Ads by Google Ads by Google

Tala o Fa’amasinoga

Na ta’utino le ali’i o Mikaele Aulaumea, i luma o le fa’amasinoga i le aso ananafi, sa ia fa’aleagaina le faitoto’a pito i luma o le faleoloa o Christopher i Leone...

ma ia gaoia mai ai ni oloa mai totonu e aofia ai ofu ma fagupia, lea e silia ma le $100 lo latou tau aofa’i.

Ae mo le osofaiga sa faia i le fale falaoa o Pritchard, o ia sa tu i fafo e va’ai ni tagata e o atu, ae o ana uo na o i totonu o le fale ma gaoi oloa.

Ina ua fesiligia e le fa’amasinoga pe sa ia va’ai o ave e ana uo ni oloa mai totonu o le fale falaoa, na tali Aulaumea, na te le’i iloa, ae talitonu o ia sa gaoi e ana uo ni oloa mai totonu o le fale falaoa.

Fai mai le itu a le malo, o oloa ia na gaoia e le ua molia ma ana uo mai le fale falaoa, na maua i totonu o le isi faleoloa lea fo’i sa latou osofaia.

E fa moliaga mamafa na ulua’i tu’uaia ai e le malo le ua molia, e aofia ai moliaga e lua o le gaoi atoa ai ma moliaga e lua o le talepe fale, ae i lalo o se maliliega na sainia e le ua molia ma le malo, sa ia tali ioe ai i le moliaga e tasi o le gaoi, ae solofua isi moliaga.

Na fa’ailoa e Aulaumea i le fa’amasinoga, sa ova lona ona i le taimi na tupu ai le fa’alavelave, o le mafua’aga fo’i lea na te le o manatua lelei ai mea na tutupu i le po o le aso 28 Mati

O lo o taofia pea i le toese le ali’i o Aulaumea e fa’atali ai le aso 21 Tesema lea ua faatulaga e lau ai lona fa’asalaga.

KILISITINA SEIGAFO

O le tina talavou lea na fa’atulaga lana fa’amasinoga autu e faia i le vaiaso nei, ona o tu’uaiga i lona gaoia o se tinoitupe e $260 mai le teugatupe a se ali’i papalagi sa pikiina o ia i lana ta’avale, ua tatala i tua mai le toese i Tafuna i le aso ananafi ina ua mae’a ona fa’ailoa e loia i le fa’amasinoga, se maliliega ua mae’a ona latou faia ma le ua molia e fa’amuta ai lenei mataupu.

O le maliliega lea ua faia e le malo ma le tina talavou o Kilisitina Seigafo, o le a ia toe totogia le tupe sa ia gaoia, ae o le a solofua e le malo le moliaga mamafa o le gaoi o lo o tu’uaia ai o ia.

O Seigafo sa fuafua e fa’ataunu’uina lana fa’amasinoga autu i le Aso Gafua na te’a nei, ae talu ai o lea ua mae’a ona sainia se maliliega i le va o ia ma le malo, ua le fa’ataunu’uina ai lea fa’amasinoga.

Na talosgaina e Ruth Rische Fuatagavi, le loia a Seigafo, ia se avanoa e tatala ai i tua le ua molia, ina ia saili sana galuega e fa’ataunu’u ai vaega o le maliliega ua faia ma le malo, lea fo’i na fa’amaonia e le loia a le malo o Cecilia Reyna i le fa’amasinoga tulaga uma e pei ona taua e le loia a le ua molia.

Fai mai le malo, o le aso 20 Me na fetaui ai Seigafo ma le ali’i papalagi o lo o a’afia, i le falema’i o le LBJ, lea na fa’ailoa ai i ai e le ua molia i le ali’i lea, o lona igoa o Marie, mulimuli ane sa ofo atu lea ali’i e momoli Seigafo i le fale, peita’i sa fai le ua molia i le ali’i papalagi, e momoli sa’o o ia i le Maliu Mai, lea na fai ai loa se la inuga pu’upu’u ma tapu’e ai ma la ata, ona la ta’ape loa lea.

Ina ua tu le ta’avale i se faleoloa i Nu’uuli, o iina na fa’atoa iloa ai e le ali’i faipisinisi lenei ua leiloa lana ato tupe, peita’i ina ua ia va’aia foliga o Seigafo, sa ia vaaia ai le sui o ona foliga, o lea na tu’u ai loa e le ali’i lea Seigafo i Nu’uuli ae toe fo’i atu i le Maliu Mai e su’e mai lana ato tupe, peita’i sa fa’ailoa i ai e se tama’ita’i faigaluega i le Maliu Mai lona va’aia o se mea o pa’u mai i le taga o le ofu a le ali’i papalagi, ona piki lea i luga e le tama’ita’i sa la to’alua.

Na fa’ailoa e le ali’i lea lenei mataupu i leoleo, atoa ai ma lona tu’uina atu i ai o ata o le ua molia. Na taua i fa’amaumauga a le fa’amasinoga le maua i mea pu’eata a le faletupe se tagata sa ia talaina ese mai le tupe e $260 mai le teugatupe a le ua molia i le aso lava lea na leiloa ai lana ato tupe, ma o lea tagata o le ua molia.