Ads by Google Ads by Google

Tala o Fa’amasinoga

SOLOFUA MOLIAGA FA’ASAGA IA LORRAINE ‘LOLA’ REID

Ua talia e le alii faamasino ia John Ward II se talosaga na faaulu e le loia a le malo ina ia solofua moliaga mamafa e lua sa faia faasaga ia Lorraine ‘Lola’ Reid, ina ua maea ona toe totogi e le ua molia le tupe sa tuuaia o ia sa ia faaaogaina.

O Reid na tuuaia i le moliaga o le gaoi atoa ai ma lona ave faagaoi o ni tupe sa i lalo o le vaavaaiga, i le aofai e $1,130, o tupe mai le teugatupe a le Asosi Alo Va’a (American Samoa Sailing Association (ASSA).

Na faailoa e le loia a le malo o Cabel Poag i le faamasinoga e faapea, ua maea ona toe totogi e le ua molia le tupe e ala i se siaki sa ia tuuina atu i le teugatupe a le ASSA i le faletupe o Hawaii, ae talu ai o le siaki sa tuuina atu e le o se siaki mai le faletupe o Hawaii, o lea e manaomia ai le faamaonia i totonu o le 3 aso faigaluega ina ia mautinoa ai o loo i ai le tupe i totonu.

Na faamaonia e Poag i le faamasinoga le tuuina atu e Reid o le siaki ia te ia i le vaiaso na te’a nei, ma ia tuuina atu ai loa le siaki lea i le ASSA.

O le aso 3 Fepuari 2012 na faila ai e James McGuire se tagi i le ofisa o leoleo faasaga ia Reid, i lona faaaogaina lea o tupe mai le teugatupe a le ASSA mo ia lava. O Reid sa avea ma sa totino o le faalapotopotoga o le Pago Pago Yacht Club ao lei tulai mai lenei faalavelave, ma o le teugatupe foi a le ASSA, e lua saini e manaomia ina ia mafai ai ona tala se siaki,  peitai fai mai faamaumauga a le faamasinoga, e na o le saini lava a Reid sa faaaoga e tala ai siaki e 6 sa ia tuuina atu i le faletupe.

FUALALEMALO SALATIELU

O le tamaitai lea o loo tuuaia i lona faaoolima i se tamaititi e 11 tausaga le matua ma manu’a tigaina ai, ua tuuaia nei e le malo i le moliaga mamafa o le faaoolima i le tulaga lua, atoa ai ma moliaga mama e lua o le faatupu vevesi i nofoaga faitele aemaise ai o lona faia o se gaioiga e lamatia ai le saogalemu o se fanau.

Na teena e le tamaitai o Fualalemalo Salatielu tuuaiga faasaga ia te ia ina ua tulai i luma o le faamasinoga faaitumalo i le vaiaso na te’a nei, ma faatulaga ai loa lana ulua’i iloiloga e faia lea i le vaiaso nei, lea o le a fesiligia ai ma iloilo e le faamasinoga molimau a le malo, pe faamaonia sa soli se vaega o le tulafono, ae poo Salatielu foi lea o loo tuuaia i lona soliina lea o le tulafono.

I faamaumauga a le faamasinoga o loo taua ai e faapea, o le vevesi na tulai mai i se taugaupu a le alii ua manu’a ma lona uso laititi, ae alu atu ai le ua molia ma tu’i o ia ma pau ai i lalo, ona ia ta kikiina lea.

Na tu i luga le tamaititi ma tamo’e i le atoa peitai na aapa atu le ua molia i le ma’a ma togi ai, lea na tau i lona isu ma manu’a ai, ma mafua ai ona taofia o ia i le falemai mo togafitiga.

E $5,000 le tupe na faatulaga e le faamasinoga e tatala ai le ua molia i tua, peitai ane o tulaga i lona soifua maloloina, aemaise ai o lenei tamaitai e gugu (tulou), ua tatala ai o ia i tua i lalo o tuutuuga, e faasa ona ia alu ese ma le fale o lona aunty lea o le a nofo ai, ao faagasolo ai taualumaga o lona faamasinoga.

O le tamaitai lea na te faamatalaina taualumaga uma a le faamasinoga i le gagana faa gugu (sign language interpreter), ua poloaina e le faamasinoga ina ia toe oo atu i le vaiaso nei i le isi iloiloga lea o le a valaau a le ua molia, ma ua poloaina e le faamasinoga le ua molia e aua nei ona toe taumafai e faafesootai le tamaititi na aafia i lenei mataupu.

SAUNI E IOE SA IA FASIA LONA TO’ALUA

O le alii lea sa ia sasaina le ulu o si ona faletua i se fasi laupapa ua ia saini e tuuina atu lana tali ioe i luma o le faamasinoga maualuga i le vaiaso nei, i le maea ai lea ona tuuina atu e le malo o se ofa ia te ia i le vaiaso na tea nei.

O le faalavelave na tulai mai i le va o le alii lea na lona toalua, ina ua fai atu i ai si fafine e aua le alu e inupia, peitai na ita ai le ua molia ma fasi loa si ona toalua.

O loo tatalaina pea i tua le ua molia i lalo o poloaiga mai le faamasinoga, e faatali ai lana iloiloga lea ua faatulaga e faia i le vaiaso nei.

TOE IOE FOI LE ISI FAATAUOLOA

O le tali ioe ai o le alii faatau oloa o Xiuxia Cao i lona moliaga o lona faatauina atu lea o le ava malosi i fanau e laiti i lalo o le tulafono, ua silia ai i le toa 10 ia te ia faatauoloa ua maea ona latou tali ioe i le moliaga lava lenei e tasi, ma ua faasalaina foi i latou e le faamasinoga faaitumalo.

O Cao na maua i le polokalame suesue sa faia e le Vaega a le Taitai Tama lea e faauluulu i le faletua o le alii kovana, ina ua suesueina pe faapefea ona maua e fanau o loo tuuaia i le tagofia o le ava malosi pia o loo latou inuina.

Na faamanatu e le alii faamasino ia John Ward II ia Cao e faapea, ana faapea e fai lona tiute o le siaki muamau lea o le ID o le tama poo le teine e masalomia e lei atoa lona 21 tausaga, e le gata o le a fesoasoani lea mo nei fanau ae sili ai o se fesoasoani lelei lea mo le faasaoina o le taimi o le faamasinoga e iloiloina ai lana mataupu, faapea ai ma le faaaluina o tupe a le malo i le tauaveina o mataupu nei.

Ua faanofovaavaaia Cao i lalo o poloaiga a le faamasinoga e aofia ai lona auai i aoaoga e faatautaia e le Polokalame a le Taitaitama, ina ia fesoasoani ai i auala e mataituina ai fanau ma taofia ai le faatauina atu o le ava malosi ia te i latou.