IOE AASA NA IA TOGIINA MAUGA I LE MA’A

O le taeao ananafi na ioeina ai e le alii o Mika Aasa i luma o le faamasinoga maualuga lona togiina o le alii o Ethan Mauga i se ma’a ma laulua ai le isi itu o lona ulu, e mafua mai i lona ita tele ia Mauga ona o lona fasiga o le isi alii.

O le aso Faraile o le vaiaso nei lea ua tolopo e toe faaauau ai le fofogaina o le maliliega ua uma ona saini e Aasa ma le malo, ina ua finagalo le alii faamasino sili ia Michael Kruse, e tatau ona malamalama le ua molia i ni isi o faaupuga o lo o taua i totonu o le maliliega, e faatatau i ituaiga manu’a na aafia ai Mauga.

Ae o le maliliega a Aasa ma le malo lea na fofogaina i le taeao ananafi, ua tali ioe ai le ua molia i le moliaga mamafa o le faaoolima i le tulaga lua, ona o le faalavelave lea na manu’a ai Mauga i le aso 10 Aokuso i Petesa.

I le tali ioe ai o Aasa i le moliaga o le faaoolima i le tulaga lua, sa ia tautino ai e faapea, i se taimi o le aso 10 Aokuso o le tausaga nei, sa auai ai i se misa na tulai mai i Petesa ma i’u ina la fufusu ai ma le alii o Mauga.

O le iuga o lea fusuaga na ia togiina ai Mauga i se ma’a, ma laulua ai se itu o lona ulu ae le’i aafia ai lona faiai (tulou).

Na taua e Aasa e faapea, o lona ita tele ia Mauga i lona fasiga o le isi alii na mafua ai ona ia togiina lona ulu i le ma’a.

Ua malie Aasa o le a ia totogiina le $320 ia Mauga e tusa ai o lana pili o le falema’i, ina ua taofia ai o ia mo togafitiga e mafua mai i le faalavelave na ia togiina ai lona ulu i le ma’a.

Ua uma ona totogi e Mauga le $170 o lana pili o le falemai, ma o le vaega o le tupe lea o le a totogi e Aasa e alu sa’o ia Mauga, ae o le isi $150 o lo o totoe ai o le a alu sa’o e faauma ai le pili o le falema’i.

O lo o taofia pea Aasa i le toese e faatali ai le aso Faraile lea o le a toe tulai ai i luma o le faamasinoga maualuga, mo le toe faaauauina o le latou maliliega ua uma ona saini ma le malo.

TETE’E I’UMALO SEIULI I TUUAIGA A LE MALO

O le alii pagota lea ua toe molia e le malo i le sola ese ao tatala o ia i tua e faigaluega, ua faatulaga lana ulua’i iloiloga e faia lea i luma o le faamasinoga maualuga i le faaiuga o le masina o fou, ina ua ia teena le moliaga e tasi o lo o tuuaia ai o ia e le malo ina ua tulai i luma o le faamasinoga maualuga i le vaiaso nei.

O le loia a le alii o I’umalo Seiuli ia Karen Shelly na faaleoina lana tali tete’e, lea foi e le’i faatuiese i ai le loia a le malo.

O le moliaga fou ua tuuaia ai Seiuli, na afua mai i le taimi a’o taofia ai o ia i le toese mo le tuliina o lana faasalaga faafalepuipui, ona o le solitulafono o le umia o mariuana na ta’usala ai o ia e le faamasinoga.

A’o i ai o ia i le toese mo le tuliina o lona faasalaga lea, sa talia o ia i lalo o se polokalame a le pulega o le Falepuipui e alu ai e faigaluega ma toe foi atu e tuli faauma lana faasalaga.

O le avanoa la lea e pei ona tuuaia e le malo Seiuli na alu ai asi lona toalua ma lona aiga i Seetaga, ina ua tatala o ia e alu e faigaluega i le kamupani a le Sili’s Burger and Car Wash.

O ni isi o tuutuuga o le tatala ai o Seiuli e alu e faigaluega, o le faasa lea ona alu i se isi nofoaga, sei vagana ai lava le alu atu sa’o i le falepuipui agai i le nofoaga o lo o faigaluega, ma toe fo’i sa’o atu i totonu o le toese pe a manava.

O lo o taofia pea Seiuli i le toese i le taimi nei mo le tuliina o lana faasalaga faa falepuipui o lo o tuli, e faatalitali ai taualumaga o lana mataupu fou e pei ona faagasolo i le taimi nei.

JUBY KOLIO

O le aso 17 Tesema lea ua faamoemoe le faamasinoga maualuga e tatau ona oo atu i ai, ua maea ona sainia se maliliega i le va o le malo ma le alii o Juby Kolio poo Junior e pei ona silafia ai o ia, ma faamuta ai loa le mataupu i le va o le malo ma le ua molia.

O le taeao ananafi na valaauina ai le ulua’i iloiloga o lenei mataupu, peitai na faailoa e le loia a Kolio o Michael White i le faamasinoga e faapea, ua toeititi lava maea talanoaga o lo o faia ma le malo mo se maliliega, ma tuuina atu loa i luma o le faamasinoga lea maliliega pe a maea ona sainia.

O Kolio o lo o tuuaia i moliaga o le faia lea o amioga mataga i se tamaititi e 11 tausaga le matua i Fagasa, ina ua ia faamalosia lea tamaitiiti la te faia ni uiga mataga faafeusuaiga.

O lo o taua i faamaumauga a le faamasinoga le fasi e Kolio o le tamaititi na aafia ina ua musu e faatino lana faatonuga, e ala lea i lona poina o lona gutu.

Ina ua fesiligia e leoleo le ua molia, sa ia ioeina ai e faapea, e faalua ona ia faatonuina le tamaititi na aafia na te faia ni uiga mataga faafeusuaiga.

O lo o taofia pea i le toese Kolio e faatali ai le aso lea ua faamoemoe e toe valaau ai lana mataupu.

FITI AUMUA

Ua i ai se fuafuaga a le malo o le a latou faila le moliaga mamafa o le ave taavale a’o se’i le laisene faasaga ia Fiti Aumua, ona o le faalavelave lea na maua ai o ia e leoleo i le vaiaso na te’a nei o lo o ia faafoeina se taavale.

O Aumua o lo o se’i lona laisene ave taavale, e mafua mai ina ua faamaonia e le faamasinoga faaitumalo le solitulafono mama o le ave taavale ‘ona, sa tuuaia ai o ia e le malo i le masina o Aperila, ma faanofovaavaaia ai loa o ia e le faamasinoga i lalo o tuutuuga, e faasa ona ia toe tagofia le ava malosi, faasa foi ona ia toe faafoeina se taavale mo le umi e 6 masina.

Soo se tasi e molia i le solitulafono mamafa o le ave taavale a’o se’i le laisene ae faamaonia e le faamasinoga, e faamalosia lona tuliina o aso e 90 i le falepuipui i Tafuna, e pei ona faatulaga mai e le tulafono.