FA’ATULAGA FA’AMASINOGA ILOILO A DAVE TUPUA

O le aso 20 o Iulai lea ua faatulaga e faia ai le faamasinoga autu o le alii faiaoga lea o loo tu’uaiga i lona tago lea i se teineititi aoga i se auala na oo ai le fefe ma le le mautonu i le na aafia.

O Dave Tupua o lo o tuuaia i moliaga mama e tolu, e aofia ai lona taofia faapagota o se tagata, faapea ai ma moliaga e lua o le faaoolima i le tulaga tolu.

Ina ua valaauina le mataupu a Tupua i le vaiaso nei i luma o le Faamasinoga Faaitumalo, na faaalia e lana loia fautua, ia Fiti Sunia le manao o le ua molia, e faataunuu sona faamasinoga autu.  Ma ua taliaina e le ali’i fa’amasino ma le itu a le malo lea tulaga.

Na faailoa e le teineititi e 13 tausaga o lo o aafia, e fa’apea, i le aso 17 o Ianuari 2012, na tago ai le ua molia ma toso atu o ia faalatalata atu ia te ia, ona kisi atu lea i lona alafau.  Na taua foi e le teineititi se isi foi gaoiga sa faia e le ua molia i le masina o Tesema o le tausaga na te’a nei.

O lo o tumau pea tuutuuga o lo o tatala ai Tupua i tua e faatali ai lona faamasinoga autu.

IOAPO LAFAELE

O le alii lea na se’i e le Faamasinoga Faaitumalo lana laisene ave taavale mo le 6 masina, ina ua ta’usala i le ave taavale ‘ona i le masina o Fepuari, ua tu’uaia nei o ia i le moliaga o le ave taavale ae o lo o se’i lona laisene.

Ua tuuaia foi o ia i le moliaga o le ave taavale ‘ona, ma e $500 le tupe sa totogi lea ua mafai ai ona tatala le ua molia e tua e faatali ai le isi ana iloiloga lea ua faatulaga e le faamasinoga.

MATTHEW YANDALL

Ua talia e le faamasinoga le talosaga a le malo ina ia toe tolopo le fofogaina o le maliliega a le alii o Matthew Yandall, lea na fuafua e faia i le vaiaso nei, ona e i ai faamatalaga fou ua maua e le malo e uiga i lenei mataupu, e pei ona ta’ua e le loia a le malo, o Mitzie Folau.

O Yandall o lo o tuuaia i lona faaoolima lea i lana uo teine, ao ‘ona o ia, ma i’u ina taofia ai lana uo teine i le falemai ona o manu’a na aafia ai o ia.

O lo o taofia pea Yandall i le toese, e faatali ai le aso lea ua faatulaga e toe fofogaina ai lana mataupu.

FASI LE FA’ATAUOLOA AE GAOI SE PUSA PIA

O le ula lea na ia fasia se alii faatauolioa ae gaoi se pusa mai totonu o lana faleoloa, ua taofia nei i le falepuipui i Tafuna sei vagana ua totogi le $10,000, ona faatoa mafai lea ona tatala i tua.

O lo o tuuaia e le malo le ali o Dean Niu i lona tu’ia o se faatauoloa, ina ua mae’a ona ia tuuina atu i se tasi o ana uo le pusa pia sa ia gaoia mai i totonu o le faleoloa.

O Niu ua tuuaia nei e le malo i moliaga mamafa e tolu e aofia ai le faomea i le tulaga muamua, talepe fale i le tulaga muamua ma le tete’e i leoleo ao taumafai e loka faapagota o ia, faapea ai ma moliaga mama e fa e aofia ai le faaoolima ma le faaleaga meatotino i le tulaga tolu, gaoi atoa ai ma le tagofia o le ava malosi ae le’i atoa lona 21 tausaga.

E le o se taimi muamua lenei ua tulai mai ai ni ituaiga solitulafono faapenei i le atunuu, aemaise lava i le osofaia lea o faleoloa ma faatauoloa ae gaoi pusa pia.