a fa’atulagaina le ulua’i iloiloga a Andres Villar mo le aso 9 o Ianuari, 2012, ina ua na te’ena moliaga...

i le taeao ananafi, o le gaoi, talepe fale i le tulaga lua ma le fa’aleaga meatotino i le tulaga tolu.

Na molia Villar ona o se fa’alavelave na tula’i mai i le aso 16 o Oketopa, ina ua molimauina le osofa’ia e se tagata o le falema’i i Tafuna ma gaoia ni isi o mea totino, na aofia ai ma se ta’avale a le falema’i.

O lo o taofia pea Villar i le to’ese i Tafuna i le taimi nei ina ua le mafai ona ia totogia le $20,000 lea na fa’atulaga e le fa’amasinoga e tatala ai o ia i tua.

LOKA E LEOLEO TEINE FUSU E TO’ALUA

O tama’ita’i e to’alua ia na fufusu i Pago Pago i le fa’aiuga o le vaiaso, na taofia uma i lalo o le va’ava’aiga a leoleo, ma tula’i ai loa le isi tama’ita’i i luma o le Fa’amasinoga Fa’aitumalo i le taeao ananafi, ae o le isi o lo o taofia i le falema’i ona o lo o tau togafitia manu’a i lona tino.

O i laua na taofia e aofia ai Keisana Talaese, lea na tula’i i luma o le fa’amasinoga ma ia teena tu’uaiga o le fa’atupu vevesi i le taeao ananafi, ma Mariaiva Ma’alona lea o lo o taofia i le falema’i i Fagaalu.

Na taua e le loia a le malo i le fa’amasinoga, o Ma’alona o lo o i ai o ia i lalo o le va’ava’aiga a le malo, ma o le taimi lava e te’a mai ai i tua mai le falema’i, ona taofia loa lea i le falepuipui ma tula’i ai i luma o le fa’amasinoga.

I le te’ena ai e Talaese o tu’uaiga fa’asaga ia te ia, ua fa’atulaga ai loa le isi ana iloiloga e faia i le masina fou, ma ua tatalaina nei o ia i tua e fa’atali ai lea iloiloga.

Ua fa’atonuina lenei tama’ita’i ina ia aua ne’i ona toe fa’afeso’ota’i ia Maalona.

O lo’o i ai le fa’amoemoe o le taeao nei e tatau ona tula’i ai Ma’alona i luma o le fa’amasinoga fa’aitumalo.

E le o se taimi muamua lea ua tula’i ai Ma’alona i luma o le fa’amasinoga. O lo o i ai le isi ana mataupu lea fo’i na taofia atu ai o ia i le lua masina talu ai, ma poloaina ai o ia e aua ne’i ona toe solia se tulafono, a’o tatala ai o ia i tua mai le toese e fa’atali ai se fa’aiuga o lana mataupu muamua.

TO’ALUA NI ALI’I TU’UAIA I LE FA’AFEFEINA O LA TA’ITO’ALUA

E to’alua ni ali’i na taofia e leoleo i le fa’aiuga o le vaiaso ona o tu’uaiga i le sauaina ma le fa’afefeina o a la ta’ito’alua a’o onana i laua.

O le taeao ananafi na tutula’i ai i laua uma ia i luma o le Fa’amasinoga Fa’aitumalo, ma o  la teena tu’uaiga o le save’uina o le filemu i totonu o la aiga, ma, o le Aso Gafua o le vaiaso fou o le a toe vala’auina ai a laua mataupu, lea e tatau ona o’o atu ai i le aso lea ua faila e le malo nisi moliaga fa’aopoopo fa’asaga ia te i laua.

O le isi ali’i o i laua o se tama talavou 28 tausaga le matua mai Tafuna, lea na ia fasiina lona to’alua i luma o se faleoloa i Tafuna i le po o le aso Faraile na te’a nei, ina ua tauanau e lona to’alua o ia la te o i le fale ua lava lana inugapia.

I fa’amaumauga a le fa’amasinoga na taua ai, pe tusa o le 5:00 i le afiafi o le Aso Faraile, na mavana atu ai le ua molia ma ni isi o ana uo ma amata sa latou inugapia i lalo o le mago lea e tu i tafatafa o le faleoloa, ma e fetaui la le alu ane o le fafine pe tusa o le te’a laititi o le 8:00 i le po e fa’atau se susu a lana tama, ae tau ane ai i le inugapia a lona to’alua ma ana uo.

E fa’atolu ona fai le fafine i lona to’alua la te o i le fale ua lava lana inugapia, peita’i sa  ita ai le ua molia ma ia savali mai ma fasi le fafine, ma lafo i ai upu tau fa’amata’u e aofia ai lona fasiotia o ia.  Ma ia tuli le fafine i le fale.

O le isi ali’i na taofia mai e leoleo i Fagatogo i le fa’aiuga o le vaiaso, ina ua ‘ona ma fasi lona to’alua, atoa ai ma lona fa’afefea i le saisai i se maea, pe a ona toe fa’aleaga se CD a lana uo na masani ona ave atu e fa’alogologo ai.

Na toe tatala i tua i le taeao ananafi i laua uma ia e to’alua, i lalo o ni poloaiga mai le fa’amasinoga e ao ona la usita’i i ai.

O nisi o ia poloaiga e aofia ai le fa’asa lea ona o la toe taumafai e fa’afeso’ota’i o la ta’ito’alua i so’o se taimi, ma ia saili nisi nofoaga la te nonofo ai a’o fa’agasolo ai taualumaga o a laua mataupu.

Ua fa’asa e le fa’amasinoga ali’i nei ona laua toe tagofia le ava malosi po’o ni fualaau fa’asaina, pe la te taumafai fo’i e sosola ese ma le atunu’u, ae ia tu’uina atu a laua pepa malaga e taofi e le malo se’i mae’a le la mataupu ona toe tu’uina atu lea i ai.