FEGAUIAI TOESE

O le taeao nei lea ua faamoemoe e tulai ai i luma o le Faamasinoga Maualuga le tamaitai o lo o tuuaia i lona sainia faagaoi o ni siaki se lua mai le kamupani sa faigaluega muamua ai.

O Fegauiai Toese ua molia nei i le gaoi, ma ua faamoemoe e tuuina atu lana tali tete’e i luma o le faamasinoga maualuga i le taeao nei.

O lo o tuuaia o ia i lona sainia o ni siaki e silia i le $1,000 mai i le Kooline Refrigerator, ma ia fa’aaogaina.  E tasi le siaki na ia toe fa’afo’i i le kamupani.

O lo o taofia pea Toese i le falepuipui sei vagana ua totogi le $10,000 o na faatoa mafai lea ona tatala o ia i tua.

SOLOMON ARU

Ua toe tolopo le mataupu a le alii fagota mai Solomona lea o lo o tuuaia i lona taumafai e faamalosi se fafine a’o moe, ina ua talia le talosaga a le malo e toe tolopo le mataupu sei taunuu mai le loia a le malo o lo o taulimaina lenei mataupu, le tamaitai o Mitzie Folau.

O le po anapo na taunuu mai ai i fanua Folau mai sana malaga mo Saipan, ma ua faamoemoe le faamasinoga e tatau ona oo atu i le isi iloiloga lea ua faatulaga ua i ai se ofa ua faia e le malo ma le itu a le alii o loo tuuaia o Solomon Aru.

O lo o tuuaia Aru i moliaga o le tagofia o itutinosa o se tamaitai faapea ai ma lona taumafai e faamalosi o ia.

O moliaga o lo o tuuaia ai Aru na afua mai i le masina o Mati na te’a nei, ina ua ulufale faamalosi le ua molia i totonu o le fale sa momoe ai le fafine ma lana tama e 12 tausaga, ona ia taumafai lea e faamalosi le fafine.

A’o le’i tupu le faalavelave lea i le po lava lea, na muamua fesili Aru i le fafine pe i ai sana afi e faaola ai lana sikaleti, peitai sa fai i ai le fafine e leai se afi, ma aua foi nei toe alu atu i le la fale oloa ua leva le afiafi.

O lo o taofia Aru i le toese e aunoa ma se tupe sa faatulaga e tatala ai o ia ona o tulaga faaletonu i ona pepa nofomau.

TETE’E TOELEIU MA TAUPAU I O LA MOLIAGA

Ua teena e Precilla Toeleiu ma Herema Tauapu tuuaiga faasaga ia te i laua ina ua fofogaina le la mataupu i luma o le faamasinoga maualuga i le taeao ananafi.

I lo la teena ai o moliaga faasaga ia te i laua, ua faatulaga ai loa le la uluai iloiloga e faia lea i le masina fou.

O Toeleiu ma Taupau o lo o tuuaia i lo ave faagaoi lea o tupe mai le kamupani a le Florance Saulo and Associates sa la galulue ai, ma e silia i le $12,000 tupe o loo taua i faamaumauga a le kamupani na leiloa mai i lea gaioiga.

I faamaumauga a le faamasinoga o lo o taua ai, o tupe e totogi atu e tagata mo feagaiga o a latou taavale sa vaelua e i laua ua molia ma la faaaogaina.

Ua tatala i tua Toeleiu ae o Taupau o lo o taofia pea i le toeseina ua le mafai ona ia totogiina le $15,000 na faatulaga e le faamasinoga e tatala ai o ia i tua.