TEENA FA’AMASINOGA LE TALOSAGA A LE MALO

Ua teena e le Faamasinoga Maualuga se talosaga na faaulu e le loia a le malo o Mitzie Jessop, mo sana faaiuga e faaleaoga ai poloaiga na tatala ai Tau Malae i tua a’o faatalitali ai lana faamasinoga, ina ua masalomia lona le usitaia o ia poloaiga.

Na finau Jessop i le faamasinoga e faapea, o ni isi o poloaiga sa tuu atu e le faamasinoga ia Malae, ia le toe solitulafono, ma ia aua nei toe taumafai e faafesootai tamaitai o lo o aafia i le mataupu lea o lo o tuuaia ai o ia.

Na faailoa e Jessop i luma o le faamasinoga e faapea, ua i ai tuuaiga fou faasaga ia Malae ma lona toalua, i lo la fesootai i tamaitai e toalua o lo o aafia.

Ae na teena e le loia a Malae o Fiti Sunia le talosaga a le malo, ona o lo o taofi Sunia, e le o i ai ni mau faamaonia e lagolago ai tuuaiga fou faasaga ia Malae.  Na toe finau le itu a le malo mo se avanoa e toe tolopo ai lenei mataupu, ae sei valaau molimau e oo mai i luma o le faamasinoga.

O Malae o lo o tuuaia i moliaga o le faia o uiga faasotoma, tagofia o itutinosa o ni tamaitai, faia o uiga mataga faafeusuaiga faapea ai ma le faamalosi teine, e mafua mai i le faalavelave lea o lo o aafia ai “nieces” e toalua a lona toalua mai Savaii, sa nonofo i le latou fale.

Sa tatalaina i tua  Malae ina ua ia totogia le $50,000 ma se faatonuga e fa’asa ona ia toe faafesootaia nei tama’ita’i.

Ae i le masina o Aokuso na te’a nei na faila ai e le malo moliaga fou faasaga ia Malae ma lona toalua, ma tuuaia ai i laua i lo la fesootai lea i tamaitai o lo o aafia, ina ua la totogia pasese e toe faafo’i ai nei tamaitai i Samoa.

O lo o taofia uma Malae ma lona toalua i le falepuipui i le taimi nei sei vagana ua la totogi le tai $10,000 ona faatoa mafai lea ona tatala i laua i tua.

SAUNI AASA E TALI IOE I LONA MOLIAGA

O le alii talavou lea o lo o tuuaia i lona togi o foliga o se alii i se maa ma manu’a tigaina ai, ua sauni e tali ioe i le moliaga o le faaoolima o lo o tuuaia ai o ia e le malo.

Na faailoa e le loia a Mike Aasa i le faamasinoga maualuga ina ua valaau le ulua’i iloiloga o lenei mataupu i le vaiaso nei, ua talia e le ua molia le ofa na tuuina atu e le malo, peitai la te manaomia se taimi e faamalamalama auiliili ai tuutuuga uma o lea ofa.

O le vaiaso fou lea ua faamoemoe e toe tulai ai Aasa i luma o le Faamasinoga Maualuga, mo le fofogaina o le latou maliliega ma le malo.

O lo o taofia pea Aasa i le toese i Tafuna i le taimi nei, ina ua le mafai ona ia totogia le $10,000 sa faatulaga e tatala ai o ia i tua.

FAASII AUPAAU

Ua tuuaia e le malo ia Faasii Aupaau i le ave ta’avale ‘ona ua mafua ai ona manu’a se tagata, ona o se faalavelave na tula’i mai i Nu’uuli, lea na feto’ai ai lana taavale ma se la’au ma manunua ai lana fanau e toatolu.

I faamaumauga a le faamasinoga o lo o tuuaia ai e le malo Faasii e faapea, o le saoasaoa o le taavale a le ua molia na mafua ai ona taumafai e mimilo ina ia aua nei fetoai ma le isi taavale, ae na avea ma itu na faafaigata ai ona taofi e Aupaau le taavale, ma ia so’aina ai se la’au.

O tamaitai laiti e toatolu, o le fanau a Aupaau, sa i tua o le keli o le pikiapu na tau fai lelea i fafo ma le taavale i le taimi na tupu ai le faalavelave, ma manunu’a ai ni vaega o latou tino.

Ina ua fesiligia e leoleo ia Aupaau, sa ia tautino, e tolu ana fagu Vailima sa inu. O le isi toalua o tamaiti na toe te’a i tua mai le falemai i Fagaalu i le aso lava na tupu ai le faalavelave, sei vagana ai le toatasi na taofia mo le po mo le mataituina o manu’a sa aafia ai lona tino.

LOKA ONA O LE AMIO VALEA I TENEITI

Na loka mai e leoleo i le maketi i Fagatogo se alii sa tuuaia e tagata lona tagotago i se teineititi e 11 tausaga.

Na agai atu leoleo i le maketi ma loka mai ai le alii o Fiafia Matau, lea o lo o taofia i le falepuipui i Tafuna i le taimi nei, e faatali ai moliaga faaopoopo lea o lo o fuafua le malo e faila faasaga ia te ia, pe afai ae mae’a a latou suesuega o lo o faagasolo i le taimi nei.

I faamaumauga a le faamasinoga o lo o taua ai e faapea, o le faalavelave na tupu i le taimi a’o punou le teineititi na aafia i luga o se laulau i totonu o le maketi, ae alu atu ai le ua molia ma tago i le teineititi i se auala mataga.

Na taunuu leoleo ma latou molimauina ai le namu pia o Matau, e foliga mai o lo o ‘ona o ia.

E le fou Matau i totonu o le toese ma luma o le faamasinoga, ona sa i ai fo’i ni isi o solitlafono na molia muamua ai o ia ma faamaonia e le fa’amasinoga, ma poloaina ai lona tulina o ni taimi faafalepuipui i Tafuna.