Ads by Google Ads by Google

Tala o Fa’amasinoga

MANAOMIA FAAMAUMAUGA ALI’I O LO’O LOKA I LE TOESE

Ua poloaina e le Faamasinoga Maualuga le itu a le malo, ina ia o latou tuuina atu i le Ofisa Faanofovaavaaia le tusi folau o le alii lea e to’alima i ai sui o le au lakapi a Nuuuli sa loka i le fasiga o le laufali mai Samoa, ina ia faamaonia ai lona igoa moni o loo faaaoga e fealua’i ai.

E le gata i lea, ua poloaina foi e le Faamasinoga le Ofisa o le Loia Sili e galulue ma le Ofisa Faanofovaavaaia, mo le tuu faatasia lea o se tala otooto o le soifuaga o lenei alii, amata mai lava i le taimi na ulufale mai ai i le teritori seia oo mai i le taimi na loka ai o ia i le tausaga na tea nei.

O le aso Faraile na te’a nei na fuafua e lau ai le faasalaga a Pelenato Fuautolu, lea foi e iloa i isi igoa e lua e pei o Tautiaga Uili ma Barry, peitai ua toe tolopo i le aso Faraile nei.

O se tusitusiga na tuuina atu e le Ofisa o Femalagaaiga i le Ofisa Faanofovaavaaia, o loo faailoa atu ai o le ua molia e tolu ona igoa e iloa ai i le teritori, o le mafuaaga tonu lea na tuuina atu ai loa e le alii faamasino sili ia Michael Kruse lana poloaiga, ona e atagia mai, o le ua molia sa pei o se tama aami a Nuuuli na aumai Samoa i le pemita 30 aso e taalo i le latou au lakapi, ona toe fo’i lea i Samoa.

O loo fia iloa e le faamasinoga pe na faapefea ona ulufale mai le ua molia i le teritori, a’o ai foi lana sponsor i le uluai taimi na ulufale mai ai.

O Pelenato ua ta’usala e le faamasinoga i le moliaga o le faaoolima i le tulaga lua, i lalo o se maliliega sa ia sainia ma le malo ma talia e le faamasinoga, ona o le faalavelave lea na o latou fasia ai ma isi alii o le kalapu lakapi a Nuuuli le alii laufali mai Samoa o Ponifasio Vasa i le masina o Iulai 2011.

Na maua le avanoa e faatoese ai Pelenato i le faamasinoga ma le malo o Amerika Samoa, e tusa ai o le solitulafono ua molia ai o ia. Sa ia faatoese foi i le alii laufali na aafia aemaise ai lona aiga i Nuuuli.

Na faaiu lana faatoesega i sana talosaga i le faamasinoga, mo se avanoa sei toe foi atu ai i lona aiga e tausi ona matua.

O loo taofia pea le ua molia i le toese e aunoa ma se tupe na faatulaga e tatala ai o ia i tua, ona o tulaga faaletonu i ona pepa nofomau.

PIO FAGAAUTAU

O le alii lea na ulufale faamalosi i totonu o le fale a se tasi o ona tausoga ma gaoi lana cell phone, ua tatala i tua mai le toese i le vaiaso na te’a nei i lalo o poloaiga a le faamasinoga, ina ua finagalo alii faamasino, ua lava le umi lea ua maea ona ia tuliina i le falepuipui e fai ma ana faasalaga i lenei mataupu.

O le alii o Pio Fagaautau na ta’usala e le faamasinoga i le moliaga o le taumafai e talepe se fale o se isi tagata, ina ua ia ulufale faamalosi i totonu o le fale o se tasi o ona auaiga i le faaiuga o Novema na te ‘a nei ma gaoi le cell phone, peitai na faailoa e Pio i le Ofisa Faanofovaavaaia, na te le’i gaoiina le telefoni, ae sa ia manao e faaaoga e vili ai se tasi o ana uo.

Na faailoa e le faamasino sili ia Michael Kruse i le alii o Pio, e silia i le 200 o aso o lona olaga ua ma’imau a’o taofia ai o ia i le falepuipui i le gaoiina o le telefoni.

Na talosaga Pio i le faamasinoga mo se isi avanoa sei toe foi ai e tausi lona tina ma toe faauma lana aoga. Sa ia faatoese foi i lona aiga ona o le solitulafono sa ia faia ua mafua ai ona loka o ia i le falepuipui.

Na tutu faatasi lana loia ia Leslie Cardin ma le loia a le malo o Cecilia Reyna, e talosaga i le faamasinoga mo se faasalaga faanofovaavaaia mo Pio, lea foi na talia e le faamasinoga.

O isi tuutuuga o le faanofovaavaaia a Pio mo le 5 tausaga e aofia le faasa lea ona ia toe tagofia le ava malosi poo fualaau faasaina foi, saili sana galuega ma ia faatino galuega e aunoa ma se totogi mo le atunuu i le umi e 160 itula.

Ua poloaina foi o ia e faatoese i lona tausoga lea na ia gaoia mai ai le telefoni, ma ia usitai foi i poloaiga o lana faanofovaavaaia i luma o le faamasinoga faaitumalo.