Ads by Google Ads by Google

Tala o Fa’amasinoga

DALLE MALCOLM

O lo o taofia nei i le toese i Tafuna le alii o Malcolm Dalle ina ua masalomia i lona faaliu tupe o ni siaki mai i le kamupani a le Friendly Car Rental.  E lua moliaga o lo o faasaga ia Dalle, e aofia ai le gaoi, o le saini pepelo o se igoa o se tagata faapea ma lona tete’e i leoleo a’o taumafai e faatino o latou tiute.

O le taeao ananafi na tula’i ai Dalle i luma o le Fa’amasinoga Faaitumalo ma e $30,000 le tupe ua fa’atulaga e mafai ona toe tatala ai o ia i tua.

Na taua e le sui loia sili o Kimberly Hyde, lea o lo o tulai mo le malo, o lo o i ai se faamoemoega mo le toe failaina o ni moliaga faaopoopo e faasaga i le ua molia, ona e loka mai lenei alii i le faaiuga o le vaiaso, ae o lea ua toe maua seisi siaki na ia faaliu tupe.

E tusa ai ma faamaumauga a le malo, o lo o ta’ua ai le faafesoota’ia e Leland Slater, le pule o le Friendly Car Rental, ia le ofisa leoleo i Tafuna, ona o se pusa siaki a le kamupani ua gaoia mai i totonu o le ofisa, ma ua toe fo’i atu se tasi o siaki, ua uma na fa’aaoga e to mai ai se tupe.

E tusa ma faamaumauga a le malo, sa faamatala e Slater i leoleo, o le aso 26 o Setema, 2012, na o’o atu ai Dalle i lo latou ofisa mo le okaina o sana taavale.  Ma o lo o masalomia, o iina na gaoia ai e lenei alii se tasi o pusa siaki sa i luga o le laulau.

O le 2;30 i le aoauli o lea lava aso, na maua ai e Slater se telefoni mai ia Jenny Kruse, i le faleoloa o Pelene Pavaiai, ma sa ta’u atu e Kruse, o lea faatoa maea ona kesi se siaki mai i lana kamupani mo Dalle, i le aofaiga e $200.

O Kruse, e masani ma se tasi e le aufaigaluega a le Friendly, o Lua Langkilde ma e masani ona kesi siaki a Langkilde i Pelene, ae peitai, na i ai se masalosaloga o Langkilde, i le siaki na o’o atu ma Dalle, ma o lea na ia faafesootaia ai loa le Friendly Car Rental.

Sa faatonuina e leoleo ia Slater, e valaau lana faletupe e taofi le toe tatalaina i tua o se tupe, ae peitai, e valaau atu Slater, ua maea ona faaliu tupe le siaki lea na tala i Pelene.  Na fa’ailoa atu foi e le BOH ia Slater, e i ai seisi siaki, i le aofaiga e $700, na kesi e le ua molia, i le ANZ.

Sa fa’ailoa atu foi e Slater i leoleo, na malaga ese Dalle mai i lona ofisa, i totonu o se taxi lanu uliuli.  O se tasi o le aufaigaluega a Slater, na mulimuli i le taxi, seia o’o ina tu i Ottoville ma ia alu atu ma fesiligia le ave taxi, ma faamaonia ai o le ua molia sa i totonu o le taxi.  Na faatonuina e le tagata faigaluega a Slater, ia le ave taxi, e toe faafo’i ia Dalle i le nofoaga o i ai le Friendly Car Rental, ona o lo o su’eina o ia.

Ae peitai, na liliu le taxi ma toe alu ese atu, e pei ona ta’ua i faamaumauga a le faamasinoga.  Na fa’aauau ona mulimuli le tagata faigaluega a Slater i le taxi ma toe fai atu ia Dalle, e sili ona alu atu e la te o, ae le’i fefeu le mataupu.

Na ta’ua i faamaumauga, le liliu atu o le ave taxi ma faatonu le ua molia, e sola ese.

MAPU TOLO

O lo o i ai se faamoemoega a le malo, e toe faila ni moliaga faaopoopo, e faasaga i le alii o Mapu Tolo, ona o se faalavelave na tula’i mai i le faaiuga o le vaiaso, lea na taofia ai ni isi e toalua i le falemai i Fagaalu.

O lo o molia Tolo i le aveta’avale ona ma le aveta’avale le faautauta ma e tusa ai ma faamaumauga a le malo, e toatolu se pasese a Tolo na i totonu o le taavale, i le taimi na tupu ai le faalavelave, a’o latou agai atu i A’asu, ae oso ese ai le taavale mai luga o le auala, i Mapusaga Fou.

Na mafai ona togafitia Tolo ma leisi pasese, ae na to’atasi na taofia i le ICU ma ua toe aveina atu o ia i le potu tipitipi (surgical ward).  O le pasese lona tolu, na taofia foi i le ‘surgial ward’, ma ua faasolosolo manuia uma i la’ua.

Na mafai ona toe tatala i tua Tolo i le faaiuga o le vaiaso, ina ua maea ona ia totogia se vaegatupe e $500 ma o le taeao o le Aso Gafua na tula’i ai i luma o le fa’amasinoga.

PIO FAGAAUTAU

Na toe tula’i i luma o le faamasinoga i le Aso Gafua na sei mavae atu, ia se alii na ta’usala i le gaoi ia Iuni 2012, ae na tuu i ai e le alii faamasino sili, ia Michael Kruse, le avanoa e toe faasaosao ai lona ola, ma se faatonuga, e aua ne’i toe o’o mai i luma o le fa’amasinoga.

Ina ua lauina le faasalaga a Pio Fagaautau, ia Iuni, na faatonu o ia e Kruse ina ia aua ne’i ona toe solia le tulafono, ma ia aua ne’i toe tagofia ava malosi.

Ae na toe lokaina mai Fagaautau i le faaiuga o le vaiaso, mai i le Bowling Alley, i moliaga o le fa’atupu faalavelave i nofoaga faitele.