NOFOVA’AVA’AIA SE TASI NA AVEA MUAMUA MA SENATOA

E ono masina lea ua faanofovaavaaia ai e le Faamasinoga Faaitumalo se tasi na avea ma Senatoa i le maota maualuga, ina ua ta’usala o ia i le moliaga mama o le ave ta’avale ‘ona.

O le tofa ia Fiatauaulava Jerry Sauni na tuuaia e le malo ona o le faalavelave lea na tulai mai i le aso 17 Tesema 2011 i Tafuna, ina ua taofia e leoleo lana taavale ma faamaonia ai o lo o fa’asuaava o ia.

Na fa’amatala e Fiatauaulava i le ali’i fa’amasino ia John L. Ward II e fa’apea, o le aso tonu lava lea sa faia ai le fiafia a le latou ofisa mo le kerisimasi, lea foi sa inu ai ma ia, ina ua mae’a sa oso i le taavale ma toe foi atu i le fale, ae maua ai loa o ia e leoleo i luga o le alatele.

Ua faamalumalu le tuuina atu o se faasalaga a le faamasinoga mo Fiatauaulava, ae ua faanofovaavaaia o ia mo le 6 masina i lalo o poloaig, e aofia ai lona totogi o se salatupe e $190, se’i lana laisene ave taavale mo le 6 masina, atoa ai ma le faasa ona ia toe tagofia le ava malosi i le taimi lea ua faanofovaavaaia ai o ia.

LOMITUSI UIAGALELEI

O le ali’i lea na ia sasaina le ulu o le isi alii la te tuaoi i se suo, ua ia ta’utino i le Faamasinoga Maualuga, e faamaonia tuuaiga faasaga ia te ia, i lalo o se maliliega sa latou sainia ma le malo.

O le alii o Lomitusi Uiagalelei na uluai tuuaia e le malo i le moliaga mamafa o le faaoolima i le tulaga lua faapea ai ma le moliaga mama o le faatupu vevesi i nofoaga faitele, ae i lalo o le maliliega sa ia sainia ma le malo, ua ia tali ioe ai i le moliaga muamua lea ua toe sui e le malo o le faaoolima i le tulaga tolu faapea ai ma le faatupu vevesi i nofoaga faitele.

I le tali ioe ai o Uiagalelei i moliaga mama e lua sa ia tautino ai e faapea, i se taimi o le aso 1 Me i Auasi, sa ia sasaina ai le ulu o le alii o Junior Stanley i se suo ma ta’e ai lona ulu (tulou).

Ua talosaga le malo i le faamasinoga ina ia aua nei tuuina atu se faasalaga faafalepuipui ia Uiagalelei, ae ua lava le umi lea na taofia ai o ia i le toese ina ua faatoa loka o ia e leoleo, e avea ma ona faasalaga i lenei mataupu, ma ia faanofovaavaaia o ia mo le 2 tausaga i lalo o poloaiga.

O nisi o poloaiga ua manatu le malo e tatau ona usitai i ai Uiagalelei e aofia ai le faasa lea ona toe nofo i le nuu o Auasi, faasa ona ia toe taumafai e faafesootai le alii na aafia i lenei mataupu, a ia auai i ni aoaoga e fesoasoani ai i le tulaga o le ita.

Fai mai faamaumauga a le faamasinoga, o le pisapisao tele o ta’ifau a le alii na manu’a i taimi o faigalotu, na mafua ai ona alu atu le ua molia ma le suo ma sasa ai, peitai na oso mai i fafo le toalua o le alii na aafia ma fesiligia le ua molia i le mafuaaga ua ia sasaina ai le ta’ifau, ma mafua ai loa ona tula’i mai se taugaupu i lo la va, mulimuli ane agai mai ma le alii na manu’a i fafo ma tulai mai ai loa le vevesi ina ua ta e le ua molia lona ulu i le suo.

AUTHUR BLAKE

O le alii lea na taumafai e osofa’i se isi alii i se agaese a’o faia se taaloga volipolo ia Tesema 29, 2011, ua toe tolopo le fofogaina o lona faasalaga lea sa fuafua e faia i le vaiaso nei i luma o le Faamasinoga Maualuga.

O se talosaga mai le itu a le malo ina ia tolopo le lauina o le faasalaga a le alii o Authur Blake, ona o lea faatoa maua e le malo le ripoti a le Ofisa Faanofovaavaaia, na mafua ai ona toe tolopo le iloiloga sa fuafua e faia i le aso ananafi.

O loo taofia pea i le toese le alii o Blake e faatali ai le fofogaina o lona faasalaga i le vaiaso fou.

Ua tausala Blake i le moliaga mamafa o le faaoolima i le tulaga lua, lea na toe suia mai i le moliaga e sili atu ona mamafa o le taumafai lea e faatino le solitulafono o le faaoolima i le tulaga muamua, ae solofua ai le isi moliaga mamafa o le taumafai e fasioti se tagata.

O le mea sa tupu e pei ona taua i faamaumauga a le malo, na alu Blake ma se naifi na nana i lona tua i le vaega sa faia ai le taaloga volipolo, ina ua latalata atu i le alii na aafia, sa ia tago loa i le naifi ma ta ai lea alii peitai na misi.