IOE NATASHA I TUUAIGA A LE MALO

O le aso 22 Setema lea ua faatulaga e fofogaina ai le faasalaga o le tamaitai o Natasha Uia, i luma o le Faamasinoga Maualuga, ina ua ia ioeina le moliaga mamafa o le faaoolima i le tulaga lua, i lalo o se maliliega ua ia sainia ma le malo.

Ua fa’amaonia e UIa lona taina o le ulu o se tama’ita’i i se fagupia, ma manu’a ai.

Ua fa’atali nei loia o itu e lua mo se ripoti mai i le ofisa fa’anofovaavaaia a le faamasinoga, ona fa’ato’a tuuina atu lea o ni a laua faafinauga.

Na afua mai moliaga o Uia i se fa’alavelave na tula’i mai i Pavaiai i ni nai masina e le i mamao, ina ua ia faaoolima i se tamaitai na ia masalomia, o lo o alu ma fai ona tala.

O lo o taofia pea le ua molia i le toese i Tafuna, ina ua le mafai ona ia totogia le $10,000 na faatulaga e tatala ai o ia i tua.

Ina ua talia e le faamasinoga le maliliega a le malo ma Uia, na solofua ai loa le moliaga e tasi o loo totoe ai i le pepa o tagi sa faila e le malo, le moliaga o le faatupu vevesi i nofoaga faitele.

TETE’E PITOLAU I ONA MOLIAGA

Ua teena e le alii o Joe Pitolau moliaga ua tuuaia ai o ia e le malo, ina ua tulai i luma o le Faamasinoga Maualuga i le taeao ananafi, ma ua faatulaga ai loa lana uluai iloiloga e faia i le aso 5 o Oketopa.

O Pitolau o lo o tuuaia e le malo i moliaga eseese e aofia ai le talepe fale i le tulaga muamua, taupulepule e faatino le solitulafono o le talepe fale, gaoi, atoa ai ma le faaleaga mea totino.

I faamaumauga a le faamasinoga o lo o taua ai, o osofaiga e pei ona tuuaia ai le ua molia na tulai mai i le va o le masina o Aokuso ma Novema o le 2009, lea na aafia ai le Ofisa o le ECE i Fagatogo i le aso 27 o Aokuso, o le Ofisa komipiuta a le Ofisa o Aoga a le malo i le aso 16 o Setema, o le Faletupe a le Metotisi i Fagatogo i le aso 2 o Novema, ae faaiu i le Drug Store i Fagaalu i le aso 12 o Novema.

O lo o taofia pea i le toese i Tafuna le ua molia ina ua le mafai ona ia totogia le $65,000 ua faatulaga e le faamasinoga e tatala ai o ia i tua.

TUUAIA SE ALII 18 TAUSAGA I LE TALEPE FALE MA LE GAOI

Ua tuuaia nei e le malo se alii talavou e 18 tausaga le matua i moliaga o le gaoi, talepe fale atoa ai ma le faaleaga mea totino, ona o le faalavelave lea na osofaia ai le Ofisa a le CFIDD i le masina o Tesema 2011.

O lo o taofia nei  i le toese i Tafuna i le taimi nei, ina ua le mafai ona ia totogiina le $15,000 ua faatulaga e tatala ai o ia i tua.

I suesuega a leoleo e uiga i lenei faalavelave na taua ai le gaoia o oloa e faaaoga i galuega a le Ofisa e pei o tusitusi, memory cards mo computer, staplers, crayons faapea ai ma makers.

Sa gaoia ai foi ma se pepa potato chips sa i totonu o le ofisa lea na faailoa e le ua molia i leoleo, sa ia aia le pepe chips lea i le taimi na ia gaoia mai ai.

Ina ua fesiligia e leoleo le ua molia poo fea ua ave i ai oloa na gaoia, ae na tali le ua molia, e le o toe ia te ia nei oloa.

E tusa ai ma faamaumauga a le faamasinoga o loo taua ai e faapea, na aveese e le ua molia faamalama mai le fale taele ma mafai ai loa ona maua lona avanoa e oso ai i totonu o le ofisa.

O oloa na gaoia e ova atu ma le $100 lo latou tau aofa’i.

