Tala o Fa’amasinoga
SILIA 30 NA TAOFIA FAAPAGOTA LEOLEO FAAIUGA VAIASO
E silia i le toa 30 i latou na taofia faapagota e leoleo i le faaiuga o le vaiaso na te’a nei, ona o tuuaiga i le faatupu vevesi i nofoaga faitele, faapea ma le ave taavale ‘ona.
E lua van ma le sipi a le Ofisa o Leoleo na momoli atu ai i latou sa taofia, i le fale faamasino i le taeao ananafi, ona o le toatele o i latou na amata taofia mai i le po o le Aso Faraile seia oo mai i le vaveao ananafi.
I faamaumauga a le faamasinoga sa taua ai e faapea, e toa 14 i latou na taofia ma tuuaia i le ave taavale ‘ona ae toa 17 na taofia ma tuuaia i le faatupu vevesi i nofoaga faitele faapea ai totonu o latou aiga.
Sa aofia ai ma le alii ave pasi lea o lo o tuuaia i le maliu o se tama matua i lluga o le alatele i Nuuuli. (Silasila i le tala e faatatau i le faalavelave na tulai mai i Nuuuli). Atoa ai ma le Masela o le Faamasinoga ia Maua Tupua, o lo o tuuaia i le faatupu vevesi i nofoaga faitele.
Na taua e le loia a le malo e faapea, o nisi o i latou na taofia mai i le faaiuga o le vaiaso, o lo o faanofovaavaaia i latou i lalo o poloaiga a le faamasinoga, ma o nisi o ia poloaiga e aofia ai le faasa lea ona toe soli se tulafono, pe toe tagofia foi le ava malosi.
E toalua tamaitai talavou sa taofia foi i le faaiuga o le vaiaso, ona o tuuaiga i le faatupu vevesi i nofoaga faitele.
O le taeao ananafi na tutulai uma ai i latou nei i luma o le faamasinoga.
O ni isi o i latou nei na toe tatalaina i tua i lalo o poloaiga e ao ona latou usitai ai, a’o faatalitali ai taimi ma aso ua toe tolopo i ai a latou mataupu, ae o ni isi ua poloaia e totogi se vaega tupe ona faatoa mafai lea ona tatala i latou i tua mai le toese.
Na taua e le loia a le malo, e ese mai le faalavelave lea na maliu ai se tama i Nuuuli i le taeao o le aso Toona’i na te’a nei, e leai nisi faalavelave matuia na tutupu i le faaiuga o le vaiaso, sei vagana ai lava faalavelave laiti e pei o le ‘ona ma le faatupu vevesi nofoaga faitele ma aiga.
FA’ATULAGA FA’AMASINOGA AUTU O SE TAMA MATUA
O le tama matua lea o lo o tuuaia i lona faia o uiga mataga i sona lava alo, ua faatulaga lana faamasinoga autu e faia i le masina o Novema, ina ua le maua se maliliega aufaatasi i le va o ia ma le malo.
E le o mafai ona faailoa le igoa o le ua molia, ona o puipuiga i le teineititi o lo o aafia i lenei mataupu.
O le vaiaso na te’a nei na toe fofogaina ai lenei mataupu i luma o le Faamasinoga Maualuga ma le faamoemoe, e tatau ona oo atu i ai ua i ai se maliliega ua mafai ona saini e le ua molia ma le malo, ae ina ua valaauina le mataupu, sa faailoa e le loia a le ua molia o Mike White le mana’o o le ua molia e faatulaga se aso e faia ai lana faamasinoga autu.
O lo o tuuaia le ua molia i moliaga e aofia ai le faia o amioga faasotoma, faia o amioga mataga faafeusuaiga, tagofia o itutinosa o se teineititi, faapea ai ma le faia o uiga e lamatia ai le saogalemu o se fanau laititi.
O tuuaiga faasaga i le ua molia na afua mai i se faalavelave na tulai mai i le va o Tesema 2010 ma Mati 2012.
O le mataupu na alia’e ina ua fesiligia e le Fautua a le aoga le teineititi, i le mafuaaga na ala ai ona tele aso e le’i aoga ai, o iina na faamatala ai e le teineititi le mea atoa sa tupu ma tofu atu ai loa i le ofisa o leoleo lenei mataupu.
O lo o taofia pea i le toese i Tafuna le ua molia ina ua le mafai ona ia totogia le $30,000 sa faatulaga e tatala ai o ia i tua.
JUDY MATAUTIA
O le aso 24 Setema lea ua toe tolopo i ai le uluai iloiloga o le mataupu i le va o le malo ma Judy Matautia, ina ua talia e le Faamasinoga Maualuga le talosaga a Matautia ma lana loia, e toe tolopo le latou mataupu mo se tolu vaiaso, ae se’i faaauau talanoaga o lo o faia ma le malo mo se maliliega aufaatasi e faamuta ai lenei mataupu.
O Matautia o lo o tuuaia i lona ave faagaoi o se vaega tupe e silia ma le $10,000 sa tuuina atu i lalo o lana vaavaaiga, atoa ai ma le moliaga o lona tuuina atu o ni siaki ma lona iloa e le o i ai se tupe i totonu o lea teugatupe.
I faamaumauga a le faamasinoga o lo o taua ai e faapea, o le masina o Aokuso 2010 na amata mai ai gaioiga e pei ona tuuaia ai Matautia e le malo, i lona alu e teu tupe a le kamupani i le faletupe, peitai o ni isi taimi na te le teuina ai tupe i totonu ae sa ia faia ni faamaumauga ina ia faafoliga mai ai ua maea ona teu ia tupe, ae ua ia faaaogaina mo ia lava.
E tulai mai lenei mataupu o lo o galue Matautia i le Ofisa o le kamupani vaalele a le Polenisia.
O lo o tumau pea poloaiga o lo o tatala ai Matautia i tua mai le toese, e faatali ai le aso lea ua fuafua e toe valaauina ai lana mataupu.