Ads by Google Ads by Google

Tala o Fa’amasinoga

TOFU MATAUPU TAMAITAI NA GALULUE INISIUA FAAMASINOGA MAUALUGA

Ua tofu atu nei i luma o le Faamasinoga Maualuga le mataupu faasaga i tamaitai e toalua ia na galulue i se kamupani Inisiua, i lo la ave faagaoi o ni tupe sa totogi atu e tagata mo Inisiua o a latou taavale.

O Herema Taupau ma Precilla Toelei’u o lo o tu’uaia  i moliaga o le la ave faagaoi o tupe sa tuuina atu la te vaavaaia.  O lenei mataupu na afua mai i le taimi ao galulue i la’ua i le kamupani inisiua a le Florence Saulo, i le 2010.

Na faailoa e i laua ua molia i leoleo, e tusa ma le $4,000 sa la faaaogaina mai tupe sa totogi atu e tagata mo inisiua o a latou taavale, peitai i faamaumauga a le kamupani, o lo o taua ai, ova ma le $12,000 le tupe e le o mafai ona maua.

Ua tatala i tua Toelei’u ina ua ia totogi le $15,000 sa faatulaga e le faamasinoga, ae o Taupau o lo o taofia pea i le toese sei vagana ua ia totogia le $15,000 ua faatulaga e tatala ai o ia i tua.

O tuutuuga mai le faamasinoga e usitai i ai i laua ua molia pe afai e tatala i tua e aofia ai le faasa lea ona o la toe taumafai e faafesootai le kamupani sa la galulue muamua ai, faasa ona la toe soli se tulafono, fesootai vavalalata ma le la loia, ma ia aua foi nei o la taumafai e tuua le atunuu ao faagasolo ai a laua mataupu.

O le taeao nei lea ua faamoemoe e tutulai ai i laua nei i luma o le faamasinoga maualuga.

SAINI FAAGAOI SIAKI A LE KAMUPANI SA GALUE AI

Ua i luma o le Faamasinoga Faaitumalo le mataupu faasaga i se tamaitai talavou, i lona gaoia o se tupe mai le kamupani o le Kooline Refrigeration sa galue ai, e ala i lona sainia o siaki e lua a le kamupani.

Ua faatulaga nei lona uluai iloiloga mo le taeao nei, lea o le a iloilo ai e le faamasinoga mau a le malo, pe faamaonia sa soli se tulafono, ae poo le tamaitai foi ua taofia o loo tuuaia i le soliina o le tulafono.

I faamaumauga a le faamasinoga o lo o taua ai e faapea, e lua siaki o lo o tuuaia e le malo ia le tamaitai o Segauai Toese sa ia gaoia, e ova ma le $1,000 le aofai, ae o se siaki lona tolu sa ia toe faafoi i le kamupani.

O siaki e lua o lo o tuuaia ai Toese, sa ia faaaogaina, sa ia faamalosi ona saini siaki ona ia tala lea ma faaaoga mo ia lava.

E $10,000 le tupe ua faatulaga e le faamasinoga e totogi ona faatoa mafai lea ona tatala le ua molia i tua mai le toese, e faatali ai taualumaga o lana mataupu, ae afai e mafai ona tatala o ia i tua, ua poloaina o ia e le faamasinoga e aua nei ona toe soli se tulafono, pe taumafai foi e toe faafesootai le kamupani sa galue muamua ai, a ia fesootai vavalalata ma lana loia i soo taimi, aua nei taumafai e sola ese ma le atunuu, ae ia tuuina atu ona pepa malaga e taofi e le malo sei maea lana mataupu ona toe tuuina atu lea ia te ia.