Ads by Google Ads by Google

Tala o Fa’amasinoga

TU’UAIA SE LEOLEO I LE AVE TA’AVALE ‘ONA

O se tasi o tuutuuga ua tatala ai i tua mai le toese se alii leoleo, o le faasa lea ona ia toe faafoea se taavale, sei vagana ua faamaonia o lo o i ai sana laisene ave taavale sa tuuina atu e le Ofisa o Taavale Afi a le malo i Tafuna.

O le  faaiuga o le vaiaso na se’i mavae atu, na taofia ai e leoleo ia le ali’i leoleo o Fatu Enari, i Nu’uuli, ina ua masalomia o lo o ia faafoeina le taavale a’o ‘ona.

O lo o ua molia nei Enari i le moliaga o le ave ta’avale ‘ona atoa ai ma le ave taavale e leai se laisene, ma o le taeao o le aso Gafua na tula’i ai o ia i luma o le ali’i fa’amasino o John L. Ward II.

Na te’ena e Enari tu’ua’iga ua faia fa’asaga ia te ia, ma o le fa’ai’uga o lenei masina ua fuafua e toe fa’ataunu’u ai leisi ona iloiloga.

Na talia e le faamasinoga se talosaga tuu faatasi a loia ina ia tatala Enari e aunoa ma se tupe taofia, i lalo o tuutuuga e ao ona usitai i ai.

FOLASA GALEA’I

Na avea le sese o faamaumauga a le malo ma itu na talia ai e le Faamasinoga Faaitumalo se talosaga ina ia faaitiitia le tupe taofia mo Folasa Galea’i, mai i le $100,000 sa i ai, i le $50,000 ua i ai nei.

Na fa’aalia e le loia a le malo, o Cable Poag i le vaiaso ua te’a e fa’apea, “O le mamafa sa’o o le pauta e sili laititi atu lava ma le tasi le pauna”.  Ma na ta’ua e Poag, e na te le malamalama pe na fa’apefea ona tula’i mai lea sese, ae ina ua fesiligia o ia e le alii faamasino o John Ward II pe fia la le mamafa o mariuana, na tali le alii loia, “ou te le iloa pe na fua e leoleo mariuana sa maua pe leai.”

O faamaumauga nei na mapuna a’e ina ua faatulaga le aso e faia ai le ulua’i iloiloga a Galea’i i lenei mataupu,  ma ua faatulaga ai le aoauli o le aso e faataunuuina ai lea iloiloga.

Na faailoa e Ward II ia Galea’i, o lana uluai iloiloga e le o se faamasinoga, ae na o se iloiloga lava e iloilo ma  faafofoga ai le faamasinoga i molimau a le malo, pe lava mau e lagolago ai sa soli se tulafono, ae pe o ia foi lea o loo tuuaia i le soliina o le tulafono.

“Afai ae faamaonia e le faamasinoga maua a le malo, ona tuu atu loa lea o lau mataupu i le faamasinoga maualuga e faataunuu ai sau faamasinoga autu, poo le faia foi lea o sa outou maliliega ma le malo e faaiu ai lenei mataupu,” o le faamatalaga lea a Ward II ia Galea’i.

O Galea’i, 19 tausaga le matua o loo tuuaia i moliaga mamafa e lua, o lona umia faasolitulafono lea mariuana ma le pauta o le aisa ma le faamoemoe e tulei ma faatau  atu i isi tagata.

O moliaga faasaga ia Galea’i na afua mai ina ua alu atu e piki mai se meli a lona uncle i le aso 25 Me i le falemai i Fagatogo, ae taofia ai o ia ina ua masalomia e alii Ofisa o le Tiute apa tamato sa i totonu o le pusa na aumai i le meli, i le mama lea e le tutusa ma le  mamafa o ituaiga apa tamato moni o loo i ai.

Ina ua tatala e alii Ofisa o le Tiute apa tamato e 8 sa i totonu o le pusa lea na faafefiloi mai ma chips ma keke, sa mau i ai afiafi mariuana ma aisa e tai 12.

AARON WISDOM

O le aso 5 Novema lea ua faatulaga e faataunuuina ai le faamasinoga autu o le alii lea o loo tuuaia i lona umia faasolitulafono o mariuana, ina ua maua e alii Ofisa o le Tiute ni vaega o mariuana o loo aumai faanana i totonu o fagu siamu sa i totonu o le container na aumai i lalo o le igoa o le ua molia.

I le toe valaauina ai o lenei mataupu i le taeao ananafi na faailoa ai e le loia a le alii o Aaron Wisdom i le faamasinoga  maualuga e faapea, o loo latou galulue pea ma le malo i le mataupu e uiga i mau faamaonia faasaga i lenei mataupu, peitai o le taimi nei ua manao Wisdom e faatulaga sana faamasinoga autu.

O le moliaga faasaga ia Wisdom na afua mai ina ua siaki e sui o le Ofisa o Tiute lana container sa aumai mai fafo i le masina o Ianuari o le tausaga nei, ae maua ai vaega o mariuana sa aumai faanana i totonu o fagu siamu.

O loo faapea foi ona tuuaia lenei alii i isi moliaga e aofia ai le umia o se fana e le’i lesitalaina, atoa ai ma lona umia faasolitulafono o ni pulufana.

Ina ua alia’e mai lenei mataupu i le masina o Ianuari, na faila ai loa e le malo moliaga faasaga ia Wisdom peitai na solofua e le faamasinoga faaitumalo, ina ua le mafai e le malo ona faamaonia i le faamasinoga, o Wisdom o loo tuuaia i lona umia faasolitulafono o fualaau faasaina, fana ma pulufana, ma toe faila ai loa e le malo lenei mataupu i le masina o Fepuari, ma faaauau mai ai lava se ia oo mai i le aso ananafi.

TAVITA TUISALO’O

O le aso 22 Iuni lea ua fa’amoemoe itu e lua e fofogaina ai i luma o le fa’amasinoga maualuga se maliliega ua uma ona latou sainia ma le alii o Tavita Tuisalo’o, ma fa’amuta ai loa lenei mataupu.

O le vaiaso nei na faatulaga e fofogaina ai le maliliega a le ua molia ma le malo i luma o le faamasinoga, peitai o nai suiga laiti na mafua ai ona toe faaauau i le aso e pei ona taua.

O Tuisalo’o lea na osofaia e leoleo lona fale ma maua i ai vaega o fualaau faasaina, sa faamoemoe e faia i le masina lenei lana faamasinoga autu, peitai na toe suia le mafaufau o lenei alii ma ia taliaina ai loa le ofa sa tuu atu i ai e le malo.

O loo tuuaia o ia i le moliaga o le umia faasolitulafono o vaega o fualaau faasaina o le mariuana, e afua mai ina ua maua e leoleo i le latou osofaiga se laau mariuana o loo ola i tafatafa o lona fale. Sa faapea foi ona maua i lea osofaiga se pulufana ma mea e faaaoga i fualaau faasaina.

O loo tumau pea poloaiga o loo tatala ai le ua molia i tua e faatali ai le aso lea ua toe tolopo i ai lana mataupu.