MALAMA PETAIA

O le tamaitai lea na ‘ona ma laulauvavale i alii leoleopo o le fale kalapu o le Bowling Alley i le masina o Mati na te’a nei, ua faanofovaavaaia e le faamasinoga mo le 9 masina i lalo o tuutuuga e ao ona usita’i i ai, lea e aofia ai ma le faasa lea ona oo i le Bowling Alley.

Na poloaina foi e le faamasinoga le tamaitai o Malama Petaia na te totogiina le salatupe e $150, o se tasi lea o tuutuuga o lana faanofovaavaaia.

I le fofogaina ai o le faasalaga a Petaia i le vaiaso na te’a nei i luma o le faamasinoga faaitumalo, na fautuaina malosi ai o ia e le alii faamasino o John Ward II ina ia aua nei ona toe tagofia le ava malosi, pe toe mafuta atu foi i tagata latou te tagofia le ava ao faanofovaavaaia.

“O le ‘ava e le o se uo lelei ia te oe, e le gata e valea ai lou mafaufau ae i’u ina aafia ai ma lou saogalemu pe afai e ova lou tago i le ‘ava,” o le fautuaga lea a Ward i le ua molia.

E 30 aso na fuafua le faamasinoga e loka ai le ua molia peitai ua faamalumalu le faataunuuina o lea poloaiga, pe afai na te usitaia uma isi poloaiga ua tuuina atu ia te ia, lea e aofia ai le faasa ona toe tago i le ava, faasa ona toe soli se tulafono, a ia auai i aoaoga e fesoasoani ai le tagofia o le ava ma le ita.

O Petaia na ta’usala e le faamasinoga i le moliaga o le faatupu vevesi i nofoaga faitele, ona o le faalavelave lea na tulai mai i le aso 26 Mati i le Bowling Alley, ina ua fai atu i ai leoleopo e faasa ona siva se tagata i luga o le dance floor ma uu se fagupia, ae ita ai le ua molia ma lafo upu mataga i alii leoleopo, faapea ai ma lona faia o isi gaioiga e lepeti ai le nonofo filemu o tagata.

IUSI AFOA

O le alii lea na la vevesi ma se isi alii i Taputimu e mafua mai i ni fanua, ua faavaavaaia mo le 6 masina i lalo o poloaiga a le faamasinoga e ao ona usitai i ai, lea e aofia ai le faasa ona ia toe taumafai e faafesootai le alii na la vevesi, faapea ai ma le faasa lea ona ia toe soli se tulafono a le malo.

“Afai e i ai nisi vevesi e toe tulai mai i le fanua, taoto i matai o lua aiga la te faafilemuina le mataupu, ae afai e le mafai, lafo mai i le faamasinoga o lana fatu aiga tausi lena,” o le fautuaga malosi lea a le alii faamasino o John Ward II i le ua molia.

O Iusi Afoa na ta’usala i le moliaga o le faatupu vevesi i nofoaga faitele, e mafua mai i se vevesi na tulai mai i le aso 18 Me i Taputimu, lea e aafia ai se fanua i lo latou aiga ma le isi aiga, ina ua tulai mai ai se vevesi i le va o ia ma se isi tagata.

O isi tuutuuga o le faanofovaavaaia a Afoa e aofia ai le faasa ona ia toe faatupu se vevesi pe toe taumafai foi e faafesootai le tagata na la vevesi i le fanua, ma ia totogiina foi le salatupe e $50.

LORRAINE REID

O le masina fou lea ua faatulaga e le faamasinoga faaitumalo na te iloiloina ai le talosaga lea na faaulu e le loia a le malo, ina ia solofua  moliaga faasaga ia Lorraine Reid, ona o lona faaaogaina i se auala le tatau tupe a le Asosi alova’a a tamaiti a Amerika Samoa (American Samoa Sailing Association).

O le vaiaso na te’a nei na faila ai e le loia a le malo o Cabel Poag sana talosaga i le faamasinoga ina ia solofua moliaga mamafa e lua o le gaoi atoa ai ma le ave faagaoi o ni oloa o loo tuuaia ai e le malo Reid.

O le va o le aso 12 Aokuso ma Novema 15 na faamaonia e Reid i leoleo sa ia faia ai lenei solitulafono.

Ina ua fesiligia e leoleo le ua molia e uiga i lenei mataupu, sa ia faamaonia ai lona sainia o ni siaki se 6 e aunoa ma le saini lona lua e manaomia e mafai ai ona tala siaki nei, ona o lona naunau ia sefe tupe a tamaiti mai le alii o McGuire.

O loo tumau pea tuutuuga o loo tatala ai Reid i tua mai le toese ina ua ia totogiina le $5,000 sa faatulaga e le faamasinoga e tatala ai o ia ia tua.