IOE NA IA SASAINA ULU LONA TO’ALUA LAUPAPA

O le alii lea sa tuuaia e le malo i lona sasaina le ulu o si ona toalua i se fasi laupapa, sa ia faailoa i le Faamasinoga Maualuga i le vaiaso nei, e faamaonia tuuaiga faasaga ia te ia, ma o lea gaioiga sa ia faia ua ia soli ai le tulafono o le faaoolima i le tulaga lua e pei ona tuuaia ai o ia e le malo.

I lalo o se maliliega na sainia e le alii lea ma le malo, lea foi ua talia e le faamasinoga, na tautino ai lenei alii e faapea, o se feeseeseaiga i le va o ia ma lona to’alua, na mafua ai ona ia tago i le fasi laupapa ma sasa ai lona ulu.

O le a faatali le tuuina atu o ni faafinauga a loia mo se faasalaga faasaga i le ua molia, sei maea ona tapena e le Ofisa Faanofovaavaaia sa latou ripoti, peitai ua malamalama le ua molia, tusa lava pe finau loia i le faamasinoga mo se faasalaga mama mo ia, e pule le faamasinoga pe talia pe teena ia faafinauga.

Ua ia malamalama foi, e le mafai ona toe suia lana tali ioe ua tuuina atu pe afai e tuu mai se faasalaga a le faamasinoga ae le tusa ai lona manao.

I faamaumauga a le faamasinoga o loo taua ai e faapea, o se vevesi na tulai mai i le va o le ua molia ma lona toalua i le la aiga i Pago Pago, ina ua vavao e le fafine le ua molia e aua le alu e inupia, na mafua ai le vevesi ma i’u i le faaoolima ai o le ua molia i si to’alua.

E le o mafai ona faailoa le igoa o le ua molia ona o puipuiga i le ono mafai lea ona iloa ai ma le na aafia i lenei mataupu, ma o loo tumau pea poloaiga o loo tatala ai o ia i tua e faatali ai le aso 19 Iulai lea ua faatulaga e lau ai lona faasalaga.

O le moliaga o le faaoolima i le tulaga lua, e mafai ona faasala ai se tasi i le toese mo le umi e le sili atu i le 5 tausaga, pe faasala foi i le salatupe e le sili atu i le $5,000, poo le faasala foi i faasalaga uma ia e lua.

SOPI SENIO

O le alii lea o loo tuuaia i lona so’aina o le isi alii i lana ta’avale e mafua mai i se feeseeseaiga i se fanua, ua faatulaga lana faamasinoga iloilo e faia i luma o le Faamasinoga Maualuga, ona o loo tumau pea lona tete’e i tuuaiga a le malo faasaga ia te ia.

O Sopi Senio lea o loo tatala i tua i lalo o tuutuuga mai le faamasinoga, ma o loo tuuaia o ia e le malo i le moliaga mamafa o le faaoolima i le tulaga muamua, faapea ai ma moliaga mama e lua o le faaleaga mea totino ma le faatupu vevesi.

O lea moliaga na afua mai i se faalavelave na tulai mai i le aso 3 Tesema i Leone, ina ua so’a e Senio se isi alii i lana taavale e mafua mai i se feeseeseaiga i se fanua, e pei ona tuuaia ai o ia e le malo.

O nisi o tuutuuga o loo tatala ai Senio i tua ina ua ia totogiina le $25,000 sa faatulaga e le malo, e aofia ai le faasa ona ia toe faafesootaiina le sa aafia, aua nei ona toe soli se tulafono, ma auai i soo se taimi e valaauina ai lana mataupu.