepeina ai le faleoloa a Sepp’s Warehouse i Tafuna, ae gaoi oloa ma se tino i tupe e tusa ma le $4,000 sa i totonu, ae o le masina o Iuni 2012 na o latou talepe ma osofaia ai le faleaiga a Jade Restaurant i Nuuuli, ma o latou gaoia ai ni oloa ma se tino i tupe e tusa ma le $100.

O lo o taofia pea Titio Jr i le toese i Tafuna ina ua le mafai ona ia totogiina le $40,000 lea na faatulaga e le faamasinoga e tatala ai o ia i tua mai le toese