NOFOVAAVAAIA MASELA LAGOLAGO FAAMASINOGA MO LE 8 MASINA

Ua faamalumalu le tuuina atu o le Masela Lagolago o le Faamasinoga i le toese mo le 25 aso, ae ua faanofovaavaaia o ia mo le 8 masina ina ua ta’usala o ia i le moliaga o le faatupu vevesi i nofoaga faitele.

I le tali ioe ai o le susuga Maua Tupua i le moliaga e tasi na tuuaia ai o ia e le malo, sa ia faailoa ai i le Faamasinoga Faaitumalo e faapea, i le po o le aso 26 o Aokuso ina ua uma mai sa latou tafaoga ma nisi o ana uo i le Bowling Alley, sa latou aga’i atu i le faleaiga a le McDonald.

O iina na tulai mai ai le faalavelave ina ua vevesi ni alii sa i ai i lea nofoaga ma se tasi o ana uo, ae te’i ai i le o atu o leoleo ma loka mai o ia.

Fai mai Tupua, ao i ai i le ofisa o leoleo i Tafuna, sa maua le avanoa e talanoa atu ai i se tasi o ana uo leoleo, le alii o Amani Fatuesi, ma faai’u ai le la talanoaga ma Fatuesi i lona fai atu i ai, “tatou fetaui i le fale faamasino.”

Fai mai Tupua, o le uiga o lana faamatalaga lea, o lo o fai atu i nai leoleo latou te toe feiloa’i i le aso e soso’o ai i le fale faamasino, pe afai e o atu i a latou mataupu, peitai na faateia o ia ina ua faaoolima atu se alii leoleo o le CID  ia te ia, ma loka ai ona lima e ui e leai ma sana tala na fai i ai.

Na faailoa e John Ward II ia Tupua e faapea, e tatau ona manatua i lona loto, o ia o se tagata faamalosi tulafono o lo o galue mo le Faamasinoga, peitai sa ia le amanaia le avanoa na tuu atu e leoleo e alu ai i le po na tupu ai le faalavelave.

Saunoa Ward, e tatau fo’i ona lelei lo latou va feagai ai ma leoleo o lo o galulue e faamalosi tulafono ma e le o le faamaasiasi o se tagata, ae o le tuuina atu i ai o avanoa e toe fuata’i ai ni mea sa sese.

Ua faatonuina Tupua ina ia aua nei ona toe tagofia le ava malosi, auai i ni aoaoga e fesoasoani ai i le faafitauli o le ava malosi, ma ia totogi le salatupe e $100.

ROMEO PERETANIA

Ua maea nei ona sainia e Romeo Peretania sa latou maliliega ma le malo, e faamuta ai le mataupu fou lea ua toe tuuaia ai o ia, i lona umia faasolitulafono o fualaau faasaina, o se solitulafono sa ta’usala muamua ai fo’i o ia.

O le vaiaso nei na faatulaga e faia ai le faamasinoga autu a Peretania, peitai o le a le faataunuuina lea tulaga ina ua i ai le maliliega ua maea ona sainia ma le ua molia.

Na osofa’i e leoleo le fale a Peretania i lalo o se poloaiga a le faamasinoga, ma latou maua ai pepa iila e 12 o lo o i ai vaega o le pauta oona o le aisa, o se paipa e ula ai le aisa atoa ai ma se tinoitupe e $226.

O lo o tumau pea poloaiga o lo o tatala ai Peretania i tua e faatali ai le vaiaso fou lea ua faamoemoe e fofoga aloaia ai la latou maliliega ma le malo.

NOFOVAAVAAIA LE ALII NA FASIA LONA TOALUA

O le alii lea na fasia lona toalua ma gau ai le vae o le fafine ina ua pau i lalo, ua faanofovaavaaia mo le 3 tausaga, ina ua talia e le Faamasinoga Maualuga lana faatoesega faapea ai ma talosaga a loia.

Ina ua maua le avanoa o lenei alii e faatoese ai i luma o le faamasinoga, sa ia talosagaina le faamasinoga ina ia aua nei tuuina atu se faasalaga faafalepuipui ia te ia, ne’i ma’imau lana galuega ae o lo o tausi si ona afafine faapea ai lona to’alua o lo o ma’itaga.

Na faailoa e le alii lea i le faamasinoga lona agaga salamo e tusa ai o le mea sa tupu, e le toe tupu foi lenei mea i le lumanai. Sa ia faatoese i lona aiga aemaise lona toalua ona o le mea sa tupu.

Na finau foi lana loia o Leslie Cardin ia faanofovaavaaia lenei alii, ona ua lagona lona salamo i le mea sa tupu. Fai mai Cardin, ua uma ona toe faaleleia mea sa faaletonu i le aiga o lenei alii, ma e i ai le talitonuga e le toe tupu lenei mea i le lumanai.

O le ua molia na tali ioe i le moliaga o le faaoolima i le tulaga lua, i lalo o se maliliega sa ia sainia ma le malo ma talia e le faamasinoga.

Na faailoa e le fafine i leoleo e faapea, o le ita o lona toalua ia te ia ina ua le mafai ona latou feiloa’i ma ana uo e faatau mai ai mariuana, na mafua ai loa ona ia fasia o ia.

MAPU TOLO

Ua molia nei e le malo le alii o Mapu Tolo i le faalavelave lea na lavea ai le taavale sa ia aveina i Mapusaga Fou a’o agai atu i A’asu, ma manunu’a ai  tagata e toatolu sa i ai i totonu o le taavale.

O le alii ave taavale ma le isi pasese na toe te’a i tua i le aso lava lea, ae taofia le toalua.

O lo o faaauau pea suesuega a leoleo e uiga i lenei mataupu, ae o le taimi nei ua molia Tolo i le ave taavale faatamala ua mafua ai manu’a i isi tagata.