Ads by Google Ads by Google

Tala o Fa’amasinoga

O le vaiaso nei na faila ai e le malo le moliaga fa’aopoopo o le fa’ao’olima i le tulaga tolu fa’asaga i le faiaoga o le aufusu a Amerika Samoa, susuga Henry Tavake ona o le fa’alavelave lea na tula’i mai i fafo o le fale fa’amasino fa’aitumalo i le Aso Gafua, 7 Novema, lea o lo’o tu’uaia ai le tu’i e Tavake o le isi fo’i faiaoga o le aufusu a le atunu’u, susuga Nikolao Mageo.

Na te’ena e Tavake tu’uaiga fa’asaga ia te ia ina ua toe tula’i i luma o le fa’amasinoga i le Aso Gafua na te’a nei, ma fa’atulaga ai loa lana ulua’i iloiloga e faia i le aso 6 Tesema.

E tusa ai o fa’amaumauga a le fa’amasinoga, o le vevesi i le va o Tavake ma Mageo na alia’e mai i le taimi na la o atu ai e tapuaia le fa’amasinoga o le ali’i faiaoga o le aufusu a Samoa ia Lautapa’a Wong King, lea fo’i na taofia ma tu’uaia e le malo i le fa’ao’olima.

O lo  o tumau pea poloaiga o lo o tatala ai Tavake i tua e le fa’amasinoga, e fa’atalitali ai le aso lea ua fa’atulaga e faia ai lana ulua’i iloiloga, ma o nisi o ia poloaiga e aofia ai le fa’asa lea ona ia toe taumafai e fa’afeso’ota’i Mageo.

Ua poloaina fo’i o ia ina ia aua ne’i ona toe solia se tulafono a le malo, ae ia feso’ota’i vavalalata ma lana loia, susuga Tala Uiagalelei a’o fa’agasolo ai lana mataupu, ma ia aua fo’i ne’i ona misia sana iloiloga pe a valaau i luma o le fa’amasinoga.

FUFUSU LE AU FAI FA’ATOAGA MAI SAINA

O se vevesi na tula’i mai i le va o ni ali’i Saina o lo o galulue o ni fai fa’atoaga laau aina i le atunu’u, na i’u ai ina tofu le tasi i le falema’i mo le tau togafitia o lona tau’au na a’afia i se agaese, ae tofu le isi i le falepuipui ma tu’uaia i lona fa’aaogaina o se agaese e fa’ao’o ai manu’a.

O le ali’i o Quin Sun o lo o taofia nei i le toese i Tafuna e aunoa ma se tupe ua fa’atulaga e tatala ai o ia, ona o le tulaga fa’aletonu i ona pepa nofomau, ua tu’uaia nei e le malo i le moliaga mamafa o le fa’ao’olima i le tulaga lua.

O le fa’alavelave lenei na tula’i mai i le vaiaso na te’a nei, ma toe tolopo mai ai loa i le aso ma le fa’amoemoe o le a faila ai e le malo moliaga fa’aopoopo fa’asaga ia Sun, peita’i o le fa’afituali o lo’o tula’i mai, e le’i maua mai lava se tagata e fai ma fa’aliliu upu mo le Ofisa Loia Fautua.

O le Aso Tofi o le vaiaso nei lea ua toe tolopo i ai lenei mataupu ma le fa’amoemoe, e tatau ona o’o atu i ai ua maua e le Ofisa Loia Fautua se fa’aliliu upu na te fa’aliliuina taualumaga a le fa’amasinoga i le gagana e malamalama i ai le ali’i o Sun, lea o lo’o taofia pea i le toese e aunoa ma se tupe e tatala ai i tua, ona o tulaga fa’aletonu i ona pepa nofomau.

I fa’amaumauga a le fa’amasinoga o lo o taua ai, o lenei fa’alavelave na afua mai i se feeseeseaiga i le va o le ua molia ma le ali’i na a’afia, i le taimi a’o pisi ai i le latou fa’atoaga laau aina i Tafuna, ma i’u ina fa’aaoga ai loa e le ua molia se agaese e fa’ao’o ai manu’a i le ali’i na a’afia.