TETE’E HYMIE SEFO I TUUAIGA A LE MALO

O le masina fou lea ua faatulaga e faia ai le uluai iloiloga o le mataupu faasaga ia Hymie Sefo, ina ua ia teena tuuaiga a le malo faasaga ia te ia i le taeao ananafi, ina ua tulai i luma o le faamasinoga maualuga mo le taimi muamua.

O tuuaiga faasaga ia Sefo na afua mai i le faalavelave lea na osofai ma talepe ai e nisi le faleoloa o FJP Kruse Inc i Leone, ma gaoia ai ni pusa teutupe sa i totonu o le ofisa o le faleoloa.

O lo o tuuaia Sefo i moliaga e aofia ai le talepe fale i le tulaga muamua, taupulepule e faatino le solitulafono o le talepe fale, faapea ai ma le moliaga o le gaoi.

O loo taofia pea i le toese le ua molia ina ua le mafai ona ia totogiina le $30,000 ua faatulaga e le faamasinoga e tatala ai o ia i tua.

MAE’A POLOKA A LEOLEO

O le amataga o le vaiaso nei na maea aloaia ai le poloka a le Matagaluega o le Puipuiga o le Saogalemu Lautele, lea na amata mai i le ogatotonu o le masina na te’a nei mo le umi e tolu vaiaso.

O lea tautua faapitoa a le Matagaluega o Leoleo sa faamalosia ai tulafono mo le vaavaaia o ave taavale onana i luga o le alatele. I le faaiuga o le vaiaso na te’a nei, e silia i le toa 30 i latou na taofia e leoleo i le falepuipui i Tafuna, ona o tuuaiga e aofia ai le ave taavale ‘ona, faatupu vevesi i nofoaga faitele ma aiga, tagofia o le ava malosi ae le’i atoa le 21 tausaga, atoa ai ma le mataituina lea o faleoloa ma pisinisi o loo latou faatauina atu le ava malosi i fanau laiti.

I le faaiuga la o le tautua faapitoa a le matagaluega i le vaiaso nei, na mafai ai ona maua ni ripoti i nisi o faleoloa ua aga’i i ai suesuega, ona o tuuaiga i lo latou faatauina atu lea o le ava malosi i fanau laiti.

E leai ni faalavelave matuia na tutupu i le aso malolo na te’a nei, sei vagana ai lava i latou na taofia ona o le faatupu vevesi i nofoaga lautele, faapea ai totonu o aiga.

Na taua e le tamaitai loia sili lagolago ia Camille Philippe, lea o loo tulai mo le malo i le faamasinoga faaitumalo, e toatele i latou na taofia ma tuuaia i le ave taavale ‘ona, peitai e le o mafai ona maua atoa se aofaiga o i latou na taofia ma tuuaia talu ona amata mai le poloka a leoleo.

“O nisi foi o i latou sa taofia i le 3 vaiaso ua tuana’i atu ma tuuaia i le ave taavale ‘ona, o loo se’i a latou laisene ave taavale, o loo faanofovaavaaia foi i latou i lalo o poloaiga a le faamasinoga.

TITO MALAE

O le alii lea o loo tuuaia i lona faaoo lea o ni manu’a tuga i se isi alii e ala i lona togiina lea o ia i le ma’a, ua molia nei e le malo i le moliaga mamafa o le faaoolima i le tulaga lua, lea e mafai ona faasala ai se tasi i le toese mo le umi e le silia ma le 5 tausaga, pe faasala foi i le salatupe e le silia i le $5,000, pe afai ae faamaonia e le faamasinoga lenei solitulafono.

O le moliaga ua tuuaia ai Tito Malae na tulai mai i Iliili i le masina na te’a nei, ina ua tulai mai se feeseeseaiga i lo la va ma le alii ua manu’a, ma i’u ai loa i lona tu’iina o le ulu o lea alii i le maa ma togafitia ai o ia i le falemai, lea na manaomia ai filo e 12 e tau su’i ai lona manu’a, e pei ona taua i faamaumauga a le faamasinoga.

E $5,000 le tupe ua faatulaga e le faamasinoga e totogi ona faatoa mafai lea ona tatala Malae i tua, e faatalitali ai taualumaga o lana mataupu o loo faagasolo i le taimi nei.