Tala o Fa’amasinoga
VICTOR LIWAN TACLOLOY
Ua maea nei ona tapena e le malo se maliliega mo le alii mai Asia lea o lo o tuuaia i lona faia o ni uiga mataga i se tamaitai, peitai e le o mafai ona fofogaina i luma o le Faamasinoga Maualuga i le taimi nei lea maliliega, ona o lo o gasegase le loia a lenei alii, o lo o tau saili foi se faaliliu upu.
I le tulai mai ai o lea tulaga, ua talosagaina ai loa e loia le faamasinoga ina ia toe tolopo le fofogaina o le mataupu a le alii o Victor Liwan Tacloloy i le aso 11 Iuni, atonu e oo atu i ai ua malosi lana loia o Ruth Risch-Fuatagavi.
O Victor o loo tuuaia i moliaga o le tagofia lea o itutinosa o se tamaitai, tete’e atu i leoleo ao taumafai e loka faapagota o ia, faatupu vevesi i nofoaga faitele ma le faaoolima i le tulaga tolu.
Na taua e le tamaitai loia fautua o Leslie Cardin lea na tulai mo Victor i le taeao ananafi, ua maea ona taunuu atu i le latou ofisa le ofa a le malo peitai e lei maua se taimi e talanoa ai Victor ma lana loia.
O moliaga ua tuuaia ai lenei alii mai Asia na alia’e mai lea i se inuga sa faia ma le tamaitai na aafia, lea na tuuaia ai loa o ia i lona taumafai e tagofia itutinosa o lea tamaitai, peitai ina ua agai atu leoleo e taofia mai le ua molia, sa taumafai o ia e tete’e ma sola ese mai leoleo.
O lo o taofia pea le ua molia i le toese e faatali ai le aso lea ua toe tolopo i ai lana iloiloga.
ROMEO PERETANIA
O le taeao nei lea ua faamoemoe e iloilo ai e le faamasinioga maualuga le mataupu a le alii o Romeo Peretania, pe ua ia soli tuutuuga o lana faanofovaavaaia sa tuuina atu e le faamasinoga ia te ia.
O Peretania o lo o faanofovaavaaia i luma o le faamasinoga maualuga ona o se mataupu sa ta’usalaina ai o ia i lona taliaina lea o ni oloa sa ave faagaoi, lea na tuli ai sona faasalaga faafalepuipui.
Ao faanofovaavaaia le ua molia, sa toe taofia o ia e leoleo i le masina o Mati na te’a nei ma tuuaia i lona umia o fualaau faasaina.
O loo taofia pea le ua molia i le toese ma le faamoemoe e tatau ona toe tulai i le taeao nei mo le fofogaina o le isi ana iloiloga i luma o le alii faamasino sili ia Michael Kruse.
VILI ONEY
Ua toe tolopo i le Aso Faraile o le vaiaso fou le lauina o le faasalaga a le alii o Vili Oney, ina ua talia e le faamasinoga le talosaga a le Ofisa Faanofovaavaaia, ona e lei maea lelei le ripoti o lo o fuafua e faavae i ai se faaiuga mo le ua molia.
Na malilie uma itu e lua i le faaiuga a le faamasinoga, ma toe faatulaga ai loa i le aso1 Iuni le lauina o le faasalaga a le alii o Oney.
E tusa ai ma faamaumauga a le faamasinoga, o mariuana ia na maua i le fale o Oney, sa i totonu o se pusa e tuu i ai seeva sa i totonu o lona potu. Sa faapea foi ona maua i ai ma ni pepa taai, o se sikaleti mariuana ma se vaega tupe tele sa teu i totonu o se totini.
O le isi mea sa maua e leoleo o se mea faigaluega e taua o le grinder ma vaaia le pipi’i i ai o toega o lau mariuana, e foliga mai o le mea faigaluega lea e faaaoga e faanini’i ai lau mariuana.
O lo o tumau pea poloaiga a le faamasinoga o loo tatala ai i tua Oney e faatali ai le aso lea ua toe tolopo i ai le lauina o lana faasalaga.
O le alii loia ia Cabel Poag o loo tulai mo le malo i lenei mataupu, ae o Sharron Rancourt o loo tulai mo le ua molia.