Ads by Google Ads by Google

Tala o Fa’amasinoga

PENE WELLS

O le isi alii mai le kalapu lakapi a Nuuuli lea na tuuaia i le fasiga o le alii laufali mai Samoa, ua tatalaina nei i tua i le vaiaso na te’a nei, ina ua faamalumalu e le faamasinoga se vaega o lona faasalaga faafalepuipui.

O le alii o Pene Wells na tatala i tua i le maea ai ona taofia o ia mo le 10 masina, ma ua poloaina o ia na te totogia se salatupe e $2,000 atoa ai ma le $1,000 mo le pili falema’i a le alii laufali a’o taofia ai i le falemai i Fagaalu.

O Wells na uluai tuuaia i le moliaga mamafa o le faaoolima i le tulaga muamua, ae i lalo o  se maliliega sa latou sainia ma le malo ma talia e le faamasinoga, sa ia ioeina ai le moliaga o le faaoolima i le tulaga lua.

I le ioeina ai e Wells o le moliaga o le faaoolima i le tulaga lua, sa ia tautino ai i le faamasinoga e faapea, i le aso 23 Iulai i le malae taalo o le Veterans Memorial stadium i Tafuna, sa ia kikiina ai foliga o le alii laufali ia Ponifasio Vasa a’o ta’atia o ia i luga o le malae o loo manu’a, ma o lea gaioiga sa ia faia na oo ai le tiga i le tino o lenei ali’i.

E 5 tausaga na manatu le faamasinoga e faasala ai Wells i le falepuipui i Tafuna, peitai ua faamalumalu e le faamasinoga le faataunuuina o lea faasalaga, ae ua faanofovaavaaia o ia mo le 5 tausaga i lalo o poloaiga a le faamasinoga.

O se tasi o poloaiga e aofia ai lona tuliina o masina e 20 i le toese, peitai o le a taofi lona tuliina o masina e 12 o loo totoe, ae ua lava masina e 10 lea ua uma ona ia tuliina e avea ma ona faasalaga i lenei mataupu.

MAPU LEOTA

O le alii lea o loo tuuaia i lona tagofia lea o le itutinosa o le uso a lona to’alua a’o momoe le fafine ma lona aiga i totonu o le potu malolo o le latou fale, ua faamoemoe o le taeao nei e faataunuuina ai lona faamasinoga iloilo.

O le susuga ia Mapu Leota lea o loo tatala i tua o loo tuuaia i le moliaga o le faatupu vevesi i nofoaga faitele.

E lei talia e le faamasioga le talosaga na faaulu e le loia a Leota o Fiti Sunia i le taeao ananafi, mo se avanoa e tolopo ai le faataunuuina o le faamasinoga autu o lenei mataupu.

Na taua e le loia a le malo, ua sauni le itu a le malo atoa ai ma ana molimau mo le mataupu.

O le itula e 9:30 i le taeao nei lea ua faamoemoe e toe fofogaina ai lenei mataupu i luma o le alii faamasino ia John Ward II.

NAOMI MAVAEGA

O le tamaitai lea na ia taumafai e faaaoga se credit card sa ia gaoia e fai ai sana faatau i le Asco Motors, sa ia faailoa i le faamasinoga faaitumalo i le taeao ananafi e le manao e faia sana iloiloga faapitoa, ae tuu sao atu loa lana mataupu i le faamasinoga maualuga e faaauau ai lona faamasinoga.

O le itula e 9:00 i le taeao nei lea ua faamoemoe e tulai ai Naomi Mavaega i luma o le faamasinoga maualuga mo le faaauauina ai o lana mataupu, ma o loo taofia pea o ia i le toese i Tafuna ina ua le mafai ona ia totogi le $5,000 na faatulaga e tatala ai o ia i tua.

O Mavaega o loo tuuaia i moliaga mamafa e lua e aofia ai le gaoi atoa ai ma lona taumafai e faaaoga faagaoi le credit card sa ia gaoia e fai ai sana faatau.

O le masina o Aokuso 2011 na tulai mai ai lenei faalavelave, ina ua faafesootai e se tagata faigaluega a le Asco Motors i le tagata e ana ia le credit card na gaoi e Mavaega se taumafaiga a le ua molia e faaaoga le credit card.

Na faailoa e Mavaega i leoleo, sa ia gaoia le ato sa i ai i totonu le credit card a se fafine sa la talanoa i le Falemai i Fagaalu, ona ia tia’i lea o le ato i le togavao ae faaaoga le credit card e tau fai ai lana faatau i le Asco Motors.