TETE’E ASOFA TITIO JR I MOLIAGA A LE MALO

O le aso 17 o Tesema lea ua faatulaga e faia ai le ulua’i iloiloga o le mataupu a Asofa Titio Jr ma le malo, ina ua ia teena moliaga o lo o tuuaia ai e aofia ai moliag e lua o le gaoi, lua moliaga o le talepe fale i le tulaga muamua, faapea ai ma moliaga e lua o le faaleaga meatotino i le tulaga tolu.

O moliaga ua tuuaia ai Titio Jr na afua mai i le faalavelave lea na o latou osofaia ai ma ni isi alii le faleoloa o Sepps Warehouse i Tafuna i le masina o Ianuari o le tausaga na te’a, ma ave faagaoi ni meaaoga sa i totonu e aofia ai ma se tino i tupe e $4,000 le aofa’i.

O isi oloa na gaoia i lea osofaiga e aofia ai se fagu uaina na inu e le ua molia ma isi alii na auai i le osofaiga e faamanatu ai le taunuu o le fuafuaga sa latou faia, ae o pepa faitelefoni na faaaoga e le isi alii.

O lo o taofia pea i le toese Titio Jr sei vagana ua totogi le $15,000 ona faatoa mafai lea ona tatala o ia i tua.

LORENZO VAIMAGALO

O le alii pagota lea o lo o tuuaia e le malo i lona sola i tua mai le toese, ua faailoa e le alii faamasino sili ia Michael Kruse lona le manao na te tauaveina le mataupu a lea alii, ae ua ia faia se poloaiga e tuuina atu lana mataupu e faafoeina e le alii faamasino sili lagolago o Lyle L. Richmond.

O le alii o Lorenzo Vaimagalo ua molia nei i le solitulafono o le sola ese mai le toese ao tuli sona faasalaga i le falepuipui.

I faamaumauga a le faamasinoga o lo o taua ai, ina ua fesiligia e nisi o molimau le ua molia i le mafuaaga ua ala ai ona sola ese mai i le toese, na tali le ua molia, sa sau e saili se fana e faaoo ai le maliu i le alii faamasino sili, ona o lea ua ia toe faaopoopo lona faasalaga faafalepuipui.

O lo o taofia pea Vaimagalo i le toese i le taimi nei e faatali ai le aso lea o le a fofogaina ai lana mataupu i luma o le alii faamasino o Richmond.

O le tamaitai loia fautua ia Leslie Cardin o lo o tulai mo le ua molia, ae o le tamaitai loia o Kimberly Hyde o lo o tula’i mo le itu a le malo.

TO’AFA PAGOTA UA SAUNI E TALI IOE

O le taeao nei lea ua faamoemoe e fofogaina ai maliliega ua maea ona saini e le malo ma ni alii se to’afa o lo o taofia faapagota i le toese, ma faamuta ai loa a latou mataupu i luma o le faamasinoga.

O maliliega ua maea ona sainia e i latou ia sa faila i le faamasinoga maualuga i le vaiaso na te’a nei, peitai e le’i maua se avanoa o alii faamasino e iloilo ma faitau ai, o le mafuaaga lena ua tolopo ai le fofogaina o ia maliliega i le taeao nei.

O i latou e toafa ua sauni e tali ioe e aofia ai Reino Esera, Mika Aasa, Iose Jr Liaina Sootaga Pelasio.

O lo o taofia uma i latou nei i le toese i Tafuna ina ua le mafai ona o latou totogiina tupe sa faatulaga e tatala ai i latou, e faatali ai le toe fofogaina o a latou mataupu i le taeao nei.

O Aasa o lo o tuuaia i le faaoolima, ona o le faalavelave lea na ia togiina ai foliga o se isi alii i se maa, o Esera o lo o tuuaia i le ave taavale faatamala ua mafua ai le maliu i se tagata, ona o le faalavelave lea na maliu ai se tama e 72 tausaga mai Leone ina ua so’a e lana pasi i Nuuuli, ae o isi alii e to’alua o lo o tuuaia i le talepe fale